ସୋସିଆଲ୍ ମିଡିଆରୁ ଶିଖିଲା ହ୍ୟାକିଂ, ବାପାଙ୍କୁ ମାଗିଲା ୧୦ କୋଟି ଟଙ୍କା
ଗାଜିଆବାଦ: ଉତ୍ତରପ୍ରଦେଶର ଗାଜିଆବାଦ ଜିଲ୍ଲାର ଜଣେ ୫ମ ଶ୍ରେଣୀର ନାବାଳକ ଏଭଳି କାରନାମା କରି ଦେଖାଇଛି ଯାହା ଶୁଣିଲେ ଆଶ୍ଚର୍ଯ୍ୟ ଲାଗିବ । ଏହି ୧୧ ବର୍ଷୀୟ ପିଲାଟି ୟୁଟ୍ୟୁବରୁ ହ୍ୟାକିଂ ଶିଖିବା ସହ ନିଜ ବାପାଙ୍କ ଇମେଲ୍ ଆଇଡି ହ୍ୟାକ୍ କରିବାକୁ ପଛାଇ ନାହିଁ। ଏମିତିକି ସେ ୧୦ କୋଟି ଟଙ୍କା ଦାବି କରିଛି ।
ଏହି ଘଟଣାରେ ପୋଲିସ ତଦନ୍ତରୁ ଯାହା ସୁରାକ୍ ମିଳିଲା ତାହା ସମସ୍ତଙ୍କୁ ଚକିତ କରିଦେବା ଭଳି । ଜାଣନ୍ତୁ ସମ୍ପୂର୍ଣ୍ଣ ପୂରା ଘଟଣା…
ଗାଜିଆବାଦର ବସୁନ୍ଧରା କଲୋନୀରେ ଜଣେ ବ୍ୟକ୍ତିଙ୍କୁ ପ୍ରାୟ ୧ ସପ୍ତାହ ପୂର୍ବରୁ ଧମକ ଭରା ଇମେଲ୍ ଆସିଥିଲା । ଯେଉଁଥିରେ ୧୦ କୋଟି ଟଙ୍କା ଦେବା ପାଇଁ କୁହାଯାଇଥିଲା । ଟଙ୍କା ନଦେଲେ ତାଙ୍କର ଅଶ୍ଲୀଳ ଫଟୋ ସୋସିଆଲ୍ ମିଡିଆରେ ଭାଇରାଲ୍ କରିବାକୁ ଧମକ ଦିଆଯାଇଥିଲା । ଏହାବ୍ୟତିତ ତାଙ୍କୁ ଓ ତାଙ୍କ ପରିବାର ବର୍ଗଙ୍କୁ ମଧ୍ୟ ଜୀବନରୁ ମାରିବା ପାଇଁ ଧମକ ମିଳିଥିଲା ।
ଯାହା ପରେ ଇମେଲ୍ ଆଇଡି ହ୍ୟାକ୍ ଏବଂ ତାଙ୍କ ଇମେଲ୍ ପାସଓ୍ୱାଡ୍ ବଦଳା ଯାଇଥିବା ନେଇ ସମ୍ପୃକ୍ତ ବ୍ୟକ୍ତି ଜଣକ ପୋଲିସରେ ଜଣାଇଥିଲେ । ଅଭିଯୋଗ ପରେ ପୋଲିସର ସାଇବର ସେଲ୍ ଯାଞ୍ଚ ଆରମ୍ଭ କରିଥିଲା । ହେଲେ ଇମେଲ୍ ପଠାଇଥିବା ଲୋକର ଆଇପି ଆଡ୍ରେସ୍ ଖୋଜିବା ବେଳେ ତାହା ସମ୍ପୃକ୍ତ ବ୍ୟକ୍ତିଙ୍କର ଘରର ଠିକଣାରୁ ଆସିଥିବା ଜଣାପଡିଥିଲା ।
ଏହା ପରେ ପୋଲିସ ସମ୍ପୃକ୍ତ ବ୍ୟକ୍ତିଙ୍କ ୧୧ ବର୍ଷୀୟ ପୁଅକୁ ପଚରାଉଚରା କରିବା ପରେ ସେ ସବୁ ସତକଥା ମାନି ଯାଇଥିଲା । ହେଲେ ଏତେ କମ୍ ବୟସର ପିଲାଟି କିଭଳି ହ୍ୟାକିଂ ଶିଖିଲା ସେନେଇ ପୋଲିସ ଖୋଳତାଡ କରୁଛି ।
ପୋଲିସର ସୂଚନା ଅନୁଯାୟୀ ଏହି ପିଲାଟିକୁ କିଛି ଦିନ ତଳେ କମ୍ପ୍ୟୁଟର ଅନଲାଇନ୍ କ୍ଲାସରେ ସାଇବର କ୍ରାଇମ୍ ସମ୍ପର୍କରେ ପଢାଯାଇଥିଲା । ଏଥିସହିତ ସାଇବର କ୍ରାଇମରୁ କିଭଳି ବର୍ତ୍ତି ପାରିବେ ସେନେଇ ମଧ୍ୟ କ୍ଲାସରେ ପଢାଯାଇଥିଲା ।
