କୋଟିଏ ଟଙ୍କାର ବଟି ମାଗିବା ଘଟଣାରେ ବନ୍ଧା ହେଲେ ୨ ଲେଡି ଡନ

ଭୁବନେଶ୍ବର: ୧୦ କୋଟିର ଜମି ପାଇଁ କୋଟିଏ ଟଙ୍କାର ବଟି ମାଗିବା ଘଟଣାରେ ଭଙ୍ଗାରୁଜା କରିଥିବା ୨ ଜଣ ଲେଡି ଡନଙ୍କୁ ବାନ୍ଧି କୋର୍ଟ ଚାଲାଣ କରିଛି ନୟାପଲ୍ଲୀ ଥାନା ପୋଲିସ । ଗିରଫ ଦୁଇ ଲେଡି ଡନଙ୍କ ଘର ଲକ୍ଷ୍ମୀସାଗର ଅଞ୍ଚଳରେ ବୋଲି ଜଣାପଡିଛି । ତେବେ ଏହି ମାମଲାରେ ଗତକାଲି ୭ ଜଣ ଜମି ପୋଜେସନ ମାଫିଆଙ୍କୁ ବାନ୍ଧିଥିଲା ନୟାପଲ୍ଲୀ ପୋଲିସ ।

ପ୍ରେସିଡେନ୍ସି ହୋଟେଲ ପଛରେ ଏକ ବିବାଦୀୟ ଜମିକୁ ଏମାନେ ପୋଜେସନ ନେଉଥିଲେ । ପୋଜେସନ ନେବା ପାଇଁ ଲକ୍ଷାଧିକ ଟଙ୍କାର ଆସବାବପତ୍ର ଭଙ୍ଗାରୁଜା କରିଥିବା ଅଭିଯୋଗ ହୋଇଥିଲା । ୨୫ ତାରିଖରେ ଏ ନେଇ ନୟାପଲ୍ଲୀ ଥାନାରେ ଏତଲା ହୋଇଥିଲା । ଗିରଫ ଅଭିଯୁକ୍ତମାନେ ହେଲେ ନକୁଳ ମହାକୁଡ଼, ଆଶିଷ ଜେନା, ଦୀପକ ଦାସ, ଲକ୍ଷ୍ମୀକାନ୍ତ ଦାସ, ରାଜେଶ କୁମାର ପାତ୍ର, ପ୍ରଦୀପ ବଳିଆର ସିଂ ଓ ଆଶିଷ ରାୟ ।

ନକୁଳ ମହାକୁଡ଼ ନାଁ ରେ ପୂର୍ବରୁ NSA ଲାଗିଥିଲା । ମାଷ୍ଟରମାଇଣ୍ଡ ଝାରପଡାର ରାଘବ ଜେନା ଏବେ ବି ଫେରାର ଅଛି । ରାଘବ ଓ କୋ’ ମହିଳାଙ୍କୁ ଢାଲ କରି ଜମି ପୋଜେସନ ଗ୍ୟାଙ୍ଗ ଚଳାଇଥିଲେ ।