୧୦ ଯବାନଙ୍କୁ ମୁକ୍ତ କଲା ଚୀନ: କଥାବାର୍ତ୍ତା ପାଇଁ ଆରମ୍ଭ ହୋଇପାରେ ପ୍ରକ୍ରିୟା
1 min read
ଲଦାଖ: ଭାରତ-ଚୀନ ମଧ୍ୟରେ କଥାବାର୍ତ୍ତା ଆଗକୁ ନେବା ପାଇଁ ପ୍ରକ୍ରିୟା ଆରମ୍ଭ ହୋଇଛି । ଗଲଓ୍ୱାନ ଘାଟିର ପାଟ୍ରୋଲିଂ ପଏଣ୍ଟ ୧୪ ନିକଟରେ ସୋମବାର ଉତ୍ତେଜନା ପ୍ରକାଶ ପାଇଥିଲା । ଯେଉଁଥିରେ ୨୦ ଭାରତୀୟ ଯବାନ ଶହୀଦ ହୋଇଥିବା ବେଳେ ୧୦ ଭାରତୀୟ ଯବାନଙ୍କୁ ନିଜ ବନ୍ଧକ ରଖିଥିଲା ଚୀନ । ଏହାପରଠୁ ସ୍ଥିତି ଅଧିକ ଗମ୍ଭୀର ହୋଇପଡ଼ିଥିଲା ।
ମେଜର ଜେନରାଲ ସ୍ତରରେ କଥାବାର୍ତ୍ତା ପରେ ୧୦ ଭାରତୀୟ ଯବାନଙ୍କୁ ଚୀନ ଗୁରୁବାର ଅର୍ଥାତ ଘଟଣାର ୩ ଦିନ ପରେ ଛାଡ଼ିଦେଇଛି । ବନ୍ଧକ ଥିବା ଯବାନଙ୍କ ମଧ୍ୟରେ ୨ ସେନା ଅଧିକାରୀ ମଧ୍ୟ ସାମିଲ ଅଛନ୍ତି । ହିଂସା ଘଟଣା ପରେ ୨ ଦେଶର ମେଜର ଜେନରାଲ ଲଗାତାର ୩ ଦିନ ଯାଏଁ ବୈଠକ ହୋଇଥିଲା ଏବଂ ବନ୍ଧକ ରଖାଯାଇଥିବା ସୈନିକଙ୍କୁ ମୁକ୍ତ କଲା ଚୀନ ।
ତେବେ କେଉଁ ସର୍ତ୍ତରେ ସେମାନଙ୍କୁ ମୁକ୍ତ କରାଯାଇଛି ସେ ନେଇ କୌଣସି ସୂଚନା ମିଳିନାହିଁ । ୧୦ ଭାରତୀୟ ଯବାନଙ୍କ ଫେରିବା ପରେ ବି ଗଲଓ୍ୱାନ ଘାଟିରେ ସ୍ଥିତି ଅଶାନ୍ତ ରହିଛି । ଗଲଓ୍ୱାନ ଘାଟି ଏବଂ ପେଙ୍ଗଙ୍ଗ୍ ହ୍ରଦ ପାଖରେ ୨ ଦେଶ ପକ୍ଷରୁ ଅତିରିକ୍ତ ସୈନିକଙ୍କୁ ମୁତୟନ କରାଯାଇଛି । ଯେଉଁଠାରେ ୫ ମଇରେ ୨ ଦେଶର ସେନା ମୁହାଁମୁହିଁ ହୋଇଥିଲେ ।
