ଭୁବନେଶ୍ବର: ଜାତିୟ ଯୁବ ଦିବସ ଅବସରରେ ଜାତିସଙ୍ଘ ଭାରତ ପକ୍ଷରୁ ରାଜଧାନୀ ନୂଆ ଦିଲ୍ଲୀରେ ଆୟୋଜିତ ଏକ ବିଶେଷ କାର୍ଯ୍ୟକ୍ରମରେ ଭାରତର ୬ ଜଣ ଯୁବ ଅଧିବକ୍ତାଙ୍କୁ ଜାତିସଂଘ ପକ୍ଷରୁ ସ୍ବୀକୃତି ଦିଆ ଯାଇଛି । 
ଏହି ୬ ଜଣ ଯୁବ ଅଧିବକ୍ତାଙ୍କ ମଧ୍ୟରେ ସ୍ଥାନ ପାଇଛନ୍ତି ଓଡ଼ିଶାର ପୁରୀ ଜିଲ୍ଲା ଅସ୍ତରଙ୍ଗ ବ୍ଲକ ଗୁଣ୍ଡଳବା ଗାଆଁର ସୌମ୍ୟ ରଞ୍ଜନ ବିଶ୍ଵାଳ । ଏହି କାର୍ଯ୍ୟକ୍ରମରେ ଜାତିସଙ୍ଘ ଭାରତର ରେସିଡେଣ୍ଟ କୋଅର୍ଡିନେଟର ଶୋମ୍ୱି ଶାର୍ପ, ଭାରତ ସରକାରଙ୍କ ଯୁବ ଓ କ୍ରୀଡା ମନ୍ତ୍ରାଳୟ ସଚିବ ଶ୍ରୀଯୁକ୍ତ ସଞ୍ଜୟ କୁମାର, ୟୁ.ଏନ.ଡି.ପି ମୁଖ୍ୟ ଶୋକା ନୋଡା, ୟୁନିସେଫ୍ ମୁଖ୍ୟ ୟାସୁମାସା ପ୍ରମୁଖଙ୍କ ସମେତ ସମସ୍ତ ଜାତିସଙ୍ଘ ବିଭାଗର କର୍ମକର୍ତ୍ତା, ଭାରତ ସରକାରଙ୍କ ବିଭାଗୀୟ କର୍ମକର୍ତ୍ତାଙ୍କ ଉପସ୍ଥିତିରେ ଅଗଷ୍ଟ ୧୨ ୨୦୨୨ ଠାରୁ ଆରମ୍ଭ କରି ଅଗଷ୍ଟ ୧୨ ୨୦୨୪ ଯାଏଁ ୨ ବର୍ଷ ପର୍ଯ୍ୟନ୍ତ ପାଈଁ ସ୍ବୀକୃତି ପତ୍ର ପ୍ରଦାନ କରିଛନ୍ତି ।
୨୦୧୪ ମସିହାରୁ ଜଳବାୟୁ ପରିବର୍ତ୍ତନ ପ୍ରଭାବକୁ ଅନୁଭବ କରି ଉପକୂଳ ଜୈବ ବିବିଧତା ସୁରକ୍ଷା ପାଇଁ ସୌମ୍ୟ ରଞ୍ଜନ ବିଶ୍ଵାଳ ନିଜସ୍ଵ ଅଭିନବ ଉପାୟରେ କାମ କରୁଛନ୍ତି । ବିରଳ ଅଲିଭ ରିଡ଼ଲେ କଇଁଛଙ୍କ ସୁରକ୍ଷା, ଲୁଣା ଜଙ୍ଗଲ ସୁରକ୍ଷା ଓ ନଦୀ ପ୍ରଦୂଷଣ ସମ୍ପର୍କିତ ସେ ବିବିଧ ପ୍ରୟାସ ହାତକୁ ନେଇଛନ୍ତି । ଏ ପ୍ରକାର କାର୍ଯ୍ୟଧାରା ପାଈଁ ପୁର୍ବରୁ ଲିମକା ବୁକ୍ ରେକର୍ଡ, ଉପଖଣ୍ଡସ୍ତରୀୟ ବିଜୁ ପଟ୍ଟନାୟକ ବନ୍ୟପ୍ରାଣୀ ପୁରସ୍କାର ସହ ଚିଲିକା ବନ୍ୟପ୍ରାଣୀ ବନଖଣ୍ଡ, ବ୍ରହ୍ମପୁର ବନଖଣ୍ଡ ଅଧିକାରୀଙ୍କ ପାଖରୁ ପ୍ରଶଂସିତ ହେବା ସହିତ ତାଙ୍କ ନେତୃତ୍ଵରେ ଅନେକ କାର୍ଯ୍ୟ ଜାତୀୟ ସ୍ତରରେ କେନ୍ଦ୍ର ଜଙ୍ଗଲ ମନ୍ତ୍ରୀଙ୍କ ସମେତ ଅନେକ ପ୍ରଶଂସା ପାଇଛି ।
