ଯାଜପୁର: ଯାଜପୁରରେ ବିଜେପିକୁ ଶକ୍ତ ଝଟକା । ବିଜେପିରୁ ଇସ୍ତଫା ଦେଲେ ୨୦୦ରୁ ଅଧିକ ଆଗଧାଡ଼ିର କର୍ମୀ । ଯାଜପୁର ଭାରତୀୟ ଜନତା ପାର୍ଟିର ଯୁବ ରାଜ୍ୟ କାର୍ଯ୍ୟ କାରିଣୀ ସଦସ୍ୟ ସୌମ୍ୟ ରଞ୍ଜନ ଧଳ , ଜିଲ୍ଲା ସାଧାରଣ ସମ୍ପାଦକ ହୃଷୀକେଶ ମେକାପଙ୍କ ସହ ଦୁଇଶହରୁ ଅଧିକ କର୍ମୀ ଜିଲ୍ଲା ସଭାପତିଙ୍କୁ ଇସ୍ତଫା ପତ୍ର ପଠାଇଛନ୍ତି। ବିଜେପି କେବଳ ନିର୍ବାଚନ ସମୟରେ କର୍ମୀ ଓ ଲୋକଙ୍କ ପାଖକୁ ଯାଏ । ନିର୍ବାଚନ ପରେ ବିଜେପି ନେତାଙ୍କ ଦେଖା ମିଳେନି ବୋଲି ଅଭିଯୋଗ କରି ସମସ୍ତେ ଦଳ ଛାଡ଼ିଛନ୍ତି।
ଯାଜପୁର ପାନ୍ଥଶାଳାରେ ଆୟୋଜିତ ସାମ୍ବାଦିକ ସମ୍ମିଳନୀରେ ଇସ୍ତଫା ନେଇ ସୂଚନା ଦେଇଛନ୍ତି ବିଜେପି ଛାଡ଼ିଥିବା କର୍ମକର୍ତ୍ତା। ଅଭିଯୋଗ ଅନୁସାରେ, ଦୀର୍ଘ ବର୍ଷ ଧରି ଭାରତୀୟ ଜନତା ପାର୍ଟିରେ କାର୍ଯ୍ୟ କରି ଆସୁଥିବା କର୍ମୀଙ୍କ ସୁଖ ଦୁଃଖରେ ଛିଡା ହେଉନାହାନ୍ତି ନେତା। କର୍ମୀଙ୍କୁ ସହଯୋଗ କରିବା ବଦଳରେ ଅଣଦେଖା କରାଯାଉଛି। ଜିଲ୍ଲା ସଭାପତି କୌଣସି କାର୍ଯ୍ୟରେ କର୍ମୀଙ୍କ ମତାମତ ନିଅନ୍ତି ନାହିଁ। ଫଳରେ ଅସନ୍ତୁଷ୍ଟ ହୋଇ କର୍ମୀମାନେ ସାମୂହିକ ଭାବେ ଦଳ ଛାଡ଼ିଛନ୍ତି। ଯାଜପୁର ଜିଲ୍ଲାରେ ଯେଉଁ ଦଳ ବିକାଶ କରୁଛି ଏବଂ ଲୋକଙ୍କ ସୁଖଦୁଃଖରେ ଠିଆ ହେଉଛି ସେହି ଦଳରେ କାମ କରିବାକୁ ସମସ୍ତେ ଆଗ୍ରହ ପ୍ରକାଶ କରିଛନ୍ତି।
