ଆଣ୍ଡାମାନରେ ଲୁପ୍ତ ପ୍ରାୟ ଜନଜାତିର ୨୦ ପ୍ରତିଶତ ଲୋକଙ୍କୁ କିଭଳି ହେଲା କରୋନା?

ନୂଆଦିଲ୍ଲୀ: ଆଣ୍ଡାମାନ ଏବଂ ନିକୋବର ଦ୍ୱୀପପୁଞ୍ଜରେ ରହୁଥିବା ଗ୍ରେଟ ଆଣ୍ଡାମାନି ଜନଜାତିର ୧୦ ଜଣ କରୋନା ପଜିଟିଭ ଚିହ୍ନଟ ହୋଇଛନ୍ତି । ଉକ୍ତ ଦ୍ୱୀପପୁଞ୍ଜରେ ଏହି ଜନଜାତିର ଜନସଂଖ୍ୟା ଖୁବ କମ୍ । ସଂକ୍ରମିତଙ୍କ ମଧ୍ୟରେ ଦୁଇଜଣଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ଅନ୍ୟ ମାନଙ୍କୁ କେୟାର ସେଣ୍ଟରରେ ରଖା ଯାଇଥିବା ଘଟଣା ଗତ ଗୁରୁବାରକୁ ଆନୁଷ୍ଠାନିକ ଭାବରେ ଘୋଷଣା କରାଯାଇଛି ।

ସଂକ୍ରମଣ ପରେ ନିକଟରେ ପୋର୍ଟ ବ୍ଲେୟରରୁ ସ୍ୱାସ୍ଥ୍ୟ ଅଥୋରିଟିର ୫ ଜଣଙ୍କୁ ଆଇଲ୍ୟାଣ୍ଡକୁ ପଠାଯାଇଛି । ସ୍ୱାସ୍ଥ୍ୟ ବିଭାଗର ନୋଡାଲ ଅଫିସର ଅଭିଜିତ ରାୟଙ୍କ କହିବା ଅନୁସାରେ ନିଆଯାଇଥିବା ୩୭ଟି ସ୍ୟାମ୍ପଲ ମଧ୍ୟରୁ ୪ ଜଣ କରୋନା ପଜିଟିଭ ଚିହ୍ନଟ ହୋଇଛନ୍ତି । ଏହା ପୂର୍ବରୁ ଗତ ମାସରେ ୬ ଜଣ କରୋନା ପଜିଟିଭ ଚିହ୍ନଟ ହୋଇଥିଲେ । ଏମାନେ ସହରରେ କାମ କରୁଥିଲେ । ଡାକ୍ତର ରାୟଙ୍କ କହିବା ଅନୁସାରେ ଏହି ଜନଜାତିର ପ୍ରାୟ ଲୋକ ପୋର୍ଟ ବ୍ଲେୟରରୁ ଦ୍ୱୀପ ମଧ୍ୟରେ ଯାତ୍ରା କରନ୍ତି । ଏହି ଯାତ୍ରା ସମୟରେ ଏମାନେ ସଂକ୍ରମିତ ହୋଇଥାଇ ପାରନ୍ତି । କିଛି ସଂକ୍ରମିତଙ୍କୁ ଘରେ ରଖା ଯାଇଥିବାବେଳେ କିଛି ସଂକ୍ରମିତଙ୍କୁ ହସ୍ପିଟାଲରେ ରଖାଯାଇଥିବା ସୂଚନା ଦେଇଛନ୍ତି ଡାକ୍ତର ରାୟ । ଏହି ଜନଜାତିର କେବଳ ୫୦ ଜଣ ଲୋକ ଅଛନ୍ତି । ଯାହା ଦର୍ଶାଉଛି କି ଏହା ଏକ ଲୁପ୍ତ ପ୍ରାୟ ଜନଜାତି ।

ସମଗ୍ର ଦ୍ୱୀପପୁଞ୍ଜରୁ କରୋନା ଭାଇରସର ୩୦୧୮ରୁ ଅଧିକ ମାମଲା ସାମ୍ନାକୁ ଆସିଛି । ଏମାନଙ୍କ ମଧ୍ୟରୁ ୨୩୭୫ ସୁସ୍ଥ ହୋଇ ସାରିଛନ୍ତି । କେନ୍ଦ୍ର ଶାସିତ ରାଜ୍ୟରେ ଏପର୍ଯ୍ୟନ୍ତ କୋଭିଡ-୧୯ରେ ୪୨ ଜଣଙ୍କ ମୃତ୍ୟୁ ହୋଇ ସାରିଛି । ଏହା ସହିତ ୬୦୦ ସକ୍ରିୟ ମାମଲା ରହିଛି । ଏଭଳି ପରିସ୍ଥିତିରେ ଲୁପ୍ତ ପ୍ରାୟ ଜନଜାତି ପାଇଁ ଏହା ଏକ ଚିନ୍ତାର ବିଷୟ ସାଜିଛି ।