ଧାନ ଖଳାରେ ଭୟାବହ ଅଗ୍ନିକାଣ୍ଡ, ୧୦ରୁ ଊର୍ଦ୍ଧ୍ୱ ଚାଷୀଙ୍କ ଅମଳ ନଷ୍ଟ

ନବରଙ୍ଗପୁର: ନିମିଷକେ ଧୂଳିସାତ୍ ହୋଇଗଲା ସ୍ୱପ୍ନ । ପାଉଁଶ ହୋଇଗଲା ବର୍ଷ ଯାକର ପରିଶ୍ରମ । ନିଆଁ ଆଁରେ ଜଳି ଯାଇଛି ଧାନ ଖଳାରେ ଥିବା ଏକର ଏକର ଫସଲ । ଚାଷୀଙ୍କ ମେରୁଦଣ୍ଡ ଭାଙ୍ଗି ଦେଇଛି ଧାନ ଖଳାରେ ଲାଗିଥିବା ନିଆଁ । ନବରଙ୍ଗପୁର ଜିଲ୍ଲା ଡାବୁଗାଁ ବ୍ଲକ ଜୁନାପାଣି ପଞ୍ଚାୟତ ରାବଣାଗୁଡ଼ା ଗାଁରେ ଘଟିଛି ନିଆଁ ଲାଗି ଜଳି ଯାଇଛି ଧାନ ଖଳା । ୧୦ରୁ ଊର୍ଦ୍ଧ୍ୱ ଚାଷୀଙ୍କ ଧାନ ଗଦାରେ ନିଆଁ ଲାଗି ୮୦ ଏକରରୁ ଅଧିକ ଧାନ ଫସଲ ପୋଡ଼ି ଯାଇଛି ।

ରାବଣାଗୁଡ଼ା ଗାଁର ଧାନ ଖଳାରେ ୧୦ରୁ ଅଧିକ ଚାଷୀଙ୍କ ପ୍ରାୟ ୮୦ ଏକରର ଧାନ ଗଦା ଏକାଠି ଥିଲା । ତେବେ କୌଣସି କାରଣରୁ ଅଚାନକ ଗୋଟିଏ ଧାନ ଗଦାରେ ନିଆଁ ଲାଗି ଯାଇଥିଲା । କେହି କିଛି ବୁଝିବା ପୂର୍ବରୁ ହଠାତ୍ ନିଆଁ କରାଳ ରୂପ ଧାରଣ କରି ଗୋଟିଏ ପରେ ଗୋଟିଏ ଏଭଳି ପାଖାପାଖି ଥିବା ଧାନ ଗଦାକୁ କବଳିତ କରି ନେଇଥିଲା । ଗ୍ରାମବାସୀ ନିଜେ ନିଆଁ ଲିଭାଇବାକୁ ଚେଷ୍ଟା କରିବା ସହିତ ଅଗ୍ନିଶମ ବିଭାଗକୁ ଖବର ଦେଇଥିଲେ ।

ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ ମଧ୍ୟ ଧାନ ସବୁ ପୋଡ଼ି ଯାଇଛି । ଗୁରୁବନ୍ଧୁ ଭତ୍ରା, ମାଧବ ଭତ୍ରା, ଚୈତନ୍ୟ ଭତ୍ରା, ଗଙ୍ଗାଧର ଭତ୍ରା, କୁମ ଭତ୍ରା, ମାନସିଂ ଭତ୍ରା, ବଂଶୀ ଭତ୍ରା , ବନସିଂ ଭତ୍ରା, ଉର୍ଭବ ଭତ୍ରା, ଖଗ ଗୌଡ଼, ସୁରେନ୍ଦ୍ରଭତ୍ରା, ମାଧବ ଗୌଡ଼, ମକରନ୍ଦ ଭତ୍ରା, ଭଗନୁ ଭତ୍ରା, ଘାସିରାମ ପୂଜାରୀ, ଚାଷୀଙ୍କ ଧାନ ଫସଲ ପୋଡି ଯାଇଥିବା ସୂଚନା ମିଳିଛି । ୧୪ ଚାଷୀ ଙ୍କ ପ୍ରାୟ ୧ ହଜାର କ୍ୱିଣ୍ଟାଲ ଧାନ ନଷ୍ଟ ହୋଇଥିବା ସୂଚନା ମିଳିଛି । ଡାବୁଗାଁ ବିଧାୟକ ମନୋହର ରନ୍ଧାରୀ ଘଟଣାସ୍ଥଳରେ ପହଞ୍ଚି ନିଆଁ ଲିଭାରେ ସହଯୋଗ କରିଥିଲେ ।