ନନ୍ଦିଘୋଷ ବ୍ୟୁରୋ: କୋଟିଆକୁ ନେଇ ତେଜୁଛି ରାଜ୍ୟ ରାଜନୀତି । ଶାସକ ବିରୋଧୀ ମଧ୍ୟରେ ଜୋର ଧରିଛି ବାକ୍ ଯୁଦ୍ଧ । ଏହାକୁ ନେଇ ବିଜେଡି ପ୍ରଥମରୁ ସ୍ବର ଉଠାଉଥିବା ବେଳେ ଏବେ ସରକାରଙ୍କ ଉପରେ ବର୍ଷିଛନ୍ତି ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ। ମିଳିମିଶି କୋଟିଆକୁ ଆନ୍ଧ୍ରକୁ ଦେଇ ଦେବାକୁ ମସୁଧା ହୋଇଥିବା ସେ ଅଭିଯୋଗ କରିଛନ୍ତି। କୋଟିଆ ପ୍ରସଙ୍ଗରେ ବିଧାନସଭାର ସ୍ୱତନ୍ତ୍ର ଅଧିବେଶନ ଡାକିବାକୁ ସେ ଦାବି କରିଛନ୍ତି। ଗୃହ କମିଟି କଣ ସମାଧାନ କରିପାରିବ ବୋଲି ସେ ପ୍ରଶ୍ନ କରିଛନ୍ତି। ପ୍ରମିଳା ମଲ୍ଲିକ କହିଛନ୍ତି, ଟ୍ରିପଲ ଇଞ୍ଜିନ ସରକାର ସବୁଥିରେ ଫେଲ। ସରକାରଙ୍କ ଆନ୍ତରିକତା ନାହିଁ। କେତେ ଦିନ ବିଜେଡିକୁ ଦୋଷ ଦେବେ ସେମାନେ। ରାଜ୍ୟ ସରକାରଙ୍କର କ୍ଷମତା ନାହିଁ, କେନ୍ଦ୍ର ସରକାରଙ୍କର କ୍ଷମତା ନାହିଁ। ଯଦି ପାରୁ ନାହାନ୍ତି ନବୀନ ପଟ୍ଟନାୟକଙ୍କୁ କ୍ଷମତା ଛାଡ଼ି ଦେଉନାହନ୍ତି ବୋଲି କହିଛନ୍ତି ପ୍ରମିଳା ମଲ୍ଲିକ। ସେପଟେ କୋଟିଆ ପ୍ରସଙ୍ଗରେ ନିଜ ପ୍ରତିକ୍ରିୟା ରଖି ବିଜେପି ରାଜ୍ୟ ସଭାପତି ମନମୋହନ ସାମଲ କହିଛନ୍ତି, କୋଟିଆକୁ ନେଇ ସରକାରଙ୍କ ଆଭିମୁଖ୍ୟ ସ୍ପଷ୍ଟ । ସରକାର ସୁପ୍ରିମକୋର୍ଟ ଯାଇଛନ୍ତି । କୋଟିଆକୁ ନେଇ ଦଳ କି ସରକାର କମ୍ପରମାଇଜ କରିବେନି । । କୋଟିଆ ଓଡିଶାର। ଆମ ସରକାର ଆସିଲାପରେ ଦୁଇ ଉପମୁଖ୍ୟମନ୍ତ୍ରୀ, ରାଜସ୍ବ ମନ୍ତ୍ରୀ କୋଟିଆ ଯାଇଛନ୍ତି । କୋଟିଆରେ ଆମ ସରକାର କିଛି ନା କିଛି କାର୍ଯ୍ୟକ୍ରମ କରିଆସିଛି । ରଥଯାତ୍ରା ହଉକି ସାମାଜିକ କାର୍ଯ୍ୟକ୍ରମ. କୋଟିଆରେ ଲୋକଙ୍କ ସହିତ ସମୟ କଟାଇଛନ୍ତି । କୋଟିଆ ସମସ୍ୟା ଲମ୍ବା ସମୟ ଧରିଚାଲି ଆସିଛି । ସରକାର ଯାହା ଯାହା ପଦକ୍ଷେପ ନେବା କଥା ନେଇଛନ୍ତି ।
ତେବେ ଆସନ୍ତାକାଲି କୋଟିଆ କମିଟିର ବୈଠକ ବସିବ। କମିଟିର ଅଧ୍ୟକ୍ଷ ତଥା ରାଜସ୍ୱ ମନ୍ତ୍ରୀ ସୁରେଶ ପୂଜାରୀଙ୍କ ଅଧ୍ୟକ୍ଷତାରେ ଏହା ଅନୁଷ୍ଠିତ ହେବ। ଅଢ଼େଇ ବର୍ଷ ଭିତରେ କୋଟିଆରେ କେତେ ବିକାଶ ହୋଇଛି, ଆଉ କେତେ ବାକି ରହିଛି ତାହାର ହିସାବ ହେବ। ଆଉ ସବୁ କଣ କରାଯାଇପାରିବ, ମତ ଲୋଡ଼ା ଯିବ ।
