ପୁଅ ବାହାଘର ପାଇଁ ଛୁଟି ମାଗିଥିଲେ ଥାନାବାବୁ, ଉପରିସ୍ଥ ଅଧିକାରୀ ମନା କଲେ ! ଚାଲିଗଲା ଜୀବନ…

ରାଜସ୍ଥାନ: ଛୁଟି ନମିଳିବାରୁ ଚାଲିଗଲା ଥାନାଧିକାରୀଙ୍କ ଜୀବନ । ପୁଅ ବାହାଘର ପାଇଁ ମାଗିଥିଲେ ଛୁଟି । ହେଲେ ଉପରିସ୍ଥ ଅଧିକାରୀଙ୍କଠାରୁ ଅନୁମତି ନମିଳିବାରୁ ତାଙ୍କୁ ଗଭୀର ଆଘାତ ଲାଗିଥିଲା । ଆଉ ଏଥିରେ ସେ ମୃତ୍ୟୁ ବରଣ କରିଛନ୍ତି । ଏଭଳି ଘଟଣା ଭରପୁର ଜିଲ୍ଲାରେ ଘଟିଥିବା ଜଣାପଡ଼ିଛି । ଉଚ୍ଚେନ‌ ଥାନାଧିକାରୀ ହୋସିଆର ସିଂହ ତାଙ୍କ ପୁଅ ବିବାହର ୧୦ ଦିନ ପୂର୍ବରୁ ମେଡିକାଲରେ ଶେଷ ନିଶ୍ୱାସ ତ୍ୟାଗ କରିଛନ୍ତି । ହେଲେ ଅନ୍ୟପଟେ ଭାରପ୍ରାପ୍ତ ଏସ୍‌ପି କହିଛନ୍ତି ହୋସିଆର ସିଂହଙ୍କ କରୋନାରେ ମୃତ୍ୟୁ ହୋଇଛି । ହେଲେ ହୋସିଆରଙ୍କ ସାଥି ସହଯାଗୀ କହିଛନ୍ତି ସେ ଶନିବାର ରାତି ପର୍ଯ୍ୟନ୍ତ ଥାନାରେ ଡ୍ୟୁଟିରେ ଥିଲେ ।

୧୬ରେ ପୁଅର ନିର୍ବନ୍ଧ ଥିଲା, କିନ୍ତୁ ଛୁଟି ମିଳିନଥିଲା

ନଭେମ୍ବର ୧୬ରେ ହୋସିଆର ସିଂଙ୍କ ପୁଅର ନିର୍ବନ୍ଧ ଓ ଟିକା ରୀତିନୀତି ହେବାର ଥିଲା । କିନ୍ତୁ ତାଙ୍କ ଉପରିସ୍ଥ କର୍ମଚାରୀମାନେ ତାଙ୍କର ଛୁଟି ମଞ୍ଜୁର କରିନଥିଲେ । ୨୨ ତାରିଖରେ ବିବାହ କାର୍ଯ୍ୟ ସମ୍ପନ୍ନ ହେବାର ଥିଲା । ହୋସିଆର ଟୋଙ୍କ ଜିଲ୍ଲାର ମୂଳ ବାସିନ୍ଦା । ପାରିବାରିକ କାର୍ଯ୍ୟକ୍ରମ ପାଇଁ ଛୁଟି ନଦିଆଯିବାରୁ ସେ ଗତ କିଛି ଦିନ ହେବ ଡିପ୍ରେସନରେ ଥିଲେ ।

ଥନାରେ ଭୋ-ଭୋ ହୋଇ କାନ୍ଦୁଥିଲେ

ସୂଚନାନୁଯାୟୀ, ବୁଧବାର ରାତିରେ ଥାନାରେ ହୋସିଆର ନିଜ କୋଠରୀରେ ଭୋଭୋ ହୋଇ କାନ୍ଦୁଥିଲେ । ଏହା ପରେ ତାଙ୍କ ସ୍ୱାସ୍ଥ୍ୟାବସ୍ଥା ଖରାପ ହୋଇଥିଲା, ତାଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ପ୍ରଥମେ ତାଙ୍କୁ ଉଚ୍ଚେନ୍ ମେଡିକାଲରେ ଭର୍ତ୍ତି କରାଯାଇଥିଲା, ସେଠାରେ ପରୀକ୍ଷା ହେବା ପରେ ଜଣାପଡ଼ିଥିଲା ଯେ ତାଙ୍କର ରକ୍ତ ଚାପ ବଢ଼ିଯାଇଛି । ଏହା ପରେ ତାଙ୍କୁ ଭରତପୁର ମେଡିକାଲରେ ଭର୍ତ୍ତି କରାଗଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।

ତେବେ ହୋସିଆରଙ୍କ ପୁଅ କହିଛନ୍ତି ଯେ, ଛୁଟି ମିଳିନଥିବା ସମସ୍ୟା କଥା ବାପା ପରିବାର ସହ ଆଲୋଚନା କରିନାହାନ୍ତି । ରାତିରେ କଥା ହେବା ବେଳେ ଲାଗୁଥିଲା ଯେ ତାଙ୍କର ସ୍ୱାସ୍ଥ୍ୟାବସ୍ଥା ଖରାପ ଅଛି ।

ଭାରପ୍ରାପ୍ତ ଏସ୍‌ପିଙ୍କ ସଫେଇ: କରୋନାରେ ହୋଇଛି ମୃତ୍ୟୁ

ଭାରତପୁର ଭାରପ୍ରାପ୍ତ ଏସ୍‌ପି ମୁଲ ସିଂହ ରାଣା କହିଛନ୍ତି, କରୋନା ଆକ୍ରାନ୍ତ ହେବା କାରଣରୁ ହୋସିଆରଙ୍କ ମୃତ୍ୟୁ ଘଟିଛି । ମୃତ୍ୟୁ ପରେ ତାଙ୍କ ମୃତଦେହର ଯାଞ୍ଚ କରାଯାଇଥିଲା, ସେଥିରେ ସେ କରୋନା ପଜିଟିଭ୍‌ ଥିବା ଜଣାପଡ଼ିଥିଲା । ଛୁଟି ମିଳିନଥିବା କଥା ସମ୍ପୂର୍ଣ୍ଣ ଭିତ୍ତିହୀନ । ଏହି ଅଞ୍ଚଳରେ ଗୁର୍ଜର ଆନ୍ଦୋଳନ ଚାଲିଥିଲା । ତେଣୁ ସବୁଙ୍କର ଛୁଟି ବାତିଲ କରାଯାଇଥିଲା । କିନ୍ତୁ ଏବେ ସେଭଳି କୌଣସି ପରସ୍ଥିତି ନାହିଁ । ସେ ୧୪  ନଭେମ୍ବରରୁ ୭ ଡିସେମ୍ବର ପର୍ଯ୍ୟନ୍ତ ଛୁଟି ମାଗିଥିଲେ । ଯାହାକି ମଞ୍ଜୁର କରାଯାଇଥିଲା । ୧୦ ତାରିଖରୁ ଛୁଟି ମଞ୍ଜୁର କରାଯିବା ସହ ୧୧ ତାରିଖରୁ ଏନେଇ ନିର୍ଦ୍ଦେଶ ଦିଆଯାଇଛି ।

ଛୁଟି ନାମଞ୍ଜୁର ନେଇ ଚର୍ଚ୍ଚା

ଛୁଟି ମଞ୍ଜୁର ହୋଇଥିବା ନେଇ ଭାରପ୍ରାପ୍ତ ଏସ୍‌ପି ସଫେଇ ଦେଉଥିଲେ ମଧ୍ୟ, ସହକର୍ମୀଙ୍କ ଅନୁଯାୟୀ ହୋସିଆର ଛୁଟିକୁ ନେଇ ଚିନ୍ତିତ ଥିଲେ । ଭରତପୁରରେ ୧୨ ଦିନ ଧରି ଗୁର୍ଜର ଆନ୍ଦୋଳନ ଚାଲିଥିଲା । ଏଭଳି ପରିସ୍ଥିତିରେ ସବୁ ପୋଲିସ କର୍ମଚାରୀଙ୍କ ଛୁଟି ବାତିଲ କରାଯାଇଥିଲା । ଏହି କଥାକୁ ନେଇ ହୋସିଆର ଟେନ୍‌ସନ୍‌ରେ ଥିଲେ ।