ଧୂଳିଝଡ଼ରେ ଭାଙ୍ଗିଲା ବିଜ୍ଞାପନ ହୋର୍ଡିଂ; ୧୪ ମୃତ ଓ ୭୪ ଆହତ

ମୁମ୍ବାଇ : ମୁମ୍ବାଇରେ ଧୂଳିଧଡ଼ରେ ଭାଙ୍ଗିଲା ବିଜ୍ଞାପନ ହୋର୍ଡିଂ। ହୋର୍ଡିଂ ପଡି ୧୪ ଜଣଙ୍କ ମୃତ୍ଯୁ ହୋଇଥିବା ଜଣାପଡିଛି। ମୁମ୍ବାଇ ପୂର୍ବ ଘାଟକୋପର ଅଂଚଳରେ ଘଟିଥିଲା ଏହି ଅଘଟଣ । ସୋମବାର ମୁମ୍ବାଇରେ ଅପରାହ୍ନରେ ପ୍ରବଳ ଧୂଳିଝଡ଼ ଦେଖାଦେଇଥିଲା। ପ୍ରବଳ ଧୂଳି ସହ ପବନରେ ଭାଙ୍ଗି ପଡ଼ିଥିଲା ଏହି ହୋର୍ଡିଂ। ସେତେବେଳେ ଏହି ହୋର୍ଡିଂ ନିକଟରେ ପ୍ରାୟ ୮୦ରୁ ଅଧିକ ଲୋକ ଥିଲେ। ଲୁହାରେ ନିର୍ମିତ ହୋର୍ଡିଂ ପଡିଯିବାରୁ ୧୪ ଜଣଙ୍କ ମୃତ୍ଯୁ ହୋଇଥିବାବେଳେ ୭୪ ଜଣ ଆହତ ହୋଇଛନ୍ତି।

ଏକ ପେଟ୍ରୋଲ ପମ୍ପ ସାମନାରେ ଏହି ହୋର୍ଡିଂ ଲାଗିଥିଲା। ଅପରାହ୍ନ ସାଢେ ୪ଟା ସମୟରେ ଘଟିଥିଲା ଏ ଦୁର୍ଘଟଣ।  ଦୁର୍ଘଟଣାର ଖବର ପାଇ ତୁରନ୍ତ ସେଠାରେ ପହଞ୍ଚିଥିଲେ ଉଦ୍ଧାରକାରୀ ଦଳ। ଭୟଙ୍କର ଝଡ଼ ତୋଫାନରେ ଘାଟକୋପର, ବାନ୍ଦ୍ରା, କୁର୍ଲା ଓ ଧାରାବୀ ସବୁଠାରୁ ଅଧିକ ପ୍ରଭାବିତ ହୋଇଛି। ବିଭିନ୍ନ ସ୍ଥାନରେ ଗଛ ଉପୁଡି ପଡ଼ିବାରୁ ଯାତାୟତ ବାଧାପ୍ରାପ୍ତ ହୋଇଥିଲା। ହୋର୍ଡିଂ ଭାଙ୍ଗି ପଡ଼ିବାରୁ ଏହା ତଳେ ବହୁ ଲୋକ ଚାପି ହୋଇ ରହିଥିଲେ। ଏନଡିଆରଏଫ ଓ ଅଗ୍ନିଶମ ବାହିନୀ ପକ୍ଷରୁ ରେସକ୍ୟୁ ଅପରେସନ କରାଯାଇଥିଲା। ଏହି ଘଟଣାରେ ପେଟ୍ରୋଲ ପମ୍ପ ମାଲିକଙ୍କ ନାଁରେ ଥାନାରେ ମାମଲା ରୁଜୁ ହୋଇଛି। ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି ମହାରାଷ୍ଟ୍ର ସରକାର। ମୃତକଙ୍କ ପରିବାରକୁ ୫ ଲକ୍ଷ ଟଙ୍କାର ଅନୁକମ୍ପା ରାଶି ଘୋଷଣା କରାଯାଇଛି।