କୋଚିନ: ମାସିକ ଋତୁସ୍ରାବକୁ ନେଇ କୋଚିନ ୟୁନିଭର୍ସିଟି ଅଫ ସାଇନ୍ସ ଆଣ୍ଡ ଟେକ୍ନୋଲୋଜି ବା ସିୟୁଏସଏଟିର ବଡ଼ ପଦକ୍ଷେପ । ଏଣିକି ମାସିକ ଋତୁସ୍ରାବ ସମୟରେ ଅନୁପସ୍ଥିତି କ୍ଷେତ୍ରରେ ‘ମେନସୁରେସନାଲ ବେନିଫିଟ’ ପାଇଁ ଛାତ୍ରୀଙ୍କୁ ଆବେଦନର ଅନୁମତି ଦେବାକୁ ନିର୍ଦ୍ଦେଶ ଜାରି କରିଛି ଏହି ୟୁନିଭର୍ସିଟି । ପ୍ରତ୍ୟେକ ସେମିଷ୍ଟରରେ ଛାତ୍ରୀମାନଙ୍କୁ ଆବେଦନ ଅନୁମତି ଦେବାକୁ ୟୁନିଭର୍ସିଟି ପକ୍ଷରୁ କୁହାଯାଇଛି ।
ଋତୁସ୍ରାବ ସମୟରେ ଅନୁପସ୍ଥିତିକୁ ନେଇ ‘ଆଟେନାନ୍ସ ସର୍ଟେଜ’ ବିଚାର ନ କରିବା ଲାଗି ଦୀର୍ଘ ଦିନରୁ ୟୁନିଭର୍ସିଟି ଛାତ୍ରୀମାନଙ୍କ ପକ୍ଷରୁ ଦାବି ହୋଇ ଆସୁଥିଲା । ଏହାକୁ ଦୃଷ୍ଟିରେ ରଖି ଛାତ୍ରୀମାନଙ୍କୁ ‘ମେନଷ୍ଟ୍ରେସନ ବେନିଫିଟ’ ଦେବାକୁ ଗତ ଜାନୁଆରୀ ୧୧ରେ ୟୁନିଭର୍ସିଟି ପକ୍ଷରୁ ନିର୍ଦ୍ଦେଶ ଜାରି କରାଯାଇଛି । ଏହାଦ୍ବାରା ଛାତ୍ରୀମାନେ ଏଣିକି ୨% ଅତିରିକ୍ତ ଉପସ୍ଥିତି ‘ଛାଡ୍’ ପାଇଁ ଆବେଦନ କରିପାରିବେ । ସାଧାରଣତଃ ପ୍ରତ୍ୟେକ ସେମିଷ୍ଟର ପରୀକ୍ଷା ଦେବା ଲାଗି କ୍ଲାସରେ ୭୫% ଉପସ୍ଥିତି ଦେଖାଇବାର ଆବଶ୍ୟକତା ଥାଏ । କିନ୍ତୁ ୟୁନିଭର୍ସିଟିର ଏହି ‘ମେନଷ୍ଟ୍ରେସନ ବେନିଫିଟ’ ନିଷ୍ପତ୍ତି ଦ୍ବାରା ଛାତ୍ରୀମାନଙ୍କୁ ଏଣିକି ପରୀକ୍ଷା ଦେବା ଲାଗି କେବଳ ୭୩% ଉପସ୍ଥିତି ଦେଖାଇବାକୁ ହେବ ।
ଏହି ଯୋଜନା ଦ୍ବାରା ୟୁନିଭର୍ସିଟିର ୪୦୦୦ରୁ ଅଧିକ ଛାତ୍ରୀ ଉପକୃତ ହେବ ବୋଲି କୁହାଯାଇଛି । ତେବେ ଏହି ପ୍ରସ୍ତାବ ଏବେ ଶିକ୍ଷା ପରିଷଦର ମଞ୍ଜୁରୀ ଅପେକ୍ଷାରେ ରହିଛି । ଏହି ନିଷ୍ପତ୍ତି କାର୍ଯ୍ୟକାରୀ ହେଲେ ସମ୍ଭବତଃ ଏଭଳି ଛୁଟି ଦେବାରେ ସିୟୁଏସଏଟି ହେବ କେରଳର ପ୍ରଥମ ୟୁନିଭର୍ସିଟି । ମାସିକ ଋତୁସ୍ରାବ ଦିନଟିକୁ ସବେତନ ଛୁଟି ଦେବାକୁ ଓଡ଼ିଆ ଝିଅ ତଥା ସମ୍ବଲପୁରର ଝିଅ ରଞ୍ଜିତା ପ୍ରିୟଦର୍ଶିନୀ ବିଭିନ୍ନ ଫୋରମରେ ଦାବି ଉଠାଉଛନ୍ତି । ବିଭିନ୍ନ ଅନୁଷ୍ଠାନ ଓ ରାଜନୈତିକ ଦଳର ବ୍ୟକ୍ତିବିଶେଷଙ୍କୁ ଭେଟି ଏ ସମ୍ପର୍କରେ ଦାବି ଜଣାଉଛନ୍ତି ।
