ସିନେ ତାରକା ତଥା ସମାଜସେବୀ ସବ୍ୟସାଚୀଙ୍କୁ ସମ୍ମାନିତ କରିବ ଓଡ଼ିଶା ସ୍କାଉଟ ଗାଇଡ୍ ସଂସ୍ଥା
ଭୁବନେଶ୍ୱର: ଓଡ଼ିଆ ଚଳଚିତ୍ରର ଲୋକପ୍ରିୟ ତାରକା ସବ୍ୟସାଚୀ ମିଶ୍ର । କେବଳ ଅଭିନୟ ନୁହେଁ, ସମାଜସେବା ପାଇଁ ମଧ୍ୟ ସେ ବେଶ୍ ପରିଚିତ । କରୋନା ମହାମାରୀ ସମୟରେ ବିଭିନ୍ନ ସ୍ଥାନରେ ଫସିଥିବା ଲୋକଙ୍କୁ ସହାୟତା କରିବା, ଅସହାୟଙ୍କ ମୁହଁରେ ହସ ଫୁଟାଇପାରିଥିଲେ । ତାଙ୍କର ଏହି କାର୍ଯ୍ୟ ଏବେ ବି ଅବ୍ୟାହତ ରହିଛି । କେହି କେହି ତ ତାଙ୍କୁ ଓଡ଼ିଶାର ସୋନୁ ସୁଡ୍ ବୋଲି କହିଲେଣି । ଏହିପରି ପରୋପକାର କାର୍ଯ୍ୟ ସବ୍ୟସାଚୀଙ୍କ ପାଇଁ ଅନେକ ପ୍ରଶଂସା ଏବଂ ପୁରସ୍କାର ଆଣିଛି ।
ସେହିକ୍ରମରେ ସବ୍ୟସାଚୀ ମିଶ୍ରଙ୍କୁ ଇଣ୍ଡିଆନ ସ୍କାଉଟ ଓ ଗାଇଡ୍ ଫେଲୋସିପ , ଓଡ଼ିଶା ଶାଖା ପକ୍ଷରୁ ସମ୍ମାନିତ କରାଯିବ । ଏ ସମ୍ପର୍କିତ ଏକ ନିଷ୍ପତ୍ତି ଓଡ଼ିଶା ରାଜ୍ୟ ସ୍କାଉଟ ଓ ଗାଇଡର କାର୍ଯ୍ୟକାରିଣୀରେ ନିଷ୍ପତ୍ତି ନିଆଯାଇଛି । ଜାତିର ପିତା ମହାତ୍ମାଗାନ୍ଧୀ ସମ୍ମାନ ନାମରେ ନାମିତ ଏହି ପୁରସ୍କାର ସବ୍ୟ ପାଇବାକୁ ଯାଉଛନ୍ତି । ସବ୍ୟଙ୍କୁ ବାଦ ଦେଲେ କର୍ନାଟକ ରାଜ୍ୟର ଯଥା ଭାରତୀୟ ସ୍କାଉଟ ଗାଇଡ୍ ର ସଭାପତି ଏସ୍.କେ ମିଶ୍ରଙ୍କୁ ଲାଲବାହାଦୂର ଶାସ୍ତ୍ରୀ ସମ୍ମାନ ପ୍ରଦାନ କରାଯିବ ।
କାର୍ଯ୍ୟକାରିଣୀ ବୈଠକରେ ସଭାପତି କାଳି ମିଶ୍ର, ପଦ୍ମଶ୍ରୀ ଦିଲ୍ଲୀପ ତିର୍କୀ, ଅଭିନେତ୍ରୀ ଅର୍ଚ୍ଚିତା ସାହୁ ଏବଂ ଅନ୍ୟମାନଙ୍କ ମଧ୍ୟରେ ଗୁରୁ ପୀତାମ୍ବର ବିଶ୍ୱାଳ, ସମ୍ପାଦକ ଋଷି ପଟ୍ଟନାୟକ , ଡକ୍ଟର ପ୍ରଣବ ମହାପାତ୍ର, ସଂସ୍ଥାର ଓଡ଼ିଶା ସୂଚନା ଅଧିକାରୀ ଗଜେନ୍ଦ୍ର ନାଥ ବେହେରା ପ୍ରମୁଖ ଉପସ୍ଥିତ ଥିଲେ ।
