ପୋଲ ନାହିଁ ! ବର୍ଷା ଦିନେ ବାହ୍ୟ ଜଗତରୁ ବିଛିନ୍ନ ପୁରା ଅଞ୍ଚଳ, ମୌଳିକ ସୁବିଧାରୁ ବି ବଞ୍ଚିତ ଲୋକେ
ଗଜପତି: ପୋଲଟିଏ ନଥିବାରୁ ସମସ୍ତ ମୌଳିକ ସୁବିଧାରୁ ବଞ୍ଚିତ ଗ୍ରାମବାସୀ । ଗମନାଗମନର ସୁବିଧା ନଥିବାରୁ ପହଞ୍ଚି ପାରୁନାହିଁ ସରକାରୀ ଯୋଜନା । ବିକାଶ ଏଠି ପାଲଟିଛି ସାତ ସପନ । ଖରସ୍ରୋତା ନାଳ ଉପରେ ଜୀବନକୁ ପାଣି ଛଡାଇ ଯାତାୟତ କରୁଛନ୍ତି ଲୋକେ । ଗଜପତି ଜିଲ୍ଲା ରାୟଗଡ଼ ବ୍ଲକ ଅନ୍ତର୍ଗତ ସାନତୁଣ୍ଡି ପଞ୍ଚାୟତର ସନ୍ଧିଗାଁରୁ ଆସିଛି ଏମିତି ଚିତ୍ର ।
ଗଜପତି ଜିଲ୍ଲା ରାୟଗଡ଼ ବ୍ଲକ ଅନ୍ତର୍ଗତ ସାନତୁଣ୍ଡି ପଞ୍ଚାୟତର ସନ୍ଧିଗାଁ ସମେତ ଆଖପାଖ ତିନୋଟି ଗ୍ରାମର ଶତାଧିକ ପରିବାରର ରହନ୍ତି ନାଳ ଆରପାରିରେ । ଖରସ୍ରୋତା ନାଳ ପାର ହେବାକୁ ନାହିଁ ସ୍ଥାୟୀ ବ୍ୟବସ୍ଥା । ଗ୍ରାମବାସୀ କାଠରେ ଅସ୍ଥାୟୀ ପୋଲ କରି ବିପଦପୂର୍ଣ୍ଣ ଭାବେ ଯାତ୍ରା କରୁଛନ୍ତି ଲୋକେ । ଛାତ୍ରଛାତ୍ରୀ ହୁଅନ୍ତୁ ବା ବୃଦ୍ଧ, କିମ୍ବା ଗର୍ଭବତୀ, ଏହି କାଠ ପୋଲ ହି ଏକମାତ୍ର ଭରସା ।
ବର୍ଷା ଦିନ ଆସିଲେ ଲୋକଙ୍କ ଭୟ ବଢୁଛି । ଅତ୍ୟଧିକ ପାଣି ଆସିଲେ ପୋଲଟି ଭାସି ଯାଉଥିବା କହନ୍ତି ଲୋକେ । ରାସ୍ତା ନଥିବାରୁ ପ୍ରଶାସନିକ ଅଧିକାରୀଙ୍କ କେବେ ଏଠାରେ ପାଦ ପଡିନଥିବା ମଧ୍ୟ ଲୋକେ ଅଭିଯୋଗ କରିଛନ୍ତି ।
ସ୍ୱାଧୀନତାର ଏତେ ବର୍ଷ ପରେ ବି ବିକାଶର ସ୍ୱାଦ ଚାଖି ନାହାନ୍ତି ଏଠାକାର ଲୋକେ । ତେଣୁ ତୁରନ୍ତ ଲୋକଙ୍କ ସମସ୍ୟା ବିଷୟରେ ଧ୍ୟାନ ଦେଲେ ଲୋକେ ଉପକୃତ ହୋଇ ପାରନ୍ତେ ବୋଲି କହିଛନ୍ତି ସ୍ଥାନୀୟ ବାସିନ୍ଦା ।
(ସରୋଜ ବୀରା)
