ପୁଷ୍ପମ ପ୍ରିୟା କାହିଁକି ସବୁବେଳେ ପିନ୍ଧନ୍ତି କଳା ରଙ୍ଗର ଡ୍ରେସ୍ ?

ପାଟଣା: ବିହାର ରାଜନୀତିରେ ଆଜିର ଦିନରେ ଅଧିକ ଚର୍ଚ୍ଚାରେ ଅଛନ୍ତି ପୁଷ୍ପମ ପ୍ରିୟା ଚୌଧୁରୀ । ସେ ପ୍ରାୟତଃ କଳା ରଙ୍ଗର ପୋଷାକରେ ନଜର ଆସନ୍ତି । ତେବେ, ସେ ସବୁବେଳେ କଳା ରଙ୍ଗର ଡ୍ରେସ୍ ପିନ୍ଧିବା ପଛରେ କାରଣ କଣ ? ଏହା ଏକ କୌଶଳ ନା ଆଉ କିଛି ? ୨୦୨୦ ମାର୍ଚ୍ଚ ମାସରେ ବିହାରର ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ପୁଷ୍ପମ ପ୍ରିୟା ନିଜକୁ ଉପସ୍ଥାପନ କରିଥିଲେ । ସେ ପ୍ଲୁରଲ୍ସ ପାର୍ଟି ଗଠନ କରିବା ସହ ବିଭିନ୍ନ ବିଧାନସଭା କ୍ଷେତ୍ରରେ ପ୍ରାର୍ଥୀ ଛିଡ଼ା କରାଇଛନ୍ତି ।

ପୁଷ୍ପମ ପ୍ରିୟା ଚୌଧୁରୀଙ୍କ ନୂଆ କୌଶଳ, ରଣନୀତି ତାଙ୍କୁ ଖବରର ଶିରୋନାମାରେ ରଖିଛି । ନିକଟରେ ତାଙ୍କ ଦଳର ପ୍ରାର୍ଥୀମାନେ ନାମାଙ୍କନ କରିଥିଲେ । ନାମାଙ୍କନପତ୍ରରେ ଜାତି ସ୍ଥାନରେ ପଲିଟିସିଆନ୍ ଓ ଧର୍ମ ସ୍ଥାନରେ ବିହାରୀ ଲେଖିଥିଲେ । ତେବେ, ଏହା ପଛରେ ପୁଷ୍ପମ ପ୍ରିୟାଙ୍କ କହିବା କଥା ହେଉଛି ରାଜନୀତି ଜାତି ଓ ଧର୍ମ ଆଧାରରେ ନୁହେଁ ବରଂ ବିକାଶ ପାଇଁ ହେବା ଉଚିତ୍ ।

ଲଣ୍ଡନରୁ ପାଠପଢ଼ି ଫେରିଥିବା ପୁଷ୍ପମ ପ୍ରିୟା ଚୌଧୁରୀ ବିହାରର ଦରଭଙ୍ଗାରେ ଜନ୍ମିତ । ତାଙ୍କ ପିତା ବିନୋଦ ଚୌଧୁରୀ ବିହାର ମୁଖ୍ୟମନ୍ତ୍ରୀ ନୀତିଶ କୁମାରଙ୍କ ଅତି ନିକଟତର । ବିନୋଦ ଜେଡିୟୁରୁ ବିହାର ବିଧାନ ପରିଷଦ ସଦସ୍ୟ ମଧ୍ୟ ରହି ସାରିଛନ୍ତି । ବିହାର ରାଜନତୀରେ ବଡ଼ ପରିବର୍ତ୍ତନ ଆଣିବାକୁ ଚାହୁଁଥିବା ପୁଷ୍ପମ ପ୍ରିୟା ଚୌଧୁରୀ ଦାବି କରିଛନ୍ତି ।

ପୁଷ୍ପମ ପ୍ରିୟା କୁହନ୍ତି- ଏବେ ଆର୍ଥିକ ନୀତି ଭଲ ନାହିଁ । ସେ ଲଣ୍ଡନରୁ ଇକୋନମିକ୍ସ ପଲିସି ଟ୍ରେନିଂ ନେଇ ଆସିଛନ୍ତି । ବିହାରରେ ଅର୍ଥନୈତିକ ସୁଯୋଗ ଆଣିବାକୁ ଚାହୁଁଛନ୍ତି । ତେବେ ସେ ସବୁବେଳେ କଳାଡ୍ରେସ୍ ପିନ୍ଧିବା ପଛର କାରଣ ବି କହିଛନ୍ତି । ଦେଶର ସବୁନେତା ଧଳା ରଙ୍ଗର କପଡ଼ା ପିନ୍ଧୁଥିବାରୁ ସେ କଳା ପିନ୍ଧୁଥିବା କହିଛନ୍ତି ।

ଏଥି ସହ ପୁଷ୍ପମ ପ୍ରିୟା କୁହନ୍ତି- ଭାରତୀୟ ସମ୍ବିଧାନରେ ନେତାଙ୍କ ପାଇଁ କୌଣସି ନିର୍ଦ୍ଦିଷ୍ଟ ଡ୍ରେସ୍ କୋଡ୍ ନାହିଁ । ତେବେ, ପୂର୍ବରୁ ଏକ ସାକ୍ଷାତକାରରେ ନେତାଜୀ କହିବାରୁ ସେ ମନା କରିଥିଲେ । ତାଙ୍କ କହିବା କଥା ସେ ନେତାଜୀ ନୁହଁନ୍ତି । ସେ କେବଳ ପଲିସି ମେକର ହେବାକୁ ଚାହୁଁଛନ୍ତି ।

ପ୍ରକୃତ ନେତା ତ ସୁଭାଷ ଚନ୍ଦ୍ର ବୋଷ, ଡକ୍ଟର ରାଜେନ୍ଦ୍ର ପ୍ରସାଦ ଓ ଜୟପ୍ରକାଶ ନାରାୟଣ ଥିଲେ ବୋଲି କୁହନ୍ତି ପୁଷ୍ପମ ପ୍ରିୟା ଚୌଧୁରୀ । ପୁଷ୍ପମ ବିହାର ବିଧାନସଭା ନିର୍ବାଚନ ୨୦୨୦ରେ ମଧୁବନି ଜିଲ୍ଲାର ବିସ୍ଫି ବିଧାନସଭା ଆସନରୁ ନିର୍ବାଚନ ଲଢ଼ୁଛନ୍ତି ।