ନାବାଳକ ଅଭିଯୁକ୍ତର ରକ୍ତନମୁନା ବଦଳାଇ ୨ ଡାକ୍ତର ଗିରଫ
ପୁଣେ: ବହୁଚର୍ଚ୍ଚିତ ପୁଣେ ପୋର୍ସ କାର ହିଟ୍ ଆଣ୍ଡ ରନ୍ କେସରେ ପୋଲିସର ବଡ ଆକ୍ସନ । ଦୁଇ ଡାକ୍ତରଙ୍କୁ ଗିରଫ କଲା ପୋଲିସ । ନାବାଳକ ଅଭିଯୁକ୍ତଙ୍କ ମେଡିକାଲ ରିପୋର୍ଟ ତଥା ପ୍ରମାଣ ନଷ୍ଟ କରିବା ଅଭିଯୋଗରେ ଦୁଇ ଡାକ୍ତରଙ୍କୁ ଗିରଫ କରାଯାଇଛି । ଏହି ଦୁଇ ଡାକ୍ତର ଅଭିଯୁକ୍ତଙ୍କ ରକ୍ତପରୀକ୍ଷା ରିପୋର୍ଟରେ ହେରଫେର କରିଥିଲେ ।
ପୋର୍ସ କାରରେ ଦୁଇ ଜଣଙ୍କୁ ଚଢାଇ ମାରିଥିବା ଅଭିଯୁକ୍ତ ନାବାଳକଙ୍କ ଡାକ୍ତରୀ ପରୀକ୍ଷା ପାଇଁ ପୁଣେର ସସୁନ ସରକାରୀ ହସ୍ପିଟାଲ ଅଣାଯାଇଥିଲା । ଏହି ସମୟରେ ସେଠାରେ ନାବାଳକଙ୍କ ସମ୍ପର୍କୀୟ ପହଞ୍ଚି ଯାଇଥିଲେ । ସୁତ୍ର ମୁତାବକ ସେମାନେ ଡାକ୍ତରଙ୍କୁ ପଇସାର ଲୋଭ ଦେଖାଇ ରକ୍ତ ନମୁନାକୁ ବଦଳାଇ ଦେଇଥିଲେ ।
ଏହି ମାମଲାରେ ଗିରଫ ଡାକ୍ତର ଅଜୟ ତୱରେ ସସୁନ ହସ୍ପିଟାଲରେ ଫରେନ୍ସିକ ମେଡିସିନ ଓ ଟକ୍ସିକୋଲୋଜି ବିଭାଗର ମୁଖ୍ୟ ଅଟନ୍ତି । ସେହିପରି ଡାକ୍ତର ଶ୍ରୀହରି ହରଲୋଲ ଦୁର୍ଘଟଣା ବିଭାଗର ମୁଖ୍ୟ ଚିକିତ୍ସା ଅଧିକାରୀ ଅଛନ୍ତି । ଡାକ୍ତର ଶ୍ରୀହରି ନାବାଳକର ରକ୍ତ ନମୁନା ସଂଗ୍ରହ କରିଥିବାବେଳେ ଏଥିରେ ଆଲକହଲ ମାତ୍ରା ଥିବା ସନ୍ଦେହ କରି ଏହା ପରିବର୍ତ୍ତନ କରିବାକୁ ନିଷ୍ପତ୍ତି ନେଇଥିଲେ ।
କ୍ରାଇମବ୍ରାଞ୍ଚ ମୁତାବକ ଅଭିଯୁକ୍ତ ନାବାଳକର ପ୍ରଥମ ରକ୍ତପରୀକ୍ଷା ରିପୋର୍ଟରେ ସେ ନିଶା ସେବନ କରିନଥିବା କୁହାଯାଇଥିଲା । ଏହାପରେ ଦ୍ବିତୀୟ ଥର ପାଇଁ ନାବାଳକର ରକ୍ତ ନମୁନା ସଂଗ୍ରହ କରାଯାଇ ପରୀକ୍ଷା ପାଇଁ ପଠାଯାଇଥିଲା । ଅଜୟ ତାୱରେଙ୍କ ନିର୍ଦ୍ଦେଶରେ ସେ ରିପୋର୍ଟ ବଦଳାଇଥିବା ଜେରା ସମୟରେ ସ୍ବୀକାର କରିଛନ୍ତି ଶ୍ରୀହରି ହଲନୋର ।
