ନନ୍ଦିଘୋଷ ବ୍ୟୁରୋ; ବିଭିନ୍ନ ପଦବୀରେ ଚାକିରି ଦେବାକୁ କହି ଯୁବକ-ଯୁବତୀଙ୍କୁ ଠକେଇ ଅଭିଯୋଗରେ ଜଣେ ଅଭିଯୁକ୍ତକୁ ଗିରଫ କରିଛି ଛତ୍ରପୁର ପୋଲିସ। ଏଟିଏମ୍ ସିକ୍ୟୁରିଟି ଗାର୍ଡ, ବ୍ୟାଙ୍କ ପିଅନ୍, ବ୍ୟାଙ୍କ କ୍ଲର୍କ, ଲୋନ୍ ସେକ୍ସନ୍ ଅଫିସର ଓ ଡାଟା ଏଣ୍ଟ୍ରି ଅପରେଟର ଭଳି ପଦବୀ ପାଇଁ ନାମୀଦାମୀ ଖବରକାଗଜରେ ବିଜ୍ଞାପନ ଦେଉଥିଲା ଅଭିଯୁକ୍ତ। ବେକାର ଯୁବକ-ଯୁବତୀମାନେ ଏହି ପଦବୀ ପାଇଁ ଆବେଦନ କଲେ ସେମାନଙ୍କଠାରୁ ୫୦ ହଜାର ଟଙ୍କା ନେଉଥିଲା। ଟଙ୍କା ନେବା ପରେ ଫୋନ୍ ବନ୍ଦ କରିବା ସହ ନିଜର ଲୋକେସନ୍ ବଦଳାଇ ଦେଉଥିଲା।ଏଭଳି ଜଣେ ଠକକୁ ଗିରଫ କରିବାରେ ସଫଳ ହୋଇଛି ଛତ୍ରପୁର ଥାନା ପୋଲିସ। ଗିରଫ ଅଭିଯୁକ୍ତ ହେଉଛି ଭଦ୍ରକ ଜିଲ୍ଲା ନଦୀଗାଁର ପଞ୍ଚାନନ ପଣ୍ଡା। ପଞ୍ଚାନନ ବାବାମଣି ସିକ୍ୟୁରିଟି ସର୍ଭିସ୍ ଆଣ୍ଡ କନସଲଟେନ୍ସି’ ନାମରେ ଏକ ଏଜେନ୍ସି ଖୋଲିଥିଲା। ଏହି ଏଜେନ୍ସି ନାମରେ ଭୁବନେଶ୍ୱରରେ ଏକ କାର୍ଯ୍ୟାଳୟ ମଧ୍ୟ ଖୋଲିଥିଲା।
ଚାକିରି ପାଇଁ ଆବେଦନ କରୁଥିବା ଯୁବକ-ଯୁବତୀଙ୍କୁ ପ୍ରଥମେ ୫୦ ହଜାର ଟଙ୍କା ମାଗୁଥିଲା। ଏହାପରେ ଡ୍ରେସ୍କୋଡ୍ ପାଇଁ ଆଉ ୧୦ ହଜାର ଟଙ୍କା ନେଉଥିଲା। ଏଭଳି ଭାବେ ୧୦୦ରୁ ଅଧିକ ଯୁବକ-ଯୁବତୀଙ୍କଠାରୁ ମୋଟ ୫୦ ଲକ୍ଷ ଟଙ୍କା ଠକେଇ କରିଥିବା ଅଭିଯୋଗ ହୋଇଛି।ପଞ୍ଚାନନଙ୍କ ନାମରେ ଛତ୍ରପୁର ଥାନାରେ ଅଭିଯୋଗ ପରେ ପୋଲିସ ଭୁବନେଶ୍ୱରରୁ ତାଙ୍କୁ ଗିରଫ କରିଛି। ତାଙ୍କଠାରୁ ୬୧ଟି ନକଲି ନିଯୁକ୍ତିପତ୍ର, ୨୬ଟି ନକଲି ଖାଲି ନିଯୁକ୍ତିପତ୍ର, ୨୫ଟି ନକଲି ପରିଚୟପତ୍ର, ୪ଟି ମୋବାଇଲ୍, ଏକାଧିକ ସିମ୍ କାର୍ଡ, ୬ଟି ପାସ୍ବୁକ୍ ଓ ଏଟିଏମ୍ କାର୍ଡ ଜବତ କରିଛି ପୋଲିସ।ପଞ୍ଚାନନଙ୍କ ନାମରେ ପୂର୍ବରୁ ଭଦ୍ରକର ଧୁଷୁରୀ ଥାନାରେ ମଧ୍ୟ ଏକ ମାମଲା ରହିଛି। ଏହି ଠକେଇରେ କେବଳ ପଞ୍ଚାନନ ସାମିଲ ଥିଲେ ନା ତାଙ୍କର ଅନ୍ୟ କୌଣସି ସହଯୋଗୀ ଅଛନ୍ତି, ସେନେଇ ଖୋଳତାଡ଼ ଜାରି ରହିଥିବା ଗଞ୍ଜାମ ଏସ୍ପି ସୂଚନା ଦେଇଛନ୍ତି।
