ଯାଜପୁର: ସୁଉଚ୍ଚ ତୋରଣ । ନାଲିନେଳି ଆଲୋକମାଳାରେ ଝଲସୁଛି ରାସ୍ତାଘାଟ । ଯାଜପୁରରେ ଚାଲିଛି ମାଆ କାଳୀଙ୍କ ଆରାଧନା । ସହରର ପ୍ରତ୍ୟେକ ଗଳିକନ୍ଦିରେ ଦେଖିବାକୁ ମିଳୁଛି ପୂଜାର ମାହୋଲ । ଭକ୍ତି ଓ ଉତ୍ସବର ମହାମିଳନରେ ଭିଜୁଛି ବିରଜା କ୍ଷେତ୍ର । ୪୨ରୁ ଉର୍ଦ୍ଧ୍ଵ ମଣ୍ଡପରେ ମା’ କାଳୀଙ୍କ ସହ ଲକ୍ଷ୍ମୀନାରାୟଣଙ୍କ ଆରାଧନା କରାଯାଉଛି । ୧୭ଟି ପେଣ୍ଡାଲରେ ଚାଲିଛି ମାଆଙ୍କ ପୂଜା । ନିଶାର୍ଦ୍ଧ ପୂଜା ସାଙ୍ଗକୁ ଚଣ୍ଡୀପାଠ ଓ ସହସ୍ରନାମ ଯଜ୍ଞରେ ପ୍ରକମ୍ପିତ ହେଉଛି ପୂଜା ମଣ୍ଡପ ।
କିଆନାଳୀ ଛକ, ହରପାର୍ବତୀ ଛକ, ବଡ଼ବଜାର, ଗରିଆପୁର, ନାରାୟଣୀ ଛକ, ହାବେଳି ବଜାର, ଅମ୍ବିକାଇ ଓ ମେଡିକାଲ ଛକ ସମେତ ବିଭିନ୍ନ ସ୍ଥାନରେ ଧୁମଧାମରେ ଚାଲିଛି ପୂଜା । ପ୍ରତ୍ୟେକ ପୂଜା ମଣ୍ଡପକୁ ବିଭିନ୍ନ ଥିମରେ ସଜାଯାଇଛି । ଦର୍ଶକଙ୍କୁ ଆକୃଷ୍ଟ କରୁଛି ମନୋରମ ତୋରଣ ଓ ଆଲୋକସଜ୍ଜା । ଆଗାମୀ ଦିନରେ ବିଭିନ୍ନ ପୂଜା କମିଟି ପକ୍ଷରୁ ଆୟୋଜିତ ହେବ ସାଂସ୍କୃତିକ କାର୍ଯ୍ୟକ୍ରମ । ସେଥିରେ ରାଜ୍ୟ ତଥା ରାଜ୍ୟ ବାହାରର କଳାକାରମାନେ ଯୋଗ ଦେବେ । ଅନ୍ୟପଟେ ପୂଜାକୁ ଶାନ୍ତିଶୃଙ୍ଖଳା ସହ ସାରିବା ପାଇଁ ଡିଜେ ଓ ମଦ କାରବାର ଉପରେ ସଂପୂର୍ଣ୍ଣ ରୋକ ଲଗାଯାଇଛି ।
ଯାଜପୁର ଜିଲ୍ଲାରେ ୧୧୯ ଟି ମଣ୍ଡପରେ ଚାଲିଛି ମାଆଙ୍କ ପୂଜା । ମାଆଙ୍କ ଦର୍ଶନ ପାଇଁ ବିଭିନ୍ନ ମଣ୍ଡପରେ ଲାଗିଛି ଭକ୍ତଙ୍କ ଭିଡ଼ । ଭକ୍ତଙ୍କ ଶୃଙ୍ଖଳିତ ଦର୍ଶନ ପାଇଁ ପୂଜା କମିଟି ଓ ଆୟୋଜକଙ୍କ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି ।
