ଦେଶରେ ୨୪ଘଣ୍ଟାରେ ୯୩ ହଜାରରୁ ଅଧିକ ନୂଆ କରୋନା ସଂକ୍ରମିତ ଚିହ୍ନଟ, ୫୩ ଲକ୍ଷ ପାର କରୋନା ସଂକ୍ରମଣ

ନୂଆଦିଲ୍ଲୀ: ଦେଶରେ ହୁହୁ ହୋଇ ବଢ଼ୁଛି କରୋନା ସଂକ୍ରମଣ । ପ୍ରତିଦିନ ବିପୁଳ ପରିମାଣରେ କରୋନା ସଂକ୍ରମିତ ଚିହ୍ନଟ ହେଉଛନ୍ତି । ଗତ ୨୪ ଘଣ୍ଟା ମଧ୍ୟରେ ଭାରତରେ ୯୩ ହଜାର ୩୩୭ ନୂଆ କରୋନା ରୋଗୀ ଚିହ୍ନଟ ହୋଇଥିବାବେଳେ ୧୨୪୭ ଜଣଙ୍କର ମୃତ୍ୟୁ ହୋଇଛି । ରେକର୍ଡ ସଂଖ୍ୟକ କରୋନା ସଂକ୍ରମିତ ଚିହ୍ନଟ ହେବା ଏବେ ସାଧାରଣ କଥା ହୋଇଗଲାଣି । ତେବେ ନୂଆ ରୋଗୀ ଚିହ୍ନଟ ହେବା ପରେ ମୋଟ ସଂକ୍ରମିତ ସଂଖ୍ୟା ୫୩ ଲକ୍ଷ ଅତିକ୍ରମ କରିଛି । ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ, ଶୁକ୍ରବାର ସୁଦ୍ଧା ୪୨ ଲକ୍ଷ ୮ ହଜାର ୪୩୨ ରୋଗୀ ସୁସ୍ଥ ହୋଇଛନ୍ତି । ଏହା ହେଉଛି ଏକ ମାତ୍ର ଭଲ ଖବର ଯାହା କରୋନା ଭୟ ଭିତରେ ଆଶ୍ୱସ୍ତି ଦେଉଛି । ଦେଶରେ ଏବେ କୋଭିଡ -୧୯ର  ହାର ୭୮.୮୬ ପ୍ରତିଶତ ରହିଛି ।

ସ୍ୱାସ୍ଥ୍ୟ ମନ୍ତ୍ରଣାଳୟ ଅପଡେଟ୍ ହୋଇଥିବା ତଥ୍ୟ ଅନୁଯାୟୀ, ଦେଶରେ କରୋନା ଭୂତାଣୁ ସଂକ୍ରମିତ ରୋଗୀଙ୍କ ସଂଖ୍ୟା ୫୩ ଲକ୍ଷ ୮ ହଜାର ୧୫କୁ ବୃଦ୍ଧି ପାଇଛି । ସେପଟେ ଗତ ୨୪ ଘଣ୍ଟା ମଧ୍ୟରେ ୧,୨୪୭ ଜଣଙ୍କର ମୃତ୍ୟୁ ହୋଇଛି । ଏହି ମହାମାରୀରେ ୮୫ ହଜାର ୬୧୯ ଜଣଙ୍କର ମୃତ୍ୟୁ ହୋଇଛି ।

ତଥ୍ୟ ଅନୁଯାୟୀ, କୋଭିଡ -୧୯ କାରଣରୁ ମୃତ୍ୟୁ ହାର ଆହୁରି ହ୍ରାସ ପାଇଛି । ମୃତ୍ୟୁ ହାର ୧.୬୨ ପ୍ରତିଶତକୁ ଖସି ଆସିଛି । ମନ୍ତ୍ରଣାଳୟ କହିଛି ଯେ ଦେଶରେ ଏବେ ୧୦ ଲକ୍ଷ ୧୩ ହଜାର ୯୬୪ କୋଭିଡ -୧୯ ରୋଗୀ ଚିକିତ୍ସିତ ହେଉଛନ୍ତି । ଯାହା ମୋଟ ସଂକ୍ରମିତ ଲୋକଙ୍କ ମଧ୍ୟରୁ ୧୯.୫୨ ପ୍ରତିଶତ ଅଟେ ।