ଉତ୍ତରପ୍ରଦେଶରେ ନିଶା ଦେଇ ସ୍କୁଲ ଛାତ୍ରୀଙ୍କୁ ଅସଦାଚରଣ
ଲକ୍ଷ୍ଣୌ: ନିଶା ଦେଇ ନିରୀହ ସ୍କୁଲ ଛାତ୍ରୀଙ୍କୁ ଅସଦାରଚଣ । ପ୍ରାକ୍ଟିକାଲ ପରୀକ୍ଷା ପୂର୍ବରୁ ଡାକି, ସେମାନଙ୍କ ସହ ଏଭଳି ଜଙ୍ଘନ୍ୟ କାଣ୍ଡ ଭିଆଇଛନ୍ତି ସ୍କୁଲ କର୍ତ୍ତୃପକ୍ଷ । ଉତ୍ତରପ୍ରଦେଶ ମୁଜାଫରନଗରରୁ ଆସିଛି ଏହି ସାଂଘାତିକ ଅଭିଯୋଗ । ସିବିଏସ୍ଇ ଦଶମ ଶ୍ରେଣୀର ପ୍ରାୟ ୧୭ ଜଣ ଛାତ୍ରୀଙ୍କୁ ସ୍କୁଲକୁ ଡକାଯାଇ ସେମାନଙ୍କୁ ରାତିରେ ରହିବା ଲାଗି ବାଧ୍ୟ କରାଯାଇଥିଲା । ପରେ ସେମାନଙ୍କ ପ୍ରତି ଅଶାଳୀନ ଆଚରଣ ପ୍ରଦର୍ଶନ କରାଯାଇଥିବା ଅଭିଯୋଗ ହୋଇଛି ।
ଜାତୀୟ ଗଣମାଧ୍ୟମ ରିପୋର୍ଟ ମୁତାବକ, ୨ଜଣ ପୀଡ଼ିତାଙ୍କ ପରିବାର ଲୋକଙ୍କ ପକ୍ଷରୁ ଏ ନେଇ ଥାନାରେ ଅଭିଯୋଗ କରିବାକୁ ଯାଇଥିଲେ । କିନ୍ତୁ ପୋଲିସ ସେମାନଙ୍କ ଅଭିଯୋଗ ଶୁଣିନଥିଲା । ଏହା ପରେ ସ୍ଥାନୀୟ ବିଧାୟକଙ୍କୁ ଘଟଣା ସମ୍ପର୍କରେ ଅବଗତ କରାଯାଇଥିଲା । ଏହା ପରେ ବିଧାୟକ ପ୍ରମୋଦ ଉତ୍ଓ୍ୱାଲ ଘଟଣାରେ ହସ୍ତକ୍ଷେପ କରିଥିଲେ । ଏବଂ ଏସ୍ଏସ୍ପିଙ୍କ ସହ ଯୋଗାଯୋଗ କରି ତାଙ୍କୁ ତଦନ୍ତ ପାଇଁ କହିଥିଲେ । ଏହା ପରେ ସ୍କୁଲ ମାଲିକ ଓ ଅନ୍ୟ ଜଣେ ସହାୟକଙ୍କ ନାଁରେ ପୋଲିସ ମାମଲା ରୁଜୁ କରିବା ସହ ସେମାନଙ୍କ ମଧ୍ୟରୁ ଜଣଙ୍କୁ ଗିରଫ କରିଛି । ତେବେ ଅନ୍ୟ ଜଣେ ଅଭିଯୁକ୍ତଙ୍କୁ ମଧ୍ୟ ଖୁବଶୀଘ୍ର ଗିରଫ କରାଯିବ ବୋଲି ଏସ୍ଏସପି ଅଭିଷେକ ଯାଦବ କହିଛନ୍ତି ।
ଅଭିଯୋଗ ଅନୁଯାୟୀ, ପୁର୍କାଜି ଅଞ୍ଚଳରେ ଥିବା ଏକ ସ୍କୁଲର କିଛି ଛାତ୍ରୀଙ୍କୁ ସିବିଏସଇ ପ୍ରାକ୍ଟିକାଲ ପରୀକ୍ଷା ଲାଗି ସ୍କୁଲ କର୍ତ୍ତୃପକ୍ଷ ଡାକିଥିଲେ ଏବଂ ସ୍କୁଲରେ ରାତିରେ ରହିବା ଲାଗି ନିର୍ଦ୍ଦେଶ ଦେଇଥିଲେ । ସେମାନଙ୍କୁ ଖାଦ୍ୟରେ ନିଶା ମିଶାଇ ଅଚେତ କରିବା ପରେ ସ୍କୁଲ କର୍ତ୍ତୃପକ୍ଷ ସେମାନଙ୍କ ପ୍ରତି ଅଶାଳୀନ ଆଚରଣ ପ୍ରଦର୍ଶନ କରିଥିଲେ । ପରଦିନ ସେମାନେ ଘରକୁ ଫେରିଥିଲେ । ଏହି ଘଟଣା କାହାକୁ ନଜଣାଇବା ଲାଗି ସେମାନଙ୍କୁ ଧମକ ଦିଆଯାଇଥିଲା । ଏହି ଛାତ୍ରୀମାନେ ଅତି ଗରିବ ପରିବାରର ବୋଲି ଜଣାପଡିଛି ।
ଏଥିସହିତ ପଢ଼ନ୍ତୁ: ଲୋକସଭାରେ ମୃତ ଚାଷୀଙ୍କ ତାଲିକା ଦେଲେ ରାହୁଲ
