ଗାନ୍ଧିଜୀଙ୍କୁ କେମିତି ମିଳିଥିଲା ବାପୁଜୀ ଆଖ୍ୟା ? କ’ଣ ଥିଲା ତାଙ୍କ ଜୀବନୀ…

ନନ୍ଦିଘୋଷ ବ୍ୟୁରୋ: ଆଜି ଜାତିର ପିତା ମହାତ୍ମା ଗାନ୍ଧୀଙ୍କ ଜନ୍ମ ଜୟନ୍ତୀ । ମହାତ୍ମ ଗାନ୍ଧୀ ଥିଲେ ଅନେକଙ୍କ ଭିତରେ ଜଣେ । କୋଟି କୋଟି ଭାରତୀୟଙ୍କର ପ୍ରିୟ ନେତା । ସମୃଗ୍ର ବିଶ୍ୱକୁ ଅହିଂସା ଓ ସତ୍ୟର ବାର୍ତ୍ତା ଦେଇଥିବା ବିଶିଷ୍ଟ ସତ୍ୟାଗ୍ରହୀ ହେଉଛନ୍ତି ଶତାବ୍ଦୀର ଶ୍ରେଷ୍ଠ ପୁରୁଷ, ମହାନ୍‌ ଚିନ୍ତାନାୟକ, ଦେଶବାସୀଙ୍କର ପ୍ରିୟ ବାପୁଜୀ-ମହାତ୍ମାଗାନ୍ଧୀ ।

ଏହି ବିଶିଷ୍ଟ ଜନନାୟକ, ଜାତିର ପିତା ମହାତ୍ମାଗାନ୍ଧୀ ୧୮୬୯ ମସିହା ଅକ୍ଟୋବର ୦୨ ତାରିଖରେ ଗୁଜୁରାଟର ପୋରବନ୍ଦରରେ ଜନ୍ମଗ୍ରହଣ କରିଥିଲେ । ତାଙ୍କର ପ୍ରକୃତ ନାମ ମୋହନ ଦାସ କରମଚାନ୍ଦ ଗାନ୍ଧୀ । ପିତାଙ୍କର ନାମ ଥିଲା କରମଚାନ୍ଦ ଗାନ୍ଧୀ । ମାତାଙ୍କ ନାମ ଥିଲା ପୁତୁଲି ବାଇ । ମୋହନ ଦାସ ଥିଲେ ପିତାମାତାଙ୍କର ଷଷ୍ଠ ତଥା ସର୍ବକନିଷ୍ଠ ସନ୍ତାନ ।

ମାଟ୍ରିକ୍‌ ପାସ କଲାପରେ ସେ ୧୮୮୮ ମସିହାରେ ବିଲାତ ଯାତ୍ରା କରିଥିଲେ । ସେ ତିନି ବର୍ଷ ପରେ ବାରିଷ୍ଟରି ପାସ୍ କରି ଆଇନ୍‌ ବ୍ୟବସାୟରେ ମନୋନିବେଶ କରିଥିଲେ । ୧୮୯୩ରେ ଗାନ୍ଧୀ ଦକ୍ଷିଣ ଆଫ୍ରିକା ଯାଇଥିଲେ । ସେଠାରେ ଥିବା ଭାରତୀୟ ଲୋକମାନେ ଗୋରା ଲୋକମାନଙ୍କ ଦ୍ଵାରା ଅତ୍ୟାଚାରର ଶିକାର ହେଉଥିଲେ । ଅନ୍ୟାୟର ପ୍ରତିରୋଧ କରିବା ପାଇଁ ସେ ସେଠାରେ ସ୍ୱର ଉତ୍ତୋଳନ କରିଥିଲେ । ଏହି ଅନ୍ୟାୟର ପ୍ରତିବାଦ କରି ଗାନ୍ଧିଜୀ ସତ୍ୟାଗ୍ରହ ଆନ୍ଦୋଳନ ମଧ୍ୟ କରିଥିଲେ ।

ରାଜନୈତିକ ଗୁରୁ ଗୋପାଳକୃଷ୍ଣ ଗୋଖଲେଙ୍କ ପରାମର୍ଶକ୍ରମେ ଗାନ୍ଧିଜୀ ୧୯୧୫ରେ ଭାରତକୁ ଫେରିଆସି ସ୍ୱାଧିନତା ଆନ୍ଦୋଳନର ନେତୃତ୍ୱ ନେଇଥିଲେ । ୧୯୧୭ ମସିହାରେ ସାବରମତୀ ନଦୀ କୂଳରେ ଆଶ୍ରମ ସ୍ଥାପନ କଲେ । ଏହିଠାରୁ ଗାନ୍ଧିଜୀ ସ୍ୱାଧିନତା ପାଇଁ ଅହିଂସା ମାର୍ଗରେ ଅସହଯୋଗ ଆନ୍ଦୋଳନ ଓ ପଦଯାତ୍ରା ଆରମ୍ଭ କରିଥିଲେ । ସାବରମତୀ ଆଶ୍ରମରେ ନିଜେ ସୂତା କାଟିଲେ ଓ ସଂଘ ଗଠନ କରି ସୂତା କାଟି ପିନ୍ଧିବା ଓ କୁଟି ଖାଇବା ପାଇଁ ବୁଲିବୁଲି ଲୋକଙ୍କୁ ବୁଝେଇଲେ । ରବୀନ୍ଦ୍ର ନାଥ ଠାକୁର ଗାନ୍ଧିଜୀଙ୍କ ବ୍ୟକ୍ତିତ୍ୱରେ ମୁଗ୍‌ଧ ହୋଇ ତାଙ୍କୁ ମହାତ୍ମା ଭାବରେ ସମ୍ବୋଧନ କରିଥିଲେ ।

୧୯୨୦-୨୧ରେ ଅସହଯୋଗ ଆନ୍ଦୋଳନର ନେତୃତ୍ୱ ନେଇ ଗାନ୍ଧିଜୀ କାରାବରଣ କରିଥିଲେ । ଏହାପରେ ଆଇନ୍‌ ଅମାନ୍ୟ ଆନ୍ଦୋଳନ ଓ ୧୯୪୨ରେ ଭାରତ ଛାଡ଼ ଆନ୍ଦୋଳନ ଡାକରା ଦେଇ ଇଂରେଜ ସରକାର ବିରୁଦ୍ଧରେ ଆନ୍ଦୋଳନ ତୀବ୍ରତର କରିଥିଲେ । ମହାତ୍ମାଙ୍କ ଡାକରାରେ ସାରା ଦେଶ ହୋଇଥିଲା ଏକାଠି । ପରିଶେଷରେ ୧୯୪୭ ମସିହା ଅଗଷ୍ଟ ୧୫ ତାରିଖରେ ଦେଶ ସ୍ୱଧିନତା ଲାଭ କଲା । ସତ୍ୟ ଓ ଅହିଂସା ବଳରେ ଦୀର୍ଘ ୩୦୦ ବର୍ଷରୁ ଅଧିକ ଦିନ ପରାଧିନ ରଖିଥିବା ଗୋରା ସରକାରଙ୍କୁ ବିତାଡ଼ିତ କରିବାରେ ଗାନ୍ଧିଜୀ ସକ୍ଷମ ହୋଇଥିଲେ । ୧୯୪୮ ଜାନୁଆରୀ ୩୦ରେ ଏହି ମହାନ ଜନନାୟକଙ୍କ ମୃତ୍ୟୁ ହୋଇଥିଲା ।