ଅର୍ଣ୍ଣବଙ୍କୁ ମିଳିଲା ଜାମିନ, ଆତ୍ମହତ୍ୟା ପାଇଁ ଉସ୍କାଇଥିବା ମାମଲାରେ ଯାଇଥିଲେ ଜେଲ୍
ନୂଆଦିଲ୍ଲୀ: ଅର୍ଣ୍ଣବଙ୍କୁ ମିଳିଲା ଜାମିନ୍ । ସୁପ୍ରିମ୍କୋର୍ଟ ବୁଧବାର ଅର୍ଣ୍ଣବଙ୍କ ଜାମିନ ଆବେଦନର ଶୁଣାଣି କରି ଅନ୍ତରୀଜ ଜାମିନ ପ୍ରଦାନ କରିଛନ୍ତି । ଜଷ୍ଟିସ୍ ଧନଞ୍ଜୟ ଓ୍ୱାଇ. ଚନ୍ଦ୍ରଚୁଡ଼ ଏବଂ ଜଷ୍ଟିସ୍ ଇନ୍ଦିରା ବାନାର୍ଜୀଙ୍କ ଏକ ଖଣ୍ଡପୀଠ ତାଙ୍କୁ ଜାମିନ ପ୍ରଦାନ କରିଛନ୍ତି । ୫୦ ହଜାର ଟଙ୍କାର ବେଲ୍ ବଣ୍ଡରେ ତାଙ୍କୁ ଜାମିନ ଦିଆଯାଇଛି ଏବଂ ତୁରନ୍ତ ଏନେଇ ପଦକ୍ଷେପ ନେବାକୁ ପୋଲିସ କମିଶନରଙ୍କୁ ନିର୍ଦ୍ଦେଶ ରହିଛି । ୨୦୧୮ରେ ଆତ୍ମହତ୍ୟା ପାଇଁ ଉସ୍କାଇଥିବା ଏକ ମାମଲାରେ ଅର୍ଣ୍ଣବଙ୍କୁ ମହାରାଷ୍ଟ୍ର ପୋଲିସ ଗିରଫ କରିଥିଲା ।
ତେବେ ଏହି ଜାମିନ ଆବେଦନର ଶୁଣାଣି ବେଳେ ମାହାରାଷ୍ଟ୍ର ସରକାରଙ୍କୁ ପାଲଟା ପ୍ରଶ୍ନ କରିଥିଲେ ସୁପ୍ରିମ୍କୋର୍ଟ । ସେ କହିଥିଲେ ଜଣେ ବ୍ୟକ୍ତିର ବ୍ୟକ୍ତିଗତ ସ୍ୱାଧୀନତା ଉପରେ ପ୍ରତିବନ୍ଧକ ଲଗାଇବା ନ୍ୟାୟକୁ ଉପହାସ କରିବ ସହ ସମାନ । ଏଭଳି ମାମଲାରେ ଅର୍ଣ୍ଣବ ଗୋସ୍ୱାମୀଙ୍କୁ ଅଟକ ରଖି ପଚରାଉଚରା କରିବାର କ’ଣ ନିହାତି ଆବଶ୍ୟକତା ରହିଛି ? କାରଣ ଏହା ବ୍ୟକ୍ତିଗତ ଜୀବନ ସହ ଜଡିତ ଏକ ମାମଲା । ଖଣ୍ଡପୀଠ ଆହୁରି କହିଥିଲେ ଯେ, ଭାରତୀୟ ଗଣତନ୍ତ୍ରରେ ଅସାଧାରଣ ସହନଶକ୍ତି ରହିଛି ତେଣୁ ମହାରାଷ୍ଟ୍ର ସରକାର ଏସବୁକୁ ଅଣଦେଖା କରିବା ଉଚିତ୍ ।
ଜଷ୍ଟିସ୍ ଚନ୍ଦ୍ରଚୁଡ଼ କହିଥିଲେ, ‘ସେମାନଙ୍କର ଆଦର୍ଶ ଯାହା ବି ହେଉ, ଅନ୍ତତଃ ପକ୍ଷେ ମୁଁ ସେହି ଚ୍ୟାନେଲ୍ ଦେଖେ ନାହିଁ । କିନ୍ତୁ ଯଦି କୋର୍ଟ ଆଜି ଏହି ପ୍ରସଙ୍ଗରେ ହସ୍ତକ୍ଷେପ ନକରନ୍ତି ତେବେ ଅଜାଣତରେ ଆଗାମୀ ଦିନରେ ଆମେ ଧ୍ୱଂସ ଆଡ଼କୁ ଗତି କରିବା ।’ ଖଣ୍ଡପୀଠ କହିଥିଲେ ଯେ, ଟିଭିରେ ଏଭଳି ଆରୋପ ଯୋଗୁଁ କ’ଣ ମହାରାଷ୍ଟ୍ର ସରକାର ଜଣେ ବ୍ୟକ୍ତିଙ୍କୁ ତାଙ୍କ ବ୍ୟକ୍ତିଗତ ସ୍ୱାଧୀନତାରୁ ବଞ୍ଚିତ କରିବା ଉଚିତ୍ କି ?
ସୁପ୍ରିମକୋର୍ଟ ଏହା ମଧ୍ୟ କହିଥିଲେ ଯେ, ହାଇକୋର୍ଟ ଲୋକମାନଙ୍କୁ ଜାମିନ ପ୍ରଦାନ କରୁନାହାଁନ୍ତି ଏବଂ ସେମାନଙ୍କର ବ୍ୟକ୍ତିଗତ ସ୍ୱାଧୀନତା ରକ୍ଷା କରିବାରେ ବିଫଳ ହେଉଛନ୍ତି । ଏଭଳି ଅନେକ ମାମଲା ଏବେ ସାମ୍ନାକୁ ଆସୁଛି । ଅନ୍ୟପଟେ ସୁପ୍ରିମକୋର୍ଟରେ ଅର୍ଣ୍ଣବ ଗୋସ୍ୱାମୀଙ୍କ ଓକିଲ ହରିଶ୍ ସାଲ୍ଭେ ଏହି ଘଟଣାର ସିବିଆଇ ତଦନ୍ତ ପାଇଁ ଦାବି କରିଛନ୍ତି ।
