ପୁଣି ଚକଡ଼ା ଚଡ଼କ, ଏକର ଏକର ଜମିରେ ଫସଲ ନଷ୍ଟ ! ପ୍ରଶାସନର ସହାୟତା ଅପେକ୍ଷାରେ ଚାଷୀ

ଗଞ୍ଜାମ: ଆଉ କିଛି ଦିନ ଗଲେ ଧାନ ଗଛରୁ କେଣ୍ଡା ବାହାରିବ । ହେଲେ ଏହି ଧାନ କେଣ୍ଡା ବାହାରିବା ପୂର୍ବରୁ ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ଚାଷୀଙ୍କୁ ଘାରିଛି ଚକଡ଼ା ପୋକ ଭୟ । ଅଧିକାଂଶ ଜମିରେ ଚକାଡ଼ ପୋକ ଲାଗିବାରୁ ଧାନ ଗଛ ଛାରଖାର ହେବାକୁ ବସିଲାଣି । ଏଭଳି ସ୍ଥିତିରେ ଋଣ କରି ଚାଷ କରିଥିବା ଚାଷୀ ଏବେ ଚିନ୍ତାରେ । କୃଷି ବିଭାଗ ତୁରନ୍ତ ଔଷଧ ପ୍ରଦାନ କରି ଚାଷୀଙ୍କ ସମସ୍ୟା ସମାଧାନ କରିବାକୁ ଦାବି ହୋଇଛି ।

ପ୍ରଥମେ ବିଳମ୍ବାରେ ବର୍ଷା, ପରେ ବନ୍ୟା ପ୍ରକୋପ । ଆଉ ଏବେ ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ଚାଷୀଙ୍କୁ ଘରିଛି ଚକଡା ପୋକ ଭୟ । ବେଉସଣ ସରି ଧାନକେଣ୍ଡା ବାହାରିଲା ବେଳକୁ ହେକ୍ଟର ହେକ୍ଟର ଧାନ ବିଲକୁ ନଷ୍ଟ କରିଦେଉଛନ୍ତି ଚକଡ଼ା ପୋକ । ଆଉ ଋଣ କରି ଚାଷ କରିଥିବା ଚାଷୀ କ୍ଷେତର ଏଭଳି ଅବସ୍ଥା ଦେଖି ମୁଣ୍ଡରେ ହାତ ଦେଇ ବସିଛନ୍ତି ।

ପୁରୁଷୋତ୍ତମପୁର ବ୍ଲକର ଷୋଳଘର, ହିଣ୍ଡୁଳା, ପାଣ୍ଡିଆ ଆଦି ଗାଁର ଅଧିକାଂଶ ଜମିରେ ଚକଡ଼ା ପୋକ ଲାଗିଥିବା ଦେଖିବାକୁ ମିଳୁଛି । ଏନେଇ ଚାଷୀମାନେ କୃଷି ଅଧିକାରୀଙ୍କ ଦୃଷ୍ଟି ଆକର୍ଷଣ କରିଥିବା ବେଳେ କୃଷି ବିଭାଗ ଚାଷ ଜମି ପରିଦର୍ଶନ କରିଛନ୍ତି । ଏଥିସହ ଚାଷୀଙ୍କୁ ରିହାତି ଦରରେ ଔଷଧ ଦିଆଯିବ ବୋଲି କହିଛନ୍ତି କୃଷି ଅଧିକାରୀ ।