ନନ୍ଦିଘୋଷ ବ୍ୟୁରୋ: ଅଧରାତିରେ ବାଣୀବିହାରରେ ଫୁଟିଲା ବୋମା! ଅଶାନ୍ତ ହେଲାଣି ବାଣୀବିହାର ବିଶ୍ବବିଦ୍ୟାଳୟ । କ୍ୟାମ୍ପସ ସାରା ଛାଉଣୀ ହେଲେ ପୋଲିସ । ଛାତ୍ର ସଂସଦ ନିର୍ବାଚନକୁ ନେଇ ବାଣୀବିହାର ବିଶ୍ବବିଦ୍ୟାଳୟରେ ଦେଖାଦେଇଛି ଉତ୍ତେଜନା । ୧ ନମ୍ବର ହଷ୍ଟେଲ ପଛପଟେ ବିଳମ୍ବିତ ରାତିରେ ବୋମା ମାଡ଼ ହୋଇଥିବା ଅଭିଯୋଗ ହୋଇଛି । ପୂର୍ବରୁ ୨ ଛାତ୍ର ଗୋଷ୍ଠୀ ମଧ୍ୟରେ ଉତ୍ତେଜନା ଦେଖା ଦେଇଥିଲା । ଆଉ ଏବେ ୧ ନଂ ହଷ୍ଟେଲ ପଛପଟେ ବୋମା ମାଡ ହୋଇଥିବା ସନ୍ଦେହ କରାଯାଉଛି ।
ସୁଚନା ମୁତାବକ, ଗତକାଲି ରାତି ପ୍ରାୟ ସାଢେ ୧୧ଟାରେ କ୍ୟାମ୍ପସରେ ବୋମା ଫୁଟିବା ପରି ପ୍ରଚଣ୍ଡ ଶବ୍ଦ ହୋଇଥିଲା । କ୍ୟାମ୍ପନିଙ୍ଗ୍ ସମୟରେ ବୋମା ମାଡ ହୋଇଥିବା ଅଭିଯୋଗ ହୋଇଛି । ଯାହାକୁ ନେଇ ୧ ନମ୍ବର ଛାତ୍ରାବାସ ଆଗରେ ହୋହାଲ୍ଲା କରିଥିଲେ ଛାତ୍ର । ପ୍ରତିବାଦରେ ମୁଖ୍ୟ ଫାଟକ ଆଗରେ ଛାତ୍ରଛାତ୍ରୀଙ୍କ ଧାରଣା ଦେଇଥିଲେ ଛାତ୍ରଛାତ୍ରୀ । ବିଶ୍ୱବିଦ୍ୟାଳୟର ମୁଖ୍ୟ ଫାଟକ ଘେରିଥିଲା ବିଜୁ ଛାତ୍ର ଜନତା ଦଳ । ପରିସ୍ଥିତି ଅଣାୟତ ହେବାରୁ ଡିସିପି ଘଟଣା ସ୍ଥଳକୁ ଯାଇ ଆନ୍ଦୋଳନରତ ଛାତ୍ରଙ୍କୁ ବୁଝାସୁଝା କରିଥିଲେ । ଯାହାପରେ ଧାରଣାରୁ ଉଠିଥିଲେ ଛାତ୍ରଛାତ୍ରୀ । ଏନେଇ ଛାତ୍ର ବିଜେଡି ତରଫରୁ ଡିସିପିଙ୍କୁ ଏକ ଦାବି ପତ୍ର ମଧ୍ୟ ଦିଆ ଯାଇଛି । ପରେ ଡିସିପି ଏକ ନମ୍ୱର ହଷ୍ଟେଲ ଯାଇ ବୋମା ଶବ୍ଦ ଆସିଥିବା ସ୍ଥାନକୁ ଯାଇ ସ୍ଥିତି ଅନୁଧ୍ୟାନ କରିଥିଲେ । କ୍ୟାମ୍ପସରେ ଚାପା ଉତ୍ତେଜନା ଲାଗିରହିଥିବାରୁ କୌଣସି ଅପ୍ରିତିକର ପରିସ୍ଥିତିକୁ ଏଡାଇବା ପାଇଁ ୫ ପ୍ଲାଟୁନ ଫୋର୍ସ ମୁତୟନ କରାଯାଇଛି । ତେବେ ବୋମା ମାଡ ହୋଇଥିବା ନେଇ ପୋଲିସ ପକ୍ଷରୁ କିନ୍ତୁ ସ୍ପଷ୍ଟ କରାଯାଇ ନାହିଁ ।
କେବଳ ବାଣୀବିହାର କାହିଁକି ବରଂ ଛାତ୍ର ସଂସଦ ନିର୍ବାଚନ ଘୋଷଣା ହେବା ଦିନଠାରୁ ହିଁ ବିଭିନ୍ନ କଲେଜ ଏବଂ ବିଶ୍ବବିଦ୍ୟାଳୟରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଛି । କିଛି କିଛି କଲେଜରରେ ନିର୍ବାଚନ ବନ୍ଦ କରିବାକୁ ମଧ୍ୟ ନିଷ୍ପତ୍ତି ନିଆଯାଇଛି । ଏଭଳି ସ୍ଥିତିରେ ୧୫ ତାରିଖରେ କିଭଳି ସୁରୁଖୁରୁରେ ଛାତ୍ର ସଂସଦ ନିର୍ବାଚନ ହୋଇପାରିବ ତାହା ଏବେ ସରକାରଙ୍କ ମୁଣ୍ଡବିନ୍ଧାର କାରଣ ପାଲଟିଛି ।
