kanpur gangster vikas dubey: ସନ୍ନି ଦେୱଲଙ୍କ ଏହି ଫିଲ୍ମ ଦ୍ୱାରା ପ୍ରଭାବିତ ଥିଲା ବିକାଶ ଦୁବେ
ନୂଆଦିଲ୍ଲୀ: କାନପୁର ଗ୍ୟାଙ୍ଗଷ୍ଟର ତଥା ୮ ପୋଲିସଙ୍କ ହତ୍ୟାକାରୀ ବିକାଶ ଦୁବେ ଗୁରୁବାର ଦିନ ମଧ୍ୟପ୍ରଦେଶର ଉଜ୍ଜୈନ ସ୍ଥିତ ମହାକାଳ ମନ୍ଦିରରୁ ଗିରଫ ହୋଇଛି । ପୋଲିସ ହାତରେ ଧରା ପଡିବା ବେଳେ ମଧ୍ୟ ବିକାଶ ମୁହଁରେ ସେଇ ପୁରୁଣା ଦମ୍ଭ ଥିଲା । ମୁଁ କାନପୁର ବାଲା ବିକାଶ ଦୁବେ ବୋଲି ପୋଲିସକୁ ସେ କହୁଥିଲା । ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ଅପରାଧିର ପାପ ମହାକାଳଙ୍କ ଦର୍ଶନ ଦ୍ୱାରା ଧୋଇଯିବନି ବୋଲି କହିଛନ୍ତି । ତେବେ ବିକାଶକୁ ନେଇ ଏବେ ନୂଆ ନୂଆ ତଥ୍ୟ ଆସୁଛି । ନୂଆ ତଥ୍ୟ ଅନୁସାରେ ବିକାଶ ଦୁବେ ବଲିଉଡ୍ ଅଭିନେତା ସନ୍ନି ଦେୱଲଙ୍କ ଜବରଦସ୍ତ ଫ୍ୟାନ୍ ଥିଲା ।ବିକାଶ ସନ୍ନି ଦେଓଲଙ୍କ ଗୋଟିଏ ଫିଲ୍ମ ଦ୍ୱାର ଅଧିକ ପ୍ରଭାବିତ ହୋଇଥିଲା । ସେହି ଫିଲ୍ମକୁ ସେ ୧୦୦ ଥରରୁ ଅଧିକ ଦେଖିଥିଲା ।
ସନ୍ନି ଦେଓଲଙ୍କ ଏହି ଫିଲ୍ମକୁ ଶହେ ଥରରୁ ଅଧିକ ଦେଖିଥିଲା ବିକାଶ
ବିକାଶ ସନ୍ନି ଦେୱଲଙ୍କ ଅର୍ଜୁନ ପଣ୍ଡିତ ଫିଲ୍ମ ଦ୍ୱାରା ଅଧିକ ପ୍ରଭାବିତ ହୋଇଥିଲା । ୧୯୯୯ ମସିହାରେ ଆସିଥିବା ଫିଲ୍ମ ଅର୍ଜୁନ ପଣ୍ଡିତ ବିକାଶର ସବୁଠୁ ପସନ୍ଦର ଫିଲ୍ମ ଥିଲା । ଏହି ଫିଲ୍ମ ଦ୍ୱାରା ପ୍ରେରିତ ହୋଇ ସେ ବିକାଶ ପଣ୍ଡିତ ବନିଥିଲା । ଖାଲି ଏତିକି ନୁହେଁ ରାଜନୈତିକ ଦଳ ଓ ପୋଲିସ ବିଭାଗରେ ସେ ‘ବିକାଶ ପଣ୍ଡିତ୍’ ଭାବେ ପରିଚିତ ଥିଲା ।
ବିକାଶ ସମ୍ବନ୍ଧରେ ଏଭଳି ସୂଚନା ଜଣେ ସ୍ଥାନୀୟ ସାମ୍ବାଦିକ ନାମ ଗୋପନ ରଖିବା ସର୍ତ୍ତରେ ଦେଇଛନ୍ତି । ସାମ୍ବାଦିକଙ୍କ ଅନୁସାରେ ବିକାଶକୁ କେହି ଯଦି ବିକାଶ ପଣ୍ଡିତ କହି ଡାକୁଥିଲା ତେବେ ସେ ବହୁତ ଖୁସୀ ହେଉଥିଲା । ସନ୍ନି ଦେୱଲଙ୍କ ଫିଲ୍ମରେ ଅର୍ଜୁନ(ସନ୍ନି) ଜଣେ ଘଟଣାକ୍ରମରେ ଅପରାଧ ଦୁନିଆରେ ପ୍ରବେଶ କରିଥାଏ । ଅପରାଧ ଦୁନିଆରେ ଅର୍ଜୁନ ପଣ୍ଡିତ ବଡ ନାମ ଭାବେ ଉଭା ହୁଏ ।
ବିକାଶ ଉପରେ ଏହି ଫିଲ୍ମର ପ୍ରଭାବ ଏମିତି ଥିଲା ଯେ, ସେ ସେହି ଫିଲ୍ମକୁ ଅନେକ ଥର ଦେଖିଥିଲା । ଏପରିକି ସେ ନିଜ ଶିକାରଙ୍କ ସାମ୍ନାରେ ପଣ୍ଡିତ ଭାବେ ପରିଚିତ ହେବାକୁ ଭଲ ପାଉଥିଲା । ଜୁନ୍ ୩ ତାରିଖ ଦିନ ବିକାଶ କାନପୁରର ବିକାରୁ ଗାଁରେ ୮ ଜଣ ପୋଲିସଙ୍କୁ ହତ୍ୟା କରିଥିଲା । ଏହି ମାମଲାରେ ତାକୁ ସୂଚନା ଦେଇଥିବା ଅଭିଯୋଗରେ ଦୁଇ ଜଣ ପୋଲିସ ଅଧିକାରୀ ଗିରଫ ମଧ୍ୟ ହୋଇଛନ୍ତି ।
ଫୁଲ ଦୋକାନୀ ବିକାଶକୁ ଚିହ୍ନି ପାରିଲେ
ମହାକାଳ ମନ୍ଦିର ଆଗରେ ଗୁରୁବାର ଦିନ ଟହଲ ମାରୁଥିବା ବେଳେ ବିକାଶକୁ ଜଣେ ଫୁଲ ଦୋକାନୀ ଚିହ୍ନି ପାରିଥିଲେ । ବିକାଶକୁ ଚିହ୍ନିବା ପରେ ସେଠାରେ ଥିବା ପୋଲିସକୁ ସେ ସୂଚନା ଦେଇଥିଲେ । ବିକାଶକୁ ପୋଲିସ ଧରିବା ବେଳେ ସେ ପୋଲିସ ସହ ଧସ୍ତାଧସ୍ତି କରିଥିଲା ।
ବିକାଶର ସ୍ତ୍ରୀ ମୋବାଇଲରେ ଦେଖୁଥିଲା ଏନକାଉଣ୍ଟର ଲାଇଭ୍
ବିକାରୁ ଗାଁରେ ହୋଇଥିବା ଏନକାଉଣ୍ଟରର ଲାଇଭ୍ ବିକାଶର ସ୍ତ୍ରୀ ମୋବାଇଲରେ ଦେଖୁଥିଲା । କାରଣ ଗାଁରେ ଲାଗିଥିବା ସିସିଟିଭି ତା’ ମୋବାଇଲ ସହ ଯୋଡି ହୋଇଥିଲା । ମୋବାଇଲରୁ ପୋଲିସର ଉପସ୍ଥିତି ଦେଖି ବିକାଶକୁ ତା’ ପତ୍ନୀ ଗୁଳି ଚଳାଇବାକୁ ସୂଚନା ଦେଉଥିଲା । ବିକାଶର ପତ୍ନୀ ଏବେ ପୋଲିସ ହେପାଜତରେ ଅଛି ।
