ପୁଣି ରାଜ୍ୟସଭାରେ ସସ୍ମିତ ଉଠାଇଲେ ମହିଳାଙ୍କ ସଂରକ୍ଷଣ ପ୍ରସ୍ତାବ
ନୂଆଦିଲ୍ଲୀ: ନେତୃତ୍ବ ଦେବାରେ ମହିଳାଙ୍କ ଭୂମିକାକୁ ପ୍ରାଧାନ୍ୟ ଦେବା ନେଇ ରାଜ୍ୟ ସଭାରେ ପୁଣି ପ୍ରସ୍ତାବ ଉଠାଇଲେ ସାଂସଦ ସସ୍ମିତ । ମହିଳାଙ୍କ ଅଂଶଗ୍ରହଣକୁ ନିଶ୍ଚିତ କରାଯାଉ । ନେତୃତ୍ବ ନେବା ପାଇଁ ମହିଳାଙ୍କୁ ସୁଯୋଗ ଦିଆଯାଉ । ଏନେଇ ରାଜ୍ୟସଭାର ଶୂନ୍ୟକାଳରେ ପ୍ରସଙ୍ଗ ଉଠାଇଲେ ବିଜେଡି ସାଂସଦ ସସ୍ମିତ ପାତ୍ର ।
ଶୂନ୍ୟକାଳରେ ପ୍ରସଙ୍ଗ ଉଠାଇବା ସହ ମହିଳାଙ୍କୁ 33% ସଂରକ୍ଷଣ ଦାବି ରଖିଛନ୍ତି ସସ୍ମିତ । ଉଭୟ ସଂସଦ ଓ ରାଜ୍ୟ ବିଧାନସଭାରେ ସଂରକ୍ଷଣ ଦାବି କରିଛନ୍ତି ସସ୍ମିତ । ସଂରକ୍ଷଣ ମିଳିଲେ ରାଜନୀତିରେ ମହିଳାଙ୍କ ନେତୃତ୍ୱ ବୃଦ୍ଧି ପାଇବ । ଏହା ଦ୍ୱାରା ଲିଙ୍ଗଗତ ବୈଷମ୍ୟ ଦୂର ହେବ ବୋଲି କହିଛନ୍ତି ସସ୍ମିତ ପାତ୍ର । ଏଥିସହ ମାନବ ଚାଲଣ ନିରୋଧ ବିଲକୁ ତୁରନ୍ତ ପାସ୍ କରିବାକୁ ଦାବି କରିଛନ୍ତି ।
ମହିଳାଙ୍କୁ ସଂରକ୍ଷଣ ନେଇ 2018ରେ ଏହି ବିଲ ଲୋକସଭାରେ ପାସ୍ ହୋଇଥିଲା । ତେବେ 2019ରେ ଲୋକସଭା ଭାଙ୍ଗିବା ସହ ବିଲ୍ଟି ଅକାମୀ ହୋଇଯାଇଛି । ଏହାକୁ ଲାଗୁକଲେ ନେତୃତ୍ବ ଭୂମିକାରେ ମହିଳାମାନଙ୍କର ଅଧିକ ଅଂଶଗ୍ରହଣକୁ ସୁନିଶ୍ଚିତ କରାଯାଇପାରିବ । ସେହିପରି ଏହି ବିଲକୁ ଗୃହରେ ପାସ କରାଯାଉ ବୋଲି ସଂସଦରେ ଅନୁରୋଧ କରିଥିଲେ ସସ୍ମିତ ।
