ସେପ୍ଟେମ୍ବର ୧୯ରୁ ଆରମ୍ଭ ହୋଇପାରେ ଆଇପିଏଲ,ଏହି ସମୟରେ ଆରମ୍ଭ ହେବ ମ୍ୟାଚ୍…

ନୂଆଦିଲ୍ଲୀ: ଏସିଆ କପ୍ ଏବଂ ଟି -୨୦ ବିଶ୍ୱକପ୍ ୨୦୨୦ ରଦ୍ଦ ହେବା ପରେ, ଆଇପିଏଲ୍ ୨୦୨୦ ଅନୁଷ୍ଠିତ ହେବା ଏକ ପ୍ରକାର ନିଶ୍ଚିତ ହୋଇଯାଇଛି । କିନ୍ତୁ ପ୍ରଶ୍ନ ଉଠୁଛି, ବିଶ୍ୱର ଏହି ସର୍ବବୃହତ୍ତ କ୍ରିକେଟ୍ ଲିଗ୍ କେବେ ଆରମ୍ଭ ହେବ? ଏହି ପ୍ରଶ୍ନର ଉତ୍ତର ମଧ୍ୟ ଖୁବ୍ ଶୀଘ୍ର ମିଳିପାରିବ, କିନ୍ତୁ  ଏହାର ଭିତରେ ଖବର ଆସୁଛି ଯେ, ଆଇପିଏଲ୍ ୨୦୨୦ ସେପ୍ଟେମ୍ବର ୧୯ରୁ ଆରମ୍ଭ ହୋଇପାରେ | ପୂର୍ବରୁ ଶୁଣାଯାଉଥିଲା ଯେ, ଏହି ଟୁର୍ଣ୍ଣାମେଣ୍ଟ ୨୬ ସେପ୍ଟେମ୍ବରରୁ ଆରମ୍ଭ ହୋଇପାରେ ଏବେ କିନ୍ତୁ ଏହି ଟୁର୍ଣ୍ଣାମେଣ୍ଟ ଏକ ସପ୍ତାହ ପୂର୍ବରୁ ଆରମ୍ଭ ହୋଇପାରିବ ।

କେଉଁ ସମୟରେ ଆଇପିଏଲ୍ ମ୍ୟାଚ୍ ଆରମ୍ଭ ହେବ?

ଜାତୀୟ ଗଣମାଧ୍ୟମରେ ପ୍ରକାଶିତ ରିପୋର୍ଟ ଅନୁଯାୟୀ, ଚଳିତ ବର୍ଷର ଇଣ୍ଡିଆନ୍ ପ୍ରିମିୟର ଲିଗ୍‌ର ମ୍ୟାଚ୍‌ଗୁଡ଼ିକ ସନ୍ଧ୍ୟା ୭.୩୦ ରୁ ଆରମ୍ଭ ହେବ । ଭାରତରେ ଏହି ମ୍ୟାଚ୍ ଗୁଡିକ ରାତି ୮ଟାରୁ ଆରମ୍ଭ ହୋଇ ସନ୍ଧ୍ୟା ୭.୩୦ରେ ଟସ୍ ହେଉଥିଲା । କିନ୍ତୁ ଏଥର ଆଇପିଏଲ ୟୁଏଇରେ ହୋଇପାରେ, ଯେଉଁଥିପାଇଁ ମ୍ୟାଚର ସମୟ ବଦଳୁଛି  ।

ୟୁଏଇରେ ହେବ ଆଇପିଏଲ୍

ଆଇପିଏଲ ପରିଚାଳନା ପରିଷଦର ଚେୟାରମ୍ୟାନ୍ ବ୍ରିଜେଶ ପଟେଲ ସୋମବାର ଏକ ସାକ୍ଷାତକାରରେ କହିଛନ୍ତି ଯେ, ଏଥର  ଭାରତ ବାହାରେ ଅର୍ଥାତ ୟୁଏଇରେ ଆଇପିଏଲ୍‌ ଅନୁଷ୍ଠିତ ହେବ । ଭାରତରେ କ୍ରମାଗତ ଭାବେ କରୋନା ଭୂତାଣୁର ବିସ୍ତାର ହେତୁ ଏହି ନିଷ୍ପତ୍ତି ନିଆଯାଉଛି।

ବ୍ରିଜେଶ ପଟେଲ କହିଛନ୍ତି ଯେ, ଆଇପିଏଲ ପରିଚାଳନା ପରିଷଦ ଆସନ୍ତା ସପ୍ତାହରେ ଏହି ପ୍ରସଙ୍ଗରେ ବୈଠକ କରିବାକୁ ଯାଉଛି ଏବଂ ଟୁର୍ଣ୍ଣାମେଣ୍ଟର ତାରିଖ, କାର୍ଯ୍ୟସୂଚୀ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ ବିଷୟ ଉପରେ ନିଷ୍ପତ୍ତି ନିଆଯାଇପାରେ । ବ୍ରିଜେଶ ପଟେଲ କହିଛନ୍ତି ଯେ, ଭାରତ ସରକାରଙ୍କ ଅନୁମୋଦନ ପରେ ଆଇପିଏଲ ୨୦୨୦ କାର୍ଯ୍ୟସୂଚୀ ପ୍ରସ୍ତୁତ ହେବ।

ଟି-ଟ୍ୱେଣ୍ଟି ବିଶ୍ୱକପ୍ ୨୦୨୦ ବାତିଲ୍, ବଦଳିଲା ୨୦୨୩ ବିଶ୍ୱକପ୍ କାର୍ଯ୍ୟକ୍ରମ