ମୁମ୍ବାଇ: ମହାରାଷ୍ଟ୍ରରେ କରୋନା ସଂକ୍ରମଣ ମାମଲାରେ ବୃଦ୍ଧି ରାଜ୍ୟ ସରକାରଙ୍କ ଚିନ୍ତା ବଢାଇ ଦେଇଛି। ସଂକ୍ରମଣ ଉପରେ କାବୁ ପାଇବା ପାଇଁ ରାଜ୍ୟରେ ଆଗାମୀ କିଛି ଦିନ ମଧ୍ୟରେ କଟକଣା ବଢାଯାଇ ପାରେ କିମ୍ବା ସମ୍ପୂର୍ଣ୍ଣ ଲକଡାଉନ୍ ଘୋଷଣା ହୋଇପାରେ ବୋଲି କୁହାଯାଉଛି । ମହାରାଷ୍ଟ୍ର ସରକାର ଏନେଇ କଠୋର ପଦକ୍ଷେପ ଭାବେ ପୁଣି ଥରେ ଲକଡାଉନ୍ ଲାଗୁ କରିପାରନ୍ତି ବୋଲି କୁହାଯାଉଛି।

ତେବେ ମିଳୁଥିବା ସୂଚନା ଅନୁସାରେ ଏବେ ଗୋଟିଏ ସ୍ଥାନରୁ ଆଉ ଗୋଟିଏ ସ୍ଥାନକୁ ଯାତ୍ରା ଉପରେ ପ୍ରତିବନ୍ଧକ ଲାଗୁ କରିବାର କୌଣସି ପ୍ରସ୍ତାବ ନାହିଁ । ତେବେ ସଂକ୍ରମିତଙ୍କ ସଂଖ୍ୟା ବଢୁଥିବାରୁ ରାଜ୍ୟ ସରକାର ସବୁ ପ୍ରକାରର ବିକଳ୍ପକୁ ଖୋଲା ରଖିଛନ୍ତି । ଆଗାମୀ ଦୁଇରୁ ତିନି ଦିନ ମଧ୍ୟରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ରାଜ୍ୟବାସୀଙ୍କୁ ସମ୍ଭୋଧିତ କରିବେ ବୋଲି କୁହାଯାଉଛି ।

କରୋନା ପ୍ରୋଟୋକଲ ଭାଙ୍ଗିଲେ ଫାଇନ୍
ରାଜ୍ୟରେ କରୋନା କଟକଣାକୁ ଏବେ କଠୋରତାର ସହ ଲାଗୁ କରାଯାଉଛି । କଟକଣା ଭାଙ୍ଗୁଥିବା ବ୍ୟକ୍ତିଙ୍କଠାରୁ ଫାଇନ୍ ଆଦାୟ ହେଉଛି । ରାଜ୍ୟ ସରକାର ସ୍ଥାନୀୟ ଅଧିକାରୀଙ୍କୁ ଆବଶ୍ୟକତା ପଡିଲେ ଲକଡାଉନ୍ ଲାଗୁ କରିବା ଅଧିକାର ମଧ୍ୟ ଦେଇଛନ୍ତି । ମୁମ୍ବାଇରେ ଯେଉଁ ଭଳି ଭାବେ କରୋନା ସଂକ୍ରମିତଙ୍କ ସଂଖ୍ୟା ବଢିବାରେ ଲାଗିଛି ତାକୁ ଦେଖି ଆଗାମୀ ଦିନରେ ସହରର ନାଇଟ୍ କ୍ଲବ ଗୁଡିକ ବନ୍ଦ କରି ଦିଆଯାଇପାରେ ବୋଲି କୁହାଯାଉଛି ।

ମହାରାଷ୍ଟ୍ରରେ କରୋନା ସଂକ୍ରମଣର ୮ ହଜାର ୭୪୪ ନୂଆ ମାମଲା, ୨୨ ମୃତ
ମହାରାଷ୍ଟ୍ରରେ ଗତ ତିନି ଦିନ ମଧ୍ୟରେ ପ୍ରତିଦିନ କରୋନା ସଂକ୍ରମଣର ୧୦ ହଜାର ନୂଆ ମାମଲା ସାମ୍ନାକୁ ଆସିଥିଲା । ସୋମବାର ଦିନ ୮ ହଜାର ୭୪୪ ମାମଲା ସାମ୍ନାକୁ ଆସିଛି । ଏହା ସହିତ ୨୨ ଜଣ କରୋନା ସଂକ୍ରମିତଙ୍କ ମୃତ୍ୟୁ ହୋଇଛି । ରାଜ୍ୟରେ ମୋଟ ୨୨ ଲକ୍ଷ ୨୮ ହଜାର ୪୭୧ କରୋନା ସଂକ୍ରମଣର ମାମଲା ଚିହ୍ନଟ ହୋଇଥିବା ବେଳେ ମୃତକଙ୍କ ସଂଖ୍ୟା ୫୨ ହଜାର ୫ଶହ ରହିଛି ।