ରେଲୱେର ନକଲି ନିଯୁକ୍ତିପତ୍ର ଦେଇ ୩ ଯୁବକଙ୍କୁ ଠକିଲେ ଦୁବୃର୍ତ୍ତ

ଲକ୍ଷ୍ନୗେ: ଉତ୍ତରପ୍ରଦେଶର ଲକ୍ଷ୍ନୗେରେ କିଛି ଯୁବକଙ୍କୁ ରେଳବାଇରେ ଚାକିରି କରାଇଦେବାକୁ କହି ଦୁବୃର୍ତ୍ତମାନେ ୨୦ ଲକ୍ଷ ଟଙ୍କା ଠକି ନେଇଛନ୍ତି ।

ସୂଚନା ଅନୁଯାୟୀ ସିତାପୁରର ବାସିନ୍ଦା ମନୋଜ କୁମାର ଦେଢ ବର୍ଷ ପୂର୍ବେ ଗାଜିପୁରର ନିବାସୀ ନିତ୍ୟାନନ୍ଦ ରାୟଙ୍କ ସହ ଦେଖାହୋଇଥିଲେ । ସେ ସମୟରେ ରେଳବାଇର ୪ର୍ଥ ଶ୍ରେଣୀର ପଦବୀ ପାଇଁ ନିଯୁକ୍ତି ସୁଯୋଗ ଥିବା ଏବଂ ତାଙ୍କର ନିଯୁକ୍ତି କରାଇ ଦେବେ ବୋଲି ପ୍ରଲୋଭନ ଦେଖାଇଥିଲେ ନିତ୍ୟାନନ୍ଦ।

ତା’ପରେ ମନୋଜ ତାଙ୍କ ସମ୍ପର୍କୀୟ ଚନ୍ଦ୍ରମଣି, ପ୍ରବେଶ କୁମାର ଓ ଅମିତ ଭାର୍ଗବଙ୍କୁ ଏସମ୍ପର୍କରେ କହିଥିଲେ । ସରକାରୀ ଚାକିରି ପାଇବା ଆଶାରେ ସେମାନେ ଟଙ୍କା ଖର୍ଚ୍ଚ କରିବାକୁ ରାଜି ହୋଇଯାଇଥିଲେ ।

ପୋଲିସର ସୂଚନା ଅନୁଯାୟୀ ନିତ୍ୟାନନ୍ଦ ସେମାନଙ୍କୁ ରାଞ୍ଚି ଡୋରୋଡା ନିବାସୀ ଅଭିଷେକ ରାୟଙ୍କ ସହ ଦେଖା କରାଇବା ସହ ପଶ୍ଚିମବଙ୍ଗର ଆସନସୋଲରେ ଜଏନିଂ ପାଇ କହିଥିଲେ । ପରେ ମନୋଜ ନିତ୍ୟାନନ୍ଦଙ୍କ ଗାଜିପୁର ସ୍ଥିତ ଘରକୁ ମଧ୍ୟ ଯାଇଥିଲେ । ଯାହା ପରେ ସେ ବ୍ୟାଙ୍କ ଆକାଉଣ୍ଟରେ ୧୫ ଲକ୍ଷ ଓ ୫ ଲକ୍ଷ ଟଙ୍କା ନଗଦ ଟଙ୍କା ଦେଇଥିଲେ ।

ମନୋଜଙ୍କ କହିବାନୁଯାୟୀ ସେମାନେ ତାଙ୍କୁ ଡିଆରଏମ୍ ଅଫିସ ନେବା ସହ ରେଲଓ୍ବେ ଅଧିକାରୀଙ୍କ ଷ୍ଟେନୋଙ୍କ ସହ ଭେଟ କରାଇଥିଲେ । ମନ୍ତ୍ରୀ କୋଟାରେ କିଛି ଲୋକଙ୍କୁ ନିଯୁକ୍ତି ଦିଆଯାଉଥିବା ନେଇ ସେ କହିଥିଲେ । ଏପରିକି ସେମାନଙ୍କୁ ଜଏନିଂ ଲେଟର ଦେବା ସହ ପଶ୍ଚିମବଙ୍ଗରେ ୬ ମାସ ଯାଏଁ ଟ୍ରେନିଂ ଦିଆଯାଇଥିବା ନେଇ ଅଭିଯୋଗ କରିଛନ୍ତି ।

ତେବେ ପରେ ଚାକିରି ମିଳିବା ନେଇ କିଛି ସୂଚନା ନମିଳିବାରୁ ସେମାନେ ଠକାମୀର ଶିକାର ହୋଇଥିବା ସନ୍ଦେହ କରିଥିଲେ । ପରବର୍ତ୍ତୀ ସମୟରେ ଏନେଇ ଆଲିଗଞ୍ଜ ଥାନାରେ ମାମଲା ରୁଜୁ କରାଯାଇଛି ।