୨୦୧୧ ବିଶ୍ୱକପ୍ରେ ଫିକ୍ସିଂ ଅଭିଯୋଗ: ପ୍ରମାଣ ଅଭାବରୁ ତଦନ୍ତ ବନ୍ଦ କଲା ଶ୍ରୀଲଙ୍କା ପୋଲିସ
କଲୋମ୍ୱ: ମ୍ୟାଚ୍ ଫିକ୍ସିଂ ନେଇ ହୋଇଥିବା ଅଭିଯୋଗ ଉପରେ ତଦନ୍ତ ବନ୍ଦ କଲା ଶ୍ରୀଲଙ୍କା । ୨୦୧୧ କ୍ରିକେଟ ବିଶ୍ୱକପ୍ର ଫାଇନାଲ୍ ମ୍ୟାଚ୍ରେ ଫିକ୍ସିଂ ହୋଇଥିବା ନେଇ ହୋଇଥିଲା ଅଭିଯୋଗ । ଶ୍ରୀଲଙ୍କାର ପୂର୍ବତନ କ୍ରୀଡ଼ାମନ୍ତ୍ରୀଙ୍କ ଅଭିଯୋଗ ଅନୁଯାୟୀ ଏହି ତଦନ୍ତ ଆରମ୍ଭ ହୋଇଥିଲା ।
ତଦନ୍ତ ସମୟରେ ଶ୍ରୀଲଙ୍କା ଦଳର ତତ୍କାଳୀନ ଅଧିନାୟକ କୁମାର ସାଙ୍ଗାକାରା, ଉପଅଧିନାୟକ ମାହେଲା ଜୟବର୍ଦ୍ଧନେ ଓ ଚୟନକର୍ତ୍ତା ଅରବିନ୍ଦ ଡି ସିଲଭାଙ୍କୁ ସ୍ପେଶାଲ ଇନଭେଷ୍ଟିଗେସନ ୟୁନିଟ ପଚରାଉଚରା ମଧ୍ୟ କରିଥିଲା । ତେବେ ଉପଯୁକ୍ତ ପ୍ରମାଣ ନ ମିଳିବାରୁ କ୍ରୀଡ଼ା ମନ୍ତ୍ରାଳୟ ତଦନ୍ତ ଉପରେ ରୋକ ଲଗାଇ ଦେଇଛି । ଏ ନେଇ ଆଜି ମନ୍ତ୍ରାଳୟ ପକ୍ଷରୁ ଘୋଷଣା କରାଯାଇଛି ।
୨୦୧୧ରେ ଶ୍ରୀଲଙ୍କା କ୍ରୀଡ଼ାମନ୍ତ୍ରୀ ଥିବା ମହିଦାନନ୍ଦ ଅଲୁଥଗମାଗେ ବିଶ୍ୱକପ୍ରେ ଫିକ୍ସିଂ ହୋଇଥିବା ଅଭିଯୋଗ ଆଣିଥିଲେ । ଏହାପରେ ସାରା ଦେଶରେ ହଇଚଇ ସୃଷ୍ଟି ହୋଇଥିଲା । ଶ୍ରୀଲଙ୍କାର ଯୁବ ସଂଗଠନ ସାମାଙ୍ଗି ଜାନ ବାଲାଓ୍ୱେଗୟା ରାସ୍ତାକୁ ଓହ୍ଲାଇ ଜେରାକୁ ବିରୋଧ କରିବା ସହ ନିଜ ପ୍ରିୟ ଖେଳାଳିଙ୍କୁ ସମର୍ଥନ ଜଣାଇଥିଲେ । ସେଠାକାର କ୍ରୀଡ଼ା ମନ୍ତ୍ରାଳୟ ସମ୍ମୁଖରେ ସେମାନେ ପ୍ରତିବାଦ ଜଣାଇଥିଲେ ।
୨୦୧୧ ବିଶ୍ୱକପ୍ରେ ଫିକ୍ସିଂ ଅଭିଯୋଗ: ସାଙ୍ଗାକାରାଙ୍କୁ ଜେରା, ଶ୍ରୀଲଙ୍କାରେ ପ୍ରତିବାଦ
