ନେପାଳ ପ୍ରଧାନମନ୍ତ୍ରୀ କେ.ପି ଶର୍ମା ଓଲିଙ୍କ ବୟାନ ପରେ ଅଯୋଧ୍ୟା ସାଧୁମାନଙ୍କ ମଧ୍ୟରେ ଅସନ୍ତୋଷ
ଅଯୋଧ୍ୟା: ନେପାଳୀ ପ୍ରଧାନମନ୍ତ୍ରୀ କେ.ପି ଶର୍ମା ଓଲି ପ୍ରଭୁ ରାମଙ୍କୁ ନେଇ ଦେଇଥିବା ବୟାନକୁ ନେଇ ଅଯୋଧ୍ୟା ସାଧୁମାନେ ଅସନ୍ତୋଷ ପ୍ରକାଶ କରିଛନ୍ତି । ରାମ ଦଳ ଟ୍ରଷ୍ଟର ସଭାପତି ରାମଦାସ ମହାରାଜ କହିଛନ୍ତି, ଆଜିଠାରୁ ନେପାଳରେ ଥିବା ତାଙ୍କ ଶିଷ୍ୟମାନେ ଓଲି ବିରୋଧରେ ପ୍ରଦର୍ଶନ କରିବାକୁ ରାସ୍ତାକୁ ଓହ୍ଲେଇବେ । ବେଦ ଏବଂ ପୁରାଣରେ ଥିବା ବର୍ଣ୍ଣନାକୁ ଦର୍ଶାଇ ରାମଦାସ କହିଛନ୍ତି ଯେ ନେପାଳରେ ସରୟୁ ହିଁ ନାହିଁ ।
ରାମଦାସ ମହାରାଜ କହିଛନ୍ତି ଯେ ମୋର ଲକ୍ଷ ଲକ୍ଷ ଶିଷ୍ୟ ନେପାଳରେ ରୁହନ୍ତି ଏବଂ ଆସନ୍ତାକାଲିଠାରୁ ଲକ୍ଷ ଲକ୍ଷ ଭକ୍ତ ରାସ୍ତାରେ ବିରୋଧ କରିବେ। କେ.ପି ଶର୍ମା ଓଲିଙ୍କୁ ଏକ ମାସ ମଧ୍ୟରେ ପ୍ରଧାନମନ୍ତ୍ରୀ ପଦର ଇସ୍ତଫା ଦେବାକୁ ପଡିବ । ମୁଁ ଏହି ଧର୍ମାଦେଶ ଜାରି କରୁଛି । ମୋର ଶିଷ୍ୟମାନେ ରାସ୍ତାକୁ ଓହ୍ଲାନ୍ତୁ ଏବଂ ଓଲିଙ୍କୁ ସତ୍ତାରୁ ବାହାର କରନ୍ତି ।
ରାମ ଦଳ ଟ୍ରଷ୍ଟର ସଭାପତି ରାମ ଦାସ ମହାରାଜ କହିଛନ୍ତି ଯେ ସମଗ୍ର ବିଶ୍ୱର ସାଂସ୍କୃତିକ ରାଜଧାନୀ ଅଯୋଧ୍ୟା । ବେଦ, ରାମାୟଣ କିମ୍ବା ପୁରାଣରେ ଦେଖନ୍ତୁ, ଏହା ସ୍ପଷ୍ଟ ଭାବରେ କହିଛି ଯେ ଯେଉଁଠାରେ ସରଯୁ ଅଛି, ସେଠାରେ ଅଯୋଧ୍ୟା ଅଛି | ନେପାଳରେ କୌଣସି ସରଯୁ ନାହିଁ । ସମଗ୍ର ଭୂମଣ୍ଡଳରେ ରାଜା ରହୁଥିଲେ ଓ ସମସ୍ତଙ୍କ ଚକ୍ରବର୍ତ୍ତୀ ସମ୍ରାଟ ଭାରତ ଉତ୍ତରପ୍ରଦେଶର ଅଯୋଧ୍ୟାର ମହାରାଜା ଥିଲେ।
ଧର୍ମଗୁରୁ ମହନ୍ତ ପରମହଂସ କହିଛନ୍ତି, କେପି ଶର୍ମା ନିଜେ ନେପାଳୀ ନୁହଁନ୍ତି । ସେ ସମଗ୍ର ନେପାଳକୁ ପାକିସ୍ତାନ ଭଳି ଭିକାରୀ କରିବା ପାଇଁ ଲାଗି ପଡିଛନ୍ତି | ନେପାଳର ଲୋକମାନଙ୍କ ସହ ପ୍ରତାରଣା କରୁଛନ୍ତି । ନେପାଳର ଦୁଇ ଡଜନରୁ ଅଧିକ ଗାଁ ଚୀନ୍ ଦଖଲ କରିଛି । ତାକୁ ଲୁଚାଇବା ପାଇଁ ସେମାନେ ଭଗବାନ ରାମଙ୍କ ନାମରେ ଆଶ୍ରୟ ନେଉଛନ୍ତି ।
ରାମ ମନ୍ଦିର ଟ୍ରଷ୍ଟର ସଦସ୍ୟ ମହନ୍ତ ଦୀନେନ୍ଦ୍ର ଦାସ କହିଛନ୍ତି, ଅଯୋଧ୍ୟା ଆମ ପାଇଁ ଗୋଟିଏ ଏବଂ ଅଯୋଧ୍ୟା ଏଇଠି ହିଁ ରହିବ । ରାଜନୀତିରେ କେହି କିଛି ବି କହିପାରିବେ, କିନ୍ତୁ ମୁଖ୍ୟ ଅଯୋଧ୍ୟା ସେଇଟା ଯେଉଁଠି ସରଯୁ ମାତା ଅଛନ୍ତି । ପ୍ରଭୁ ରାମଚନ୍ଦ୍ରଙ୍କ ଅଯୋଧ୍ୟା ଏଇଠି ଅଛି ।
ନେପାଳର ପ୍ରଧାନମନ୍ତ୍ରୀ କ’ଣ କହିଛନ୍ତି?
ନେପାଳର ପ୍ରଧାନମନ୍ତ୍ରୀ ଓପି ଶର୍ମା ଓଲି ଦାବି କରିଛନ୍ତି, ପ୍ରଭୁ ରାମଙ୍କ ନଗରୀ ଅଯୋଧ୍ୟା ଉତ୍ତରପ୍ରଦେଶରେ ନୁହେଁ ବରଂ ନେପାଳର ବାଲ୍ମିକି ଆଶ୍ରମ ନିକଟରେ । ବାଲ୍ମିକି ରାମାୟଣର ନେପାଳୀ ଅନୁବାଦ କରିଥିବା ନେପାଳର ଆଦିକବି ଭାନୁଭକ୍ତଙ୍କ ଜନ୍ମ ବାର୍ଷିକୀ ଅବସରରେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗ ଦେଇ ଅଲି ଏହା ଦାବି କରିଛନ୍ତି।
ନେପାଳର ପ୍ରଧାନମନ୍ତ୍ରୀ ଓପି ଶର୍ମା ଓଲି କହିଛନ୍ତି, ଆଜି ପର୍ଯ୍ୟନ୍ତ ଆମେ ଭ୍ରମରେ ଅଛୁ ଯେ ସୀତାଙ୍କୁ ବିବାହ କରିଥିବା ରାମ ଜଣେ ଭାରତୀୟ । ରାମଚନ୍ଦ୍ର ଭାରତୀୟ ନୁହଁନ୍ତି ସେ ଜଣେ ନେପାଳୀ । ଜନକପୁରର ପଶ୍ଚିମ ଦିଗରେ ଥିବା ବିରଗଞ୍ଜ ନିକଟରେ ଠୋରି ନାମକ ଏକ ସ୍ଥାନରେ ବାଲ୍ମିକୀ ଆଶ୍ରମ ଅଛି । ସେଠାରେ ରାଜକୁମାର ରାମ ଥିଲେ । ବାଲ୍ମିକି ନଗର ନାମକ ସ୍ଥାନ ବର୍ତ୍ତମାନ ବିହାରର ପଶ୍ଚିମ ଚମ୍ପାରନ୍ ଜିଲ୍ଲାରେ ଅଛି, ସେଥିରୁ କିଛି ଭାଗ ନେପାଳରେ ମଧ୍ୟ ଅଛି ।
