କଟକରେ ଚାଲିଥିଲା ନକଲି ଆକ୍ୱାଗାର୍ଡ ତିଆରି ଓ ବିକ୍ରି

କଟକ: କଟକରେ ନକଲି ଆକ୍ୱାଗାର୍ଡ ତିଆରି ଓ ବିକ୍ରି ଅଭିଯୋଗରେ ବାଦାମବାଡି ଥାନା ପୋଲିସର ଚଢ଼ାଉ । ବାଦାମବାଡି ଜଗନ୍ନାଥ ଲେନରେ କମିଶନରେଟ ପୋଲିସ ଓ ସ୍ବତନ୍ତ୍ର ସ୍କ୍ବାର୍ଡ ଚଢ଼ାଉ କରି ନକଲି ଆକ୍ୱାଗାର୍ଡ ଓ ଯନ୍ତ୍ରାଂଶ ଜବତ କରିଛନ୍ତି । ଘଟଣାରେ ୨ ଜଣ ଗିରଫ ।

ବିଭିନ୍ନ କମ୍ପାନୀର ନକଲି ଲୋଗୋ ଲଗାଇ ଚାଲିଥିଲା ବେପାର । ଗୋଦାମରୁ ବିଭିନ୍ନ ନାମୀଦାମୀ କମ୍ପାନୀର ଲୋଗୋ ସହିତ ଅନ୍ୟାନ୍ୟ ସାମଗ୍ରୀ ଜବତ କରାଯାଇଛି । ଲକ୍ଷାଧିକ ଟଙ୍କାର ସାମଗ୍ରୀ ଜବତ ହୋଇଛି । କିଏ କିଏ ଏଥିରେ ସଂପୃକ୍ତ ? କେଉଁଠାକୁ ଏଠାରୁ ନକଲି ଆକ୍ବାଗାର୍ଡ ପଠାଯାଉଥିଲା ? ସେ ନେଇ ଜାରି ରହିଛି ଖୋଳତାଡ଼ । ପୂର୍ବରୁ କଟକରୁ ବିଭିନ୍ନ ନକଲି ସାମଗ୍ରୀ ଜବତ ହୋଇଛି । ମସଲା, ଘିଅ, ସର୍ଫ, ସସ୍ ଆଦି ନକଲି କାରଖାନାରେ ରେଡ୍ କରି ବିପୁଳ ପରିମାଣର ଭେଜାଲ ସାମଗ୍ରୀ ଜବତ କରିଥିଲା ପୋଲିସ ।

ସେହିପରି ବରଗଡ଼ରୁ ନକଲି ଟିଭି  ଓ ଯନ୍ତ୍ରଶା ବିକ୍ରି ଅଭିଯୋଗରେ ଦୁଇଜଣ ଗିରଫ ହୋଇଛନ୍ତି । ବ୍ରାଣ୍ଡ ନାଁରେ ଉଚ୍ଚ ମୂଲ୍ୟରେ ନକଲି ଟିଭି, ଏଲସିଡି ବିକ୍ରି କରୁଥିଲେ ଠକ ଗ୍ୟାଙ୍ଗ । ବହୁ ନକଲି ଟିଭି ଏଲ.ସି.ଡି, ୧୧ଟି ଟେଲିଭିଜନ ସେଟ୍, 3୮ଟି ସୋନି 4k ର LED ଟିଭିର ଅଲ୍ଟ୍ରା HD ସ୍ମାର୍ଟ ଷ୍ଟିକର, କଳା ରଙ୍ଗର ସୋନି ବ୍ରାଭିଆର ଷ୍ଟିକର, Qr କୋଡ଼ ଓ ସିରିଏଲ ନମ୍ବର ଇତ୍ୟାଦି ବହୁ ସାମଗ୍ରୀ ଏହି ଦୁଇ ଅପରାଧୀଙ୍କ ଠାରୁ ଜବତ କରାଯାଇଛି ।