୧୧ ମାସର ଶିଶୁ ପାଇଁ ୧୭ କୋଟିର ଇଞ୍ଜେକ୍ସନ୍

ନୋଏଡା: ଜୀବନ ମୃତ୍ୟୁ ସହ ଲଢୁଛି  ୧୧ ମାସର କଅଁଳ ଶିଶୁ । ଏଯାଏଁ ପାଟି ଫିଟିନି, ଦୁନିଆ କ’ଣ ଭଲସେ ଜାଣିନି। କିନ୍ତୁ ଇଶ୍ବରଙ୍କ ନିଷ୍ଠୁର ନ୍ୟାୟର ସେ ଭାଗିଦାରୀ । କୁନି ପାଦରେ ଚାଲିବା ଶିଖିବ କ’ଣ ବିଛଣା ସାଜିଛି ତାର ସାଥୀ। କଅଁଳ ବୟସରେ ମାଡି ବସିଛି ବିରଳ ରୋଗ । ଯନ୍ତ୍ରଣାରେ ବିତୁଛି ନିଷ୍ପାପ ଶିଶୁର ଜୀବନ ।

ଏଭଳି ଏକ ହୃଦୟ ବିଦାରକ ଦୃଶ୍ୟ ଦେଖିବାକୁ ମିଳିଛି ଉତ୍ତରପ୍ରଦେଶର ନୋଏଡାଠାରେ। ଭାବିଲେ ଟିକେ ଦେଖି, ବାପା ମାଙ୍କ ହୃଦୟ କ’ଣ ହେଉଥିବ ଯେତେବେଳେ ସେ କଅଁଳ ପିଲାଟିକୁ କଷ୍ଟ ପାଉଥିବାର ଦେଖୁଥିବେ। ପୁଅକୁ ବଞ୍ଚାଇବା ପାଇଁ ବାପା ମା ଅନେକ ଡାକ୍ତରଙ୍କ ପାଖରେ ଚିକିତ୍ସା କରି ନିରାସ ହୋଇଛନ୍ତି । ଡାକ୍ତରଙ୍କ କହିବା ଅନୁଯାୟୀ, ପୁଅକୁ ବଞ୍ଚାଇବାକୁ ହେଲେ ୧୭ କୋଟିରୁ ଉର୍ଦ୍ଧ୍ୱ ଟଙ୍କା ଖର୍ଚ୍ଚ ହେବ । ଗୋଟିଏ ଇଞ୍ଜେକ୍ସନ୍ ଦେବାକୁ ପଡିବ ଯାହାର ମୂଲ୍ୟ ରହିଛି ୧୭କୋଟି ଟଙ୍କା । ହେଲେ ଯାହା ଅର୍ଥ ଥିଲା ସେ ସବୁ ଶିଶୁର ଚିକିତ୍ସାରେ ଲାଗିସାରିଛି। ବର୍ତ୍ତମାନ ଚିକିତ୍ସାରେ ଅର୍ଥ ସାଜିଛି ବାଧକ। କଅଁଳ ଶିଶୁର ଜୀବନ ବଞ୍ଚାଇବାକୁ ଦେଶବାସୀଙ୍କୁ ସହୟତା ଲୋଡିଛନ୍ତି ବାପା ମା।

ଶିଶୁଟି ଏମିତି ଏକ ବିରଳ ରୋଗରେ ଆକ୍ରାନ୍ତ ହୋଇଛି, ଫଳରେ ମାଂସ ପେଶୀ ଦୁର୍ବଳ ହେବା ସହ ନିଶ୍ୱାସ ପ୍ରଶ୍ୱାସ ନେବାରେ ଅସୁବିଧା ହେଉଛି । ଆୟକର ବିଭାଗର ଟ୍ୟାକ୍ସ ଆସିଷ୍ଟାଣ୍ଡ ଭାବରେ ଚାକିରୀ କରୁଥିବା ଅମିତଙ୍କ ୧୧ ମାସ ପୁତ୍ର କନଭ୍ ଗମ୍ଭୀର ରୋଗ ସ୍ପାଇନଲ ମସ୍କ୍ୟୁଲର ଏଟ୍ରୋଫି-୧ରେ ପୀଡିତ । ପୁଅର ଜୀବନ ବଞ୍ଚାଇବାକୁ ହେଲେ ୧୭.୫୦ କୋଟି ଟଙ୍କାର ଇଞ୍ଜେକ୍ସନ ଦବା ନିହାତି ଜରୁରୀ । ଏଥିଲାଗି ବାପା ମା ଟଙ୍କା ଜମା କରିବାକୁ ଲାଗିପଡିଛନ୍ତି । ଏତେ ଟଙ୍କା ଏକାଠି କରିବା ଅସମ୍ଭବ ହୋଇପଡିଥିବା ଯୋଗୁଁ ଦେଶବାସୀଙ୍କୁ ପୁଅର ଜୀବନ ଭିକ୍ଷା କରି ସହାର୍ଯ୍ୟ କରିବା ପାଇଁ ଅନୁରୋଧ କରିଛନ୍ତି । ପୁଅର ଚିକିତ୍ସା ଲାଗି ଏତେ ସଂଖ୍ୟକ ଅର୍ଥ କେଉଁଠୁ ଆଣିବେ ପିତା-ମାତା?

ପରିବାରର ଏଭଳି ଅସମୟରେ ସାହାଯ୍ୟରେ ହାତ ବଢାଇଛନ୍ତି କିଛି ବଦାନ୍ୟ ବ୍ୟକ୍ତି। ଅନେକ ଲୋକ ମଧ୍ୟ ସାହାଯ୍ୟ ନିମନ୍ତେ ସୋସିଆଲ ମିଡିଆରେ ଅନୁରୋଧ କରିଛନ୍ତି । ଯଦି କେହି ସହୃଦୟ ବ୍ୟକ୍ତି ଏହି କଅଁଳ ଶିଶୁଟିକୁ ନୂଆ ଜୀବନ ଦେବାକୁ ଚାହୁଁଛନ୍ତି, ସେମାନେ ତାଙ୍କର ବ୍ୟାଙ୍କ ଆକାଉଣ୍ଟ ଜରିଆରେ ସାହାଯ୍ୟ କରିପାରିବେ ।

Bank Name : RBL , Bank Account number : 2223330078969258, IFSC code : RATN0VAAPIS