ନନ୍ଦିଘୋଷ ବ୍ୟୁରୋ: କେନ୍ଦୁଝର ବସନ୍ତପୁରାରେ ଥିବା ସାନ୍ତାଳ ସମ୍ପ୍ରଦାୟର ପବିତ୍ର ପୂଜାସ୍ଥଳୀ ଜାହେର ଥାନ୍ ବା ଜାହେରାରେ ଆକ୍ରମଣ ଘଟଣାକୁ ବିଜେଡି ନିନ୍ଦା କରିବା ସହ ଘଟଣାସ୍ଥଳ ପରିଦର୍ଶନ କରିଛି ଏକ ପ୍ରତିନିଧି ଦଳ । କହିଛି, ଆଦିବାସୀ ମୁଖ୍ୟମନ୍ତ୍ରୀଙ୍କ ଜିଲ୍ଲାରେ ଆଦିବାସୀଙ୍କ ପୂଜାସ୍ଥଳୀରେ ଆକ୍ରମଣ ଘଟଣା ନିନ୍ଦନୀୟ । ସେମାନଙ୍କ ଧାର୍ମିକ ରୀତିନୀତିରେ ବାଧା ସୃଷ୍ଟି କରିବା, ପୂଜା ସାମଗ୍ରୀ ନଷ୍ଟ କରିବା, ମହିଳାଙ୍କୁ ଧମକଚମକ ଦେବା ଆଦି ଘଟଣାରେ ଦଳ ଉଦବେଗ ପ୍ରକାଶ କରିଛି । ବିଜେପି ସରକାରଙ୍କ ଶାସନ କାଳରେ ଆଦିବାସୀମାନେ ଅସୁରକ୍ଷିତ ହୋଇ ପଡିଛନ୍ତି। ବିଜେଡି ପ୍ରତିନିଧି ଦଳ ପ୍ରଭାବିତ ପରିବାର, ଗ୍ରାମର ବୟୋଜ୍ୟେଷ୍ଠ ବ୍ୟକ୍ତି, ମହିଳା ଓ ସାନ୍ତାଳ ସମ୍ପ୍ରଦାୟର ଅନ୍ୟ ସଦସ୍ୟ ମାନଙ୍କ ସହ ଆଲୋଚନା କରିଛନ୍ତି । ସେମାନଙ୍କ ଅଭିଯୋଗ ଓ ସମସ୍ୟା ଶୁଣିବା ସହ ଘଟଣା ସମ୍ପର୍କରେ ପ୍ରତ୍ୟକ୍ଷ ତଥ୍ୟ ସଂଗ୍ରହ କରିଥିଲେ ଏବଂ ସ୍ଥାନୀୟ ପରିସ୍ଥିତିର ସମୀକ୍ଷା କରିଥିଲେ। ଏହି ଅଭିଯୋଗକୁ ନେଇ ପ୍ରତିନିଧି ଦଳ ଗଭୀର ଉଦ୍ବେଗ ପ୍ରକାଶ କରିବା ସହ ଆଦିବାସୀ ସମ୍ପ୍ରଦାୟର ପାରମ୍ପରିକ ଧାର୍ମିକ ପ୍ରଥା, ସାଂସ୍କୃତିକ ଐତିହ୍ୟ ଓ ସାମ୍ବିଧାନିକ ଅଧିକାରର ସୁରକ୍ଷା ଉପରେ ଗୁରୁତ୍ୱାରୋପ କରିଥିଲେ । ବିଜୁ ଜନତା ଦଳର ସଭାପତି ତଥା ବିରୋଧୀ ଦଳ ନେତା ନବୀନ ପଟ୍ଟନାୟକ ନିର୍ଦ୍ଦେଶକ୍ରମେ ଆଦିବାସୀ ସେଲ ସଭାପତି ସୁଦାମ ମାରାଣ୍ଡିଙ୍କ ନେତୃତ୍ୱରେ ଏହି ଟିମ କେନ୍ଦୁଝର ଗସ୍ତ କରିଛି ।
