କିଏ ମୁଖ୍ୟମନ୍ତ୍ରୀ ହେବେ ? ନୀତିଶ କହିଲେ- ମୁଁ ଦାବି କରି ନାହିଁ, ଏନଡିଏ ନିଷ୍ପତ୍ତି ନେବ !
ପାଟନା: ବିହାର ବିଧାନସଭା ନିର୍ବାଚନରେ ଏନ୍ଡିଏର ବିଜୟ ହାସଲ ପରେ ବିହାର ମୁଖ୍ୟମନ୍ତ୍ରୀ ନୀତିଶ କୁମାର ଏକ ସାମ୍ବାଦିକ ସମ୍ମିଳନୀ କରିଛନ୍ତି । ସେଥିରେ ସେ ପୁଣି ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିବା ନେଇ ଏକ ବଡ଼ ବୟାନ ଦେଇଛନ୍ତି । ଯାହା ଶୁଣିଲେ ତାଙ୍କ କର୍ମୀଙ୍କ ହୋସ୍ ଉଡ଼ିଯିବ ।
ସିଏମ୍ ହେବାର ନିଷ୍ପତ୍ତି ଉପରେ ନୀତୀଶ କୁମାର କହିଛନ୍ତି ଯେ, ମୁଁ ମୁଖ୍ୟମନ୍ତ୍ରୀ ହେବି ବୋଲି କୌଣସି ଦାବି କରି ନାହିଁ । କିଏ ବିହାରର ଆଗାମୀ ମୁଖ୍ୟମନ୍ତ୍ରୀ ହେବ ସେନେଇ ଏନଡିଏ ସହ ଜଡ଼ିତ ଦଳମାନେ ନିଷ୍ପତ୍ତି ନେବେ । ସେ କହିଛନ୍ତି, ମୋ ଆଡ଼ୁ ମୁଖ୍ୟମନ୍ତ୍ରୀ ହେବା ନେଇ କୌଣସି ପ୍ରକାର ଚାପ ନାହିଁ । ମୁଖ୍ୟମନ୍ତ୍ରୀ ପଦ ପାଇଁ ଏନ୍ଡିଏର ଏକ ବୈଠକରେ ନିଷ୍ପତ୍ତି ନିଆଯିବ ।
ଏହାପୂର୍ବରୁ ସେ କହିଥିଲେ ଯେ, ଜନସାଧାରଣ ଏନଡିଏକୁ ସଂଖ୍ୟାଗରିଷ୍ଠତା ଦେଇଛନ୍ତି ଏବଂ ଆମେ ସରକାର ଗଠନ କରିବୁ । ଶପଥ ଗ୍ରହଣ ସମ୍ପର୍କରେ ସେ କହିଛନ୍ତି ଯେ, ଏବେ ସେନେଇ କୌଣସି ନିଷ୍ପତ୍ତି ହୋଇନାହିଁ । ଛଟ୍ ପର୍ବ ଓ ଦୀପାବଳି ପରେ ଶପଥ ଗ୍ରହଣ ସମାରୋହ ହେବାର ନିଷ୍ପତ୍ତି ନିଆଯିବ । ଏବେ ଆମେ ନିର୍ବାଚନ ଫଳାଫଳର ସମୀକ୍ଷା କରୁଛୁ । ଆମ ସହ ଥିବା ୪ ସହଯୋଗୀ ଦଳ ଶୁକ୍ରବାର ବୈଠକ କରିବେ । ଏଥିରେ ୩ରୁ ୪ ଦିନ ସମୟ ଲାଗିପାରେ ।
ନୀତିଶ ଆହୁରି କହିଛନ୍ତି ଯେ, ଜେଡିୟୁର ଭୋଟ ହ୍ରାସ ହାରକୁ ନେଇ ମଧ୍ୟ ସମୀକ୍ଷା କରାଯାଉଛି । ଚିରାଗଙ୍କ ବିଷୟରେ ସେ କହିଛନ୍ତି ଯେ, ‘ଆମର ସମସ୍ତ ପ୍ରାର୍ଥୀଙ୍କ ବିରୋଧରେ ଏଲଜେପି ପ୍ରାର୍ଥୀ ଛିଡ଼ା କରିଥିଲା ।’
ତେବେ ଶେଷରେ ନୀତିଶ କହିଛନ୍ତି ଯେ, ବିହାରର କଲ୍ୟାଣ ତଥା ରାଜ୍ୟର ବିକାଶ ପାଇଁ ନିରନ୍ତର କାର୍ଯ୍ୟ କରୁଛନ୍ତି । ବିହାରର ବିକାଶ ପାଇଁ ତାଙ୍କ ଦଳ ପ୍ରତିବଦ୍ଧ ।
ସୂଚନାଯୋଗ୍ୟ, ୨୪୩ ସିଟ୍ ବିଶିଷ୍ଟ ବିହାର ବିଧାନସଭାରେ ଏନଡିଏକୁ ୧୨୫ଟି ସିଟ୍ ହାସଲ ହୋଇଛି । ସେଥିମଧ୍ୟରୁ ବିଜେପିର ୭୪, ଜେଡିୟୁର ୪୩ ସିଟ୍ ସାମିଲ ଅଛି । ଅନ୍ୟପଟେ ଆରଜେଡି ଖାତାରେ ୭୫ଟି ସିଟ୍ ରହିଥିବା ବେଳେ ବିହାରର ସବୁଠୁ ବଡ଼ ଦଳ ଭାବେ ସେ ଉଭା ହୋଇଛି । ତେବେ ଆର୍ଜେଡିର ସହଯୋଗୀ ଦଳ କଂଗ୍ରେସ ପାଇଛି ମାତ୍ର ୧୯ଟି ସିଟ୍ ଏବଂ ବାମ ଦଳ ପାଇଛି ୧୬ଟି ସିଟ୍ । ମହାଗଠବନ୍ଧନକୁ ମୋଟ ୧୧୦ଟି ସିଟ୍ ମିଳିଛି ।
