ଆଜିଠୁ ନୀତୀଶଙ୍କ ନୂଆ ଇନିଂସ, ଅପରାହ୍ନରେ ମୁଖ୍ୟମନ୍ତ୍ରୀ ଭାବେ ନେବେ ଶପଥ
ପଟଣା: ଆଜିଠୁ ପୁଣି ବିହାରରେ ନୀତୀଶ ରାଜ । ମୁଖ୍ୟମନ୍ତ୍ରୀ ଭାବେ ଶପଥ ନେବେ ନୀତୀଶ କୁମାର । ଅପରାହ୍ନରେ ହେବ ଶପଥ ଗ୍ରହଣ କାର୍ଯ୍ୟକ୍ରମ । ଶପଥ ଉତ୍ସବରେ ଏନଡିଏର ବରିଷ୍ଠ ନେତାଙ୍କ ସହ ସମସ୍ତ ବିଧାୟକମାନେ ଉପସ୍ଥିତ ରହିବେ। କିଛି ମନ୍ତ୍ରୀ ମଧ୍ୟ ଶପଥ ନେବାର କାର୍ଯ୍ୟକ୍ରମ ରହିଛି । ସପ୍ତମ ଥର ପାଇଁ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ନୀତୀଶ କୁମାର । ନୀତୀଶଙ୍କ ନାଁରେ ଗତକାଲି ବସିଥିବା ଏନ୍ଡିଏ ବିଧାୟକ ଦଳ ବୈଠକରେ ମୋହର ବାଜିଥିଲା ।
ତେବେ କିଏ ହେବେ ବିହାରର ଉପମୁଖ୍ୟମନ୍ତ୍ରୀ ତାକୁ ନେଇ ସସପେନ୍ସ ଲାଗିରହିଛି । ସୁଶୀଲ ମୋଦିଙ୍କ ସ୍ଥାନରେ ବିଜେପି ନୂଆ ଚେହେରା ଦେବା ପାଇଁ ଚାହୁଁଥିବା ଚର୍ଚ୍ଚା ହେଉଛି । ତାରକିଶୋର ପ୍ରସାଦ ବିଧାନସଭାରେ ବିଜେପି ନେତା ମନୋନୀତ ହୋଇଛନ୍ତି । ନୀତୀଶଙ୍କ ମନ୍ତ୍ରିମଣ୍ଡଳରେ ବିଜେପିର ଦବ୍ଦବା ରହିବା ନିଶ୍ଚିତ ହୋଇଛି । ହାମ୍ ଓ ଭିଆଇପି ଦଳକୁ ମଧ୍ୟ ଗୁରୁତ୍ବ ଦେବ ଏନ୍ଡିଏ । ନିର୍ବାଚନରେ ଜେଡିୟୁକୁ ମାତ୍ର ୪୩ଟି ଆସନ ମିଳିଥିଲେ ମଧ୍ୟ ପୂର୍ବ ରଣନୀତି ଅନୁସାରେ ନୀତୀଶଙ୍କୁ ମୁଖ୍ୟମନ୍ତ୍ରୀ କରିବା ପାଇଁ ବିଜେପି ମନବଳାଇଛି ।
