ସଂସଦ ଭବନ ଆକ୍ରମଣକୁ ୧୯ ବର୍ଷ; ଶ୍ରଦ୍ଧାଞ୍ଜଳି ଅର୍ପଣ କଲେ ପ୍ରଧାନମନ୍ତ୍ରୀ

ନୂଆଦିଲ୍ଲୀ: ସଂସଦ ଭବନ ଆକ୍ରମଣକୁ ଆଜି ପୁରିଛି ୧୯ ବର୍ଷ । ସେହି ଦିନର ହୃଦୟ ବିଦାରକ ଦୃଶ୍ୟକୁ ଆଜିବି ଭୁଲି ପାରି ନାହାଁନ୍ତି ଦେଶବାସୀ ।

ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଟ୍ୱିଟ୍ କରି କହିଛନ୍ତି, ‘‘ଆମ ସଂସଦ ଉପରେ ହୋଇଥିବା ଆକ୍ରମଣକୁ ଦେଶବାସୀ କେବେ ବି ଭୁଲି ପାରିବେ ନାହିଁ । ଏହି ଆକ୍ରମଣରେ ପ୍ରାଣ ହରାଇଥିବା ଯବାନମାନଙ୍କୁ ସାରା ଦେଶ ଶ୍ରଦ୍ଧାଞ୍ଜଳି ଅର୍ପଣ କରୁଛି । ବୀର ସୈନିକମାନଙ୍କ ପ୍ରତି ଦେଶ ସର୍ବଦା କୃତଜ୍ଞ ରହିବ’’।

We will never forget the cowardly attack on our Parliament on this day in 2001. We recall the valour and sacrifice of those who lost their lives protecting our Parliament. India will always be thankful to them.

— Narendra Modi (@narendramodi) December 13, 2020

୨୦୦୧ ମସିହା ଡିସେମ୍ବର ମାସ ୧୩ ତାରିଖରେ ପାକିସ୍ତାନର ଆତଙ୍କବାଦୀ ସଂଗଠନ ଜୈଶ-ଏ-ମହମ୍ମଦ ଏବଂ ଲସ୍କର-ଏ-ତୋଏବାର ସଦସ୍ୟମାନେ ସଂସଦ ଭବନ ପରିସରରେ ଆକ୍ରମଣ କରିଥିଲେ। ଏହି ସମୟରେ ସୁରକ୍ଷାକର୍ମୀଙ୍କ ସହ ଆତଙ୍କବାଦୀ ମୁହାଁମୁହିଁ ହୋଇଥିଲେ । ଏପରିକି ଉଭୟ ପକ୍ଷରୁ ୩୦ ମିନିଟ୍ ଧରି ଗୁଳି ବିନିମୟ ହୋଇଥିଲା ବେଳେ ଯବାନଙ୍କ ଗୁଳିରେ ୫ ଆତଙ୍କବାଦୀ ନିହତ ହୋଇଥିଲେ ।

ସେହିପରି ଦିଲ୍ଲୀ ପୋଲିସର ପାଞ୍ଚଜଣ ସୁରକ୍ଷା କର୍ମୀ, ସିଆରପିଏଫର ଜଣେ ମହିଳା କନଷ୍ଟେବଳ ଏବଂ ସଂସଦର ଦୁଇଜଣ ସୁରକ୍ଷା ସହାୟକଙ୍କର ମୃତ୍ୟୁ ଘଟିଥିଲା । ଏହାବ୍ୟତୀତ ଏଥିରେ ଜଣେ ମାଳି ଏବଂ ଜଣେ ଫଟୋ ଜର୍ନାଲିଷ୍ଟ ମଧ୍ୟ ପ୍ରାଣ ହରାଇଥିଲେ ।

ଶୀତକାଳୀନ ଅଧିବେଶନ ଚାଲିଥିବା ବେଳେ ଏହି ଆକ୍ରମଣ ହୋଇଥିଲା । ପରେ ଆତଙ୍କବାଦୀଙ୍କ ଭାରତୀୟ ସହଯୋଗୀ ଅଫଜଲ ଗୁରୁ, ସୌକତ୍ ହୁସେନ୍, ସାର ଗିଲାନି ଏବଂ ନବଜୋତ ସାନ୍ଧୁଙ୍କୁ ଗିରଫ କରାଯାଇଥିଲା । ଏହି ଆତଙ୍କବାଦୀ ଆକ୍ରମଣର ମାଷ୍ଟର ମାଇଣ୍ଡ ମସୁଦ୍ ଆଝାର ଏବେ ବି ପାକିସ୍ତାନରେ ଲୁଚି ରହିଥିବା ଜଣାପଡିଛି ।