ବିଜୟ ଉତ୍ସବ ନାଁରେ ପାକିସ୍ତାନୀଙ୍କ ପାଗଳାମୀ, ରାସ୍ତାରେ କଲେ ଫାଙ୍କା ଗୁଳିଚାଳନା, ୧୨ ଆହତ

କରାଚି: ଟି-୨୦ ବିଶ୍ଵ କପ୍‌ ଇତିହାସରେ ପାକିସ୍ତାନ ଭାରତ ବିପକ୍ଷରେ ନିଜର ପ୍ରଥମ ବିଜୟ ହାସଲ ପରେ  ଖୁସିରେ ପାଗଳ ହୋଇ ଯାଇଛନ୍ତି ପାକିସ୍ତାନୀ ଫ୍ୟାନ୍ସ । କେବଳ ସେତିକି ନୁହେଁ ବିଜୟ ଉତ୍ସବ ନାଁରେ ରବିବାର ରାତିରେ ଇସଲାମାବାଦ, କରାଚି, ରାୱଲପିଣ୍ଡି ଏବଂ କ୍ୱେଟା ଭଳି ବଡ ସହରରେ ହଜାର ହଜାର ଲୋକ ରାସ୍ତାକୁ ଓହ୍ଲାଇଥିଲେ । ଏହି ସମୟରେ ବହୁ ସଂଖ୍ୟାରେ ଲୋକେ ଫାଙ୍କା ଗୁଳି ଚାଳନା କରି ବିଜୟ ଉତ୍ସବ ମନାଇଛନ୍ତି। କେବଳ କରାଚି ସହରରେ ଭିନ୍ନ ଭିନ୍ନ ସ୍ଥାନରେ ହୋଇଥିବା ଫାଙ୍କା ଗୁଳିଚାଳନାରେ ଅତି କମରେ ୧୨ ଜଣଙ୍କ ଦେହରେ ଗୁଳି ବାଜିଥିବା ସୂଚନା ମିଳିଛି । ସଭିଙ୍କୁ ଚିକିତ୍ସା ପାଇଁ ଡାକ୍ତରଖାନାରେ ଭର୍ତ୍ତି କରାଯାଇଛି।

କରାଚି ପୋଲିସ ଅନୁଯାୟୀ, ରବିବାର ରାତିରେ ଉତ୍ସବ ପାଳନ ବେଳେ ସହରର ଭିନ୍ନ ଭିନ୍ନ ଅଞ୍ଚଳରେ ଆଖିବୁଜା ଗୁଳିଚାଳନା କରାଯାଇଛି । ଏହି ସମୟରେ ଅଜଣା ଲୋକଙ୍କ ଫାୟରିଂରେ ଜଣେ ସବ ଇନ୍ସପେକ୍ଟର ସହିତ ୧୨ ଜଣ ଆହତ ହୋଇଛନ୍ତି । ଲୋକେ ରାସ୍ତା ଉପରେ ଖୁବ୍ ନାଚିବା ସହ ଆତସବାଜି କରିଛନ୍ତି।

ପାକିସ୍ତାନର ପ୍ରଧାନମନ୍ତ୍ରୀ ଇମ୍ରାନ ଖାନ ଟି-୨୦ ବିଶ୍ଵ କପ୍‌ରେ ଦଳର ବିଜୟରେ ଅଭିନନ୍ଦନ ଜଣାଇଛନ୍ତି। ସେ ଟ୍ଵିଟ୍ କରି ଲେଖିଛନ୍ତି, ପାକିସ୍ତାନୀ ଦଳକୁ ଅଭିନନ୍ଦନ, ବିଶେଷ କରି ବାବର ଆଜମଙ୍କୁ ଯିଏ ପୂରା ସାହାସର ସହ ଦଳର ନେତୃତ୍ଵ ନେଲେ ଏବଂ ରିଜଓ୍ଵାନ ଓ ଶାହିନ ଶାହ ଆଫ୍ରିଦି ଦମଦାର ପ୍ରଦର୍ଶନ କରି ଦଳକୁ ଜିତାଇଲେ।