ବିଜେପି କର୍ମୀଙ୍କ ଆକ୍ରମଣରେ ୧୪ ପୋଲିସ ଆହାତ, ରଣକ୍ଷେତ୍ର ପାଲଟିଲା ଲୋୟର ପିଏମଜି

ଭୁବନେଶ୍ୱର: ନ୍ୟାୟ ପାଇଁ ଦାବି ନା ଦାଦାଗିରି । ବିଜେପି ଯୁବ ମୋର୍ଚ୍ଚାର ଆତଙ୍କରାଜ ଯୋଗୁଁ ଲୋୟର ପିଏମଜିରେ ଖଣ୍ଡଯୁଦ୍ଧ । ବିଧାନସଭା ଘେରାଉ ପାଇଁ ରାଜଧାନୀରେ ଏକାଠି ହୋଇଥିଲେ ବିଜେପି କର୍ମୀ । ଶାନ୍ତିପୂର୍ଣ୍ଣ ଆନ୍ଦୋଳନ ବଦଳରେ ବିଶୃଙ୍ଖଳିତ କର୍ମୀଙ୍କ ଅରାଜକତା ଓ ଟେକା ପଥର ମାଡ଼ ଯୋଗୁଁ ୧୪ ପୋଲିସ କର୍ମୀ ଆହତ ହୋଇଛନ୍ତି । ଆହତଙ୍କ ମଧ୍ୟରେ ୩ ଆଇଆଇସି, ଜଣେ ଏସିପି ଥିବା ବେଳେ ଦୁଇ ପୋଲିସ କର୍ମୀ ଗୁରୁତର ଅଛନ୍ତି । ବିଜେପି କର୍ମୀଙ୍କ ଦାଦାଗିରି ଯୋଗୁଁ ସାଧାରଣ ଲୋକେ ଆହାତ ହେବା ସହ ଗଣମାଧ୍ୟମର ୪ ପ୍ରତିନିଧି ବି ବିଜେପି ଗୁଣ୍ଡାଗିରିର ଶିକାର ହୋଇଛନ୍ତି ।

ବିଜେପି ଯୁବ ମୋର୍ଚ୍ଚା ପକ୍ଷରୁ ଆଜି ବିଧାନସଭା ଘେରାଉ ଡାକରା ଦିଆଯାଇଥିଲା । ଦଳୀୟ ରାଜ୍ୟ କାର୍ଯ୍ୟାଳୟରୁ ବାହାରିଥିଲା ଶୋଭାଯାତ୍ରା । ରାଲିରେ ସାମିଲ ଥିଲେ ଦଳୀୟ ବିଧାୟକ ଓ ବରିଷ୍ଠ ନେତୃବୃନ୍ଦ । ବିଧାନସଭା ଘେରାଉ ପାଇଁ ମାଷ୍ଟରକ୍ୟାଣ୍ଟିନ ଦେଇ ଲୋୟର ପିଏମଜି ଆଡ଼େ ମାଡ଼ି ଯାଇଥିଲେ ଶହ ଶହ ବିଜେପି ଯୁବ ଓ ମହିଳା କର୍ମୀ । ପୋଲିସ କର୍ଡ଼ନ ଭାଙ୍ଗିବାକୁ ଭରପୂର ଉଦ୍ୟମ କରିଥିଲେ । ହେଲେ ସୁରକ୍ଷା କର୍ମୀଙ୍କ ଉପସ୍ଥିତି ବୁଦ୍ଧି ଯୋଗୁଁ ଏହା ସମ୍ଭବ ହୋଇନଥିଲା । ସବୁ ଜାଗାରେ ବିଜେପିର ଉଦ୍ୟମକୁ ପ୍ରତିରୋଧ କରିଥିଲେ ପୋଲିସ କର୍ମୀ । ଯୋଜନା ଫଳପ୍ରଦ ନ ହେବା ପରେ ଉତକ୍ଷିପ୍ତ ହୋଇ ଗୁଣ୍ଡାଗିରି ଆରମ୍ଭ କରିଥିଲେ ବିଜେପି ଯୁବ ମୋର୍ଚ୍ଚା ।

ପୋଲିସକୁ ସବୁଆଡ଼ୁ ଟେକା ପଥର ମାଡ଼ କରିଥିଲେ । ବିଶୃଙ୍ଖଳିତ ବିଜେପି କର୍ମୀଙ୍କୁ ପୋଲିସ ଲୋୟର ପିଏମଜିରୁ ମାଷ୍ଟର କ୍ୟାଣ୍ଟିନ ପର୍ଯ୍ୟନ୍ତ ଘଉଡ଼ାଇଥିଲା । ହେଲେ ରାସ୍ତାର ଦୁଇ କଡ଼ରେ ଲୁଚି ରହିଥିବା ବିଜେପିର ଉଶୃଙ୍ଖଳ କର୍ମୀ ପୋଲିସ ଗାଡ଼ି ଉପରେ ରାଗ ଶୁଝାଇଥିଲେ । ବିଜେପି ଯୁବ ମୋର୍ଚ୍ଚାର ଟେକା ମାଡ଼ରେ ୭ଟି ପୋଲିସ ଗାଡ଼ି ଭାଙ୍ଗି ଯାଇଛି । ବିଜେପି କର୍ମୀଙ୍କ ଅରାଜକତା ଯୋଗୁଁ ରାସ୍ତାରେ ଯାଉଥିବା ସାଧାରଣ ଲୋକ ବି ଆହାତ ହୋଇଛନ୍ତି । ଡାକ୍ତରଖାନାକୁ ରୋଗୀ ନେଇ ଯାଉଥିବା ଆଉ କିଛି ଲୋକ ବି ବିଜେପିର ଆନ୍ଦୋଳନ ଯୋଗୁଁ ଅନେକ ହଇରାଣ ହୋଇଛନ୍ତି ।