ଖୁବଶୀଘ୍ର ନିଯୁକ୍ତ ହେବେ ଆଉ ୧୦ ହଜାର କନିଷ୍ଠ ଶିକ୍ଷକ

ଭୁବନେଶ୍ବର: ପ୍ରାଥମିକ ଶିକ୍ଷାର ହେଉଛି ନବକଳେବର । ରାଜ୍ଯର କୌଣସି ସ୍କୁଲରେ ରହିବନି ଶିକ୍ଷକ ଅଭାବ । ଖୁବଶୀଘ୍ର ନିଯୁକ୍ତ ହେବେ ଆଉ ୧୦ ହଜାର କନିଷ୍ଠ ଶିକ୍ଷକ । ଏହି ନିଯୁକ୍ତି ଫଳରେ ରାଜ୍ଯରେ ସମସ୍ତ ପ୍ରାଥମିକ ଓ ଉଚ୍ଚ ପ୍ରାଥମିକ ବିଦ୍ଯାଳୟରେ ଶିକ୍ଷକ ପଦବୀ ପୂରଣ ହେବ । ଏବେ ଚାଲୁରହିଥିବା କନିଷ୍ଠ ଶିକ୍ଷକ ନିଯୁକ୍ତି ପ୍ରକ୍ରିୟା ଶେଷ ହେବାପରେ ନୂତନ ନିଯୁକ୍ତି ପ୍ରକ୍ରିୟା ଆରମ୍ଭ ହେବ । ଏନେଇ ଗଣଶିକ୍ଷା ବିଭାଗ ତରଫରୁ ସୂଚନା ଦିଆଯାଇଛି ।

ପୂର୍ବରୁ ୨୦ ହଜାର କନିଷ୍ଠ ଶିକ୍ଷକଙ୍କ ନିୟୋଜନ ପ୍ରକ୍ରିୟା ଏବେ ଜାରି ରହିଛି । ଏହି ପ୍ରକ୍ରିୟା ଶେଷହେବାପରେ ଯଥାଶୀଘ୍ର ନୂତନ ନିଯୁକ୍ତି ଆରମ୍ଭ ହେବ । ନିଯୁକ୍ତି ପ୍ରକ୍ରିୟାକୁ ସ୍ବଚ୍ଛ ଓ ପାରଦର୍ଶୀ କରିବାକୁ ସମସ୍ତ ପ୍ରକାର ପଦକ୍ଷେପ ନିଆଯାଇଛି । ଶିକ୍ଷା ବ୍ଯବସ୍ଥାକୁ ଫାଇଭ-ଟି ଉପକ୍ରମରେ ରୂପାନ୍ତରଣ କରି ପିଲାଙ୍କ ଭବିଷ୍ଯତକୁ ଉଜ୍ବଳ କରୁଛନ୍ତି ରାଜ୍ଯ ସରକାର । ଏହି କ୍ରମରେ ସବୁ ସ୍କୁଲରେ ଶିକ୍ଷକ ପଦ ପୂରଣ କରାଯାଇ ପ୍ରାଥମିକ ଶିକ୍ଷାକୁ ସୁଦୃଢ କରାଯାଉଛି । ଯାହାକୁ ନେଇ ପିଲା ଓ ଅଭିଭାବକ ଏବଂ ଚାକିରି ଆଶାୟୀ ମାନେ ଖୁସି ପ୍ରକାଶ କରିଛନ୍ତି ।