ନନ୍ଦିଘୋଷ ବ୍ୟୁରୋ: ଆଜି ସାରା ରାଜ୍ୟରେ ଧୂମଧାମରେ ପାଳିତ ହେଉଛି ପଞ୍ଚମ ‘ମାଣ୍ଡିଆ ଦିବସ’। ପୁଷ୍ଟିର ଭଣ୍ଡାର କୁହାଯାଉଥିବା ଏହି ସୁପରଫୁଡ୍କୁ ଲୋକଙ୍କ ଦୈନନ୍ଦିନ ଖାଦ୍ୟରେ ସାମିଲ କରିବା ଏବଂ ମାଣ୍ଡିଆ ଚାଷକୁ ପ୍ରୋତ୍ସାହିତ କରିବା ଲକ୍ଷ୍ୟରେ ପୂର୍ବତନ ବିଜେଡି ସରକାରଙ୍କ ପକ୍ଷରୁ ୨୦୨୨ ମସିହାରେ ଏହି ସ୍ୱତନ୍ତ୍ର ଦିବସର ଆୟୋଜନ କରାଯାଇଥିଲା । ଯାହା ଆଜି ୫ ବର୍ଷରେ ପଦାର୍ପଣ କରିଛି । ମିଲେଟର ପୁଷ୍ଟିକର, ସ୍ୱାସ୍ଥ୍ୟ ଏବଂ ପରିବେଶଗତ ଲାଭ ବିଷୟରେ ସଚେତନତା ବୃଦ୍ଧି କରିବା ଏବଂ ଗ୍ରାମୀଣ ଜୀବିକା ଉନ୍ନତ କରିବା ସହ ଜୈବ ବିବିଧତା ପ୍ରଣାଳୀକୁ ସୁଦୃଢ଼ କରିବା ଲକ୍ଷ୍ୟରେ ଏହି ପଦକ୍ଷେପ ଗ୍ରହଣ କରାଯାଇଥିଲା । ଯାହା ଆଜି ପର୍ଯ୍ୟନ୍ତ ସଫଳତାର ସହ ଆଗେଇ ଚାଲିଛି ।
ଓଡ଼ିଶାର କୃଷି ଓ ଖାଦ୍ୟ ସଂସ୍କୃତିରେ ମାଣ୍ଡିଆର ଏକ ସ୍ୱତନ୍ତ୍ର ସ୍ଥାନ ରହିଛି। ଚଳିତ ବର୍ଷ ପଞ୍ଚମ ମାଣ୍ଡିଆ ଦିବସ ଅବସରରେ ରାଜ୍ୟ କୃଷି ଓ କୃଷକ ସଶକ୍ତିକରଣ ବିଭାଗ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି । ଏନେଇ ରାଜଧାନୀ ଭୁବନେଶ୍ୱରସ୍ଥିତ ମେଫେୟାର କନଭେନସନଠାରେ ଆଜିଠାରୁ ଦୁଇ ଦିନ ଧରି ରାଜ୍ୟସ୍ତରୀୟ ମାଣ୍ଡିଆ ଦିବସ ସମ୍ମିଳନୀ ଓ ପ୍ରଦର୍ଶନୀ ଆରମ୍ଭ ହୋଇଛି। ‘ଶ୍ରୀ ଅନ୍ନ ଓ ଭୂ-ପ୍ରଜାତି ବିହନ ବ୍ୟବସ୍ଥାର ସୁଦୃଢ଼ୀକରଣ’ ଥିମ୍କୁ ନେଇ ଆୟୋଜିତ ଏହି କାର୍ଯ୍ୟକ୍ରମକୁ ମାନ୍ୟବର ରାଜ୍ୟପାଳ ଉଦ୍ଘାଟନ କରିଛନ୍ତି। ତେବେ କେବଳ ଭୁବନେଶ୍ୱର ନୁହେଁ, ବରଂ ରାଜ୍ୟର ବିଭିନ୍ନ ଜିଲ୍ଲାରେ ମଧ୍ୟ ଜିଲ୍ଲାସ୍ତରୀୟ ମାଣ୍ଡିଆ ଦିବସ ବେଶ୍ ଉତ୍ସାହର ସହ ପାଳିତ ହେଉଛି। ଏହି ଅବସରରେ ଅନେକ ସ୍ଥାନରେ ପାରମ୍ପରିକ ବିହନ ସଂରକ୍ଷଣ କରୁଥିବା ଚାଷୀ ଓ ମହିଳା ସ୍ୱୟଂ ସହାୟକ ଗୋଷ୍ଠୀମାନଙ୍କୁ ସମ୍ମାନିତ କରାଯାଇଛି।
ମାଣ୍ଡିଆ ଚାଷ ବର୍ତ୍ତମାନ ଓଡ଼ିଶାର ମହିଳାମାନଙ୍କୁ ଆତ୍ମନିର୍ଭରଶୀଳ କରିବାର ଏକ ବଡ଼ ମାଧ୍ୟମ ପାଲଟିଛି। ମାଣ୍ଡିଆରୁ ପ୍ରସ୍ତୁତ ବିଭିନ୍ନ ସ୍ୱାଦିଷ୍ଟ ଓ ପୁଷ୍ଟିକର ଖାଦ୍ୟ ସାମଗ୍ରୀର ଚାହିଦା ବଜାରରେ ଦିନକୁ ଦିନ ବଢ଼ିବାରେ ଲାଗିଛି।
