ହୋଟେଲ ତାଜ୍ ଉପରକୁ ବୋମା ମାଡ଼ ନେଇ ଲସ୍କର ଇ ତୋଇବାର ଧମକ
1 min read
ମୁମ୍ବାଇ :ପୁଣି ଆତଙ୍କବାଦୀଙ୍କ ଟାର୍ଗେଟରେ ମୁମ୍ୱାଇ ପ୍ରସିଦ୍ଧ ହୋଟେଲ ତାଜ । ଏହି ହୋଟେଲ୍କୁ ଉଡ଼ାଇ ଦେବାକୁ ଧମକ ଦେଇଛନ୍ତି ଆତଙ୍କବାଦୀ । ସୋମବାର ରାତି ୧୨ଟା ସମୟରେ ପାକିସ୍ତାନରୁ କେହି ଜଣେ ଫୋନ୍ କରି ଏହାକୁ ଉଡ଼ାଇ ଦେବାକୁ ଧମକ ଦେଇଛି । ଏହାପରେ ହୋଟେଲ ପରିସରରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି ।
ପ୍ରାପ୍ତ ସୂଚନା ମୁତାବକ ରାତି ସାଢେ ୧୨ଟା ସମୟରେ ତାଜର କର୍ମଚାରୀଙ୍କ ନିକଟକୁ ଏହି ଫୋନ ଆସିଥିଲା । ସଂପୃକ୍ତ ବ୍ୟକ୍ତି ନିଜକୁ ଲସ୍କର-ଇ-ତୋଇବାର ସଦସ୍ୟ କହୁଥିଲା ଏବଂ ୨୦୦୮ ପରି ତାଜକୁ ଉଡ଼ାଇଦେବାକୁ ଧମକ ଦେଇଥିଲା । ଏହାର କିଛି ସମୟ ପରେ ବାନ୍ଦ୍ରାସ୍ଥିତ ତାଜଲାଣ୍ଡସ ହୋଟେଲକୁ ଆଉ ଏକ ଫୋନ ଆସି ସମାନ ଧରଣର ଧମକ ଆସିଥିଲା । ଏହା ପରେ ହୋଟେଲ ସରୁକ୍ଷା ବଢ଼ାଯିବା ସହ ପୋଲିସକୁ ଏସମ୍ପର୍କରେ ଅବଗତ କରାଯାଇଛି ।
ପ୍ରାଥମିକ ତଦନ୍ତର ରିପୋର୍ଟ ଅନୁଯାୟୀ ମୁମ୍ୱାଇ ପୋଲିସ କହିବା ହେଲା ଯେ, ସମ୍ପୃକ୍ତ ନମ୍ୱର ପାକିସ୍ତାନର କରାଚୀ ଅଞ୍ଚଳର । ଏବଂ ବ୍ୟକ୍ତି ଜଣଙ୍କ ଲସ୍କର ଇ ତୋଇବାର ସଦସ୍ୟ । ତେବେ ଏବେ ମଧ୍ୟ ପୋଲିସ ପକ୍ଷରୁ ତଦନ୍ତ ଜାରି ରହିଛି । ସୂଚନା ଯୋଗ୍ୟ ୨୬ ନଭେମ୍ବର ୨୦୦୮ ମସିହାରେ ପାକିସ୍ତାନୀ ଆତଙ୍କବାଦୀମାନେ ତାଜ ହୋଟେଲ ସହ ମୁମ୍ବାଇର ବିଭିନ୍ନ ସ୍ଥାନରେ ଆକ୍ରମଣ କରିଥିଲେ । ତାଜରେ ବନ୍ଧକ ଥିବା ପର୍ଯ୍ୟଟକଙ୍କୁ ଏନଏସଜି କମାଣ୍ଡୋ ମୁକ୍ତ କରିଥିଲେ ।
