ପୁରୀ: ନୀଳାଦ୍ରି ଭକ୍ତ ନିବାସ ଅସ୍ଥାୟୀ ଷ୍ଟ୍ରଙ୍ଗ ରୁମରୁ ସ୍ଥାନାନ୍ତର ହୋଇଛି ରୂପା । ଜିଲ୍ଲା ଟ୍ରେଜେରୀକୁ ପ୍ରାୟ ୫ଶହ କେଜିର ରୂପା ଚାଦର ସ୍ଥାନାନ୍ତର କରାଯାଇଛି । ସୁରକ୍ଷା ଦୃଷ୍ଟିରୁ ଶ୍ରୀମନ୍ଦିର ପ୍ରଶାସନର ସୁରକ୍ଷା ପ୍ରଶାସକ, ଉନ୍ନୟନ ପ୍ରଶାସକ ଓ ଅନ୍ୟାନ୍ୟ ଅଧିକାରୀଙ୍କ ସମେତ ପୋଲିସ ପ୍ରଶାସନ ପକ୍ଷରୁ ଟାଉନ ଥାନା ଅଧିକାରୀ ନିୟୋଜିତ ହୋଇଛନ୍ତି । ଏହାସହ 3ଜଣ ଏସଆଇ, ଏକ ପ୍ଲାଟୁନ ପୋଲିସ ଫୋର୍ସ ମୁତୟନ ହୋଇଛନ୍ତି ।
କଡା ସୁରକ୍ଷା ବଳୟରେ ରୂପା ସ୍ଥାନାନ୍ତର କରାଯାଇଛି । ଶ୍ରୀମନ୍ଦିର କଳାହାଟ ଦ୍ୱାରରେ ରୂପା ଛାଉଣୀ ପାଇଁ ଆସିଥିଲା ରୂପା । ଶ୍ରୀମନ୍ଦିରର ୮ଟି ଦ୍ବାର ରୂପା ଛାଉଣୀ କରାଯିବାକୁ ଥିବା ବେଳେ ସେଥିରୁ ଗତ ରଥ ଯାତ୍ରା ମଧ୍ୟରେ 7ଟି ଦ୍ବାରର କାର୍ଯ୍ୟ ସରିଛି । ଆସନ୍ତା ବର୍ଷ ଶ୍ରୀଗୁଣ୍ଡିଚା ଯାତ୍ରାରେ କଳାହାଟ ଦ୍ବାର କାର୍ଯ୍ୟ କରିବାକୁ ନିଷ୍ପତ୍ତି ହୋଇଛି । ଏଥିପାଇଁ ଅସ୍ଥାୟୀ ଷ୍ଟ୍ରଙ୍ଗ ରୁମରୁ ରୁପା ଚାଦର ଗୁଡିକୁ ଜିଲ୍ଲା ଟ୍ରେଜେରି ବା କୋଷାଗାରରେ ରଖାଯିବାକୁ ଶ୍ରୀମନ୍ଦିର ପ୍ରଶାସନ ନିଷ୍ପତ୍ତି ନେଇଛି ।
