ଭାରତ ବନ୍ଦ, ଘୁଞ୍ଚିଲା ଓସିଏସ୍ ପରୀକ୍ଷା
ଭୁବନେଶ୍ୱର: ଭାରତ ବନ୍ଦ ଯୋଗୁଁ ଘୁଞ୍ଚିଲା ଓସିଏସ୍ ପରୀକ୍ଷା । ମଙ୍ଗଳବାର ସାରା ଦେଶରେ ଚାଷୀ ସଂଗଠନ ପକ୍ଷରୁ ବନ୍ଦ ଡାକରା ଦିଆଯାଇଛି । ତେଣୁ ରାଜ୍ୟ ସରକାରଙ୍କ ପକ୍ଷରୁ ଓସିଏସ୍ ପରୀକ୍ଷାକୁ ଆସନ୍ତାକାଲି ବାତିଲ କରାଯାଇଛି । ଏହି ପରୀକ୍ଷାକୁ ଆଗାମୀ ଜାନୁଆରୀ ଦୁଇ ତାରିଖରେ କରାଯିବ ବୋଲି ନିଷ୍ପତି ହୋଇଛି । ଏନେଇ ଓଡ଼ିଶା ପବ୍ଲିକ୍ ସରଭିସ୍ କମିଶନଙ୍କ ପକ୍ଷରୁ ସୂଚନା ଦିଆଯାଇଛି ।
ଚାଷୀ ଆନ୍ଦୋଳନ ସମୟରେ ଗାଡ଼ି ମଟର ବନ୍ଦ ରହିବ । ଗଳିକନ୍ଦିରେ ଆନ୍ଦୋଳନକାରୀ ପିକେଟିଂ କରିବେ । ତେଣୁ ଗମନାଗମନ ବା ଯାତାୟତରେ ଅନେକ ବାଧା ସୃଷ୍ଟି ହୋଇପାରେ । ତେଣୁ ଏହାକୁ ଦୃଷ୍ଟିରେ ରଖି ରାଜ୍ୟ ସରକାରଙ୍କ ପକ୍ଷରୁ ପରୀକ୍ଷାକୁ ଘୁଞ୍ଚାଯାଇଛି । ଜାନୁଆରୀ ୨ରେ ପରୀକ୍ଷା ହେବା ନେଇ ନିଷ୍ପତି ହୋଇଛି । ତେବେ ପରୀକ୍ଷା କେନ୍ଦ୍ରରେ କିମ୍ବା ପରୀକ୍ଷା ସମୟରେ କୌଣସି ପରିବର୍ତ୍ତନ ହେବ ନାହିଁ । ଏହା କୌଣସି ନୂଆ ଆବେଦନ ମଧ୍ୟ ଗ୍ରହଣ କରାଯିବ ନାହିଁ ବୋଲି ଓଡ଼ିଶା ପବ୍ଲିକ୍ ସରଭିସ୍ କମିଶନଙ୍କ ପକ୍ଷରୁ ଜାରି ବିଜ୍ଞପ୍ତିରେ କୁହାଯାଇଛି ।
