ପାଣି ପାଇଁ ଗାଁ ଦାଣ୍ଡରେ ଚାଲିଲା ମାରଣାସ୍ତ୍ର; ୨ ମୃତ, ୯ ଆହତ
ପୁରୀ/ବ୍ରହ୍ମଗିରି: ପାଣି ପାଇଁ ମହାଭାରତ । ବ୍ରହ୍ମଗିରି ଡିମିରିସେଣା ହରିଜନ ସାହିର ଦୁଇ ପରିବାର ମଧ୍ୟରେ ପିଇବା ପାଣି ପାଇପ୍ ସଂଯୋଗକୁ ନେଇ ରକ୍ତାକ୍ତ ସଂଘର୍ଷ ହୋଇଛି । ଉଭୟ ପରିବାର ପକ୍ଷରୁ ତେଣ୍ଟା, କୁରାଢି ଓ ଭଲାରେ ଆକ୍ରମଣ କରାଯାଇଥିଲା । ଫଳରେ ୨ଜଣଙ୍କ ମୃତ୍ୟୁ ହୋଇଛି । ମୃତକ ହେଉଛନ୍ତି ସୁରେନ୍ଦ୍ର ଭୋଇ ଓ କାଳିଆ ଭୋଇ ।
ଦୁଇ ପରିବାରର ଆହତଙ୍କୁ ପ୍ରଥମେ ରେବଣା ନୂଆଗାଁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଓ ପରେ ପୁରୀ ମେଡିକାଲକୁ ସ୍ଥାନାନ୍ତର କରାଯାଇଛି । ପୂର୍ବରୁ ଉଭୟ ପରିବାର ମଧ୍ୟରେ ଜମି ବିବାଦ ଲାଗି ରହିଥିବା ବେଳେ ରବିବାର ପାଣି ପାଇପ୍କୁ ନେଇ ରକ୍ତାକ୍ତ ସଂଘର୍ଷ ହୋଇଛି । ଦୁଇ ପରିବାର ମଧ୍ୟରେ ରକ୍ତାକ୍ତ ସଂଘର୍ଷ ଘଟଣାରେ ବ୍ରହ୍ମଗିରି ଥାନାରେ ୨ଟି ମାମଲା ରୁଜୁ ହୋଇଛି ।
ଉଭୟ ପକ୍ଷରୁ ୧୨ ଜଣଙ୍କୁ ଅଟକ ରଖି ତଦନ୍ତ କରୁଛି ପୋଲିସ । ସଂଘର୍ଷ ପରେ ଡିମିରିସେଣା ହରିଜନ ସାହିରେ ଚାପା ଉତ୍ତେଜନା ଲାଗିରହିଛି । ଘଟଣାସ୍ଥଳକୁ ଯାଇ ପୁରୀ ଏସ୍ପି ଓ ଏସ୍ଡିପିଓ ଅନୁଧ୍ୟାନ କରିଛନ୍ତି । ଘଟଣାସ୍ଥଳରେ ପୋଲିସ ମୁତୟନ କରାଯାଇଛି ।
