ନନ୍ଦିଘୋଷ ବ୍ୟୁରୋ : ନ୍ୟାୟ ନମିଳିବା ଯାଏଁ ଚାଲିବ ଆନ୍ଦୋଳନ । ଆଜି ଲୋକସେବା ଭବନ ଘେରାଉ କରିବ ବିଜେଡି । ସୌମ୍ୟାଶ୍ରୀଙ୍କ ମୃତ୍ୟୁକୁ ନେଇ ଗର୍ଜିବ ବିଜେଡି । ସୌମ୍ୟାଶ୍ରୀଙ୍କ ମୃତ୍ୟୁ ଅତ୍ୟନ୍ତ ଦୁଃଖ ଓ କ୍ଷୋଭର କଥା । ସାରା ଦେଶକୁ ଏହା ଆନ୍ଦୋଳିତ କରିଛି । ସେ ୬ ମାସ ହେବ ଗୁହାରୀ କରି ବିଫଳ ହେବା ପରେ ଆତ୍ମାହୁତି ଦେଇଥିଲେ । ମୁଖ୍ୟମନ୍ତ୍ରୀ, ବିଧାୟକ, ସାଂସଦ, ଉଚ୍ଚଶିକ୍ଷା ମନ୍ତ୍ରୀ, କେନ୍ଦ୍ର ମନ୍ତ୍ରୀଙ୍କୁ ଟ୍ୱିଟ କରି ଦୁଃଖ ଜଣାଇଥିଲେ । ସବୁ ସ୍ତରରୁ ନିରାଶ ହେବା ପରେ ସେ ଜୀବନ ହାରିଲେ । ଏଠି ପ୍ରଶ୍ନ ଉଠୁଛି, କର୍ମ କ୍ଷେତ୍ରରେ ଯୌନ ନିର୍ଯାତନା ବିରୋଧୀ ସେଲ କେବଳ ସର୍କୁଲାରରେ ସୀମିତ ରହିଛି । ଫକୀର ମୋହନ କଲେଜରେ କେତେ ଥର ଏହି କମିଟି ବସିଛି ? ଏବେ ସରକାର କହୁଛନ୍ତି ଦଣ୍ଡ ଦେବୁ । ଯେଉଁମାନଙ୍କୁ ସୌମ୍ୟାଶ୍ରୀ ଟ୍ୟାଗ କରି ଜଣାଇଥିଲେ, ସମସ୍ତେ ତଦନ୍ତ ପରିସରଭୁକ୍ତ ହେବା ଦରକାର । ମୁଖ୍ୟମନ୍ତ୍ରୀ, ଉଚ୍ଚଶିକ୍ଷା ମନ୍ତ୍ରୀ ଇସ୍ତଫା ଦିଅନ୍ତୁ ବୋଲି ବିଜେଡି ଦାବି କରିଛି । ଦେଶର ଇତିହାସରେ ଗତ ରାତି ଏକ କଳାରାତି ଥିଲା । ଗଣତନ୍ତ୍ରକୁ କଣ୍ଠରୋଧ କରାଯାଇଥିଲା । ସେଦିନ ସେହି ସମୟରେ କଣ ଅଘଟଣ ହେଲା ଯେ, ସେ ନିଜ ଦେହରେ ପେଟ୍ରୋଲ ଢ଼ାଳିଲେ ? ସେ ପେଟ୍ରୋଲ ତାଙ୍କୁ ଦେଲା କିଏ ? ଆତ୍ମାହୁତି ସମୟର ଭିଡିଓ କିଏ ଉତ୍ତୋଳନ କରୁଥିଲେ ? ପ୍ରିନସିପାଲଙ୍କ ରୁମରେ କିଏ ଉପସ୍ଥିତ ଥିଲେ ? ସମସ୍ତେ ତଦନ୍ତ ପରିସରକୁ ଆସିବା ଦରକାର ବୋଲି ଦାବି କରିଛି ବିଜେଡି । ରାଜ୍ୟରେ ବର୍ତ୍ତମାନ ସ୍ଥିତି ଏପରି ଯେ ଆମେରିକା ରାଷ୍ଟ୍ରପତି ଓଡି଼ଶାକୁ ଅସୁରକ୍ଷିତ କହିଛନ୍ତି । ତେଣୁ ସୌମ୍ୟାଶ୍ରୀ ନ୍ୟାୟ ନ ପାଇଲେ ଆଉ ଝିଅ କଲେଜ ଆସିବେ ନାହିଁ ବୋଲି ବିଜେଡି ଆଶଂକା କରିଛି । ସୌମ୍ୟାଶ୍ରୀଙ୍କ ମୃତ୍ୟୁ ଛୋଟ କଥା ନୁହେଁ । ମୁଖ୍ୟମନ୍ତ୍ରୀ ନୈତିକତା ଦୃଷ୍ଟିରୁ ଇସ୍ତଫା ଦେବା ଦରକାର ବୋଲି କହିଛି ବିଜେଡି ।
