କୃଷକଙ୍କ ଆନ୍ଦୋଳନକୁ ସମର୍ଥନ: ପୁରସ୍କାର ଫେରାଇବକୁ ବାହାରିଲେ ୩୦ ଖେଳାଳି, ଅଟକାଇଲା ପୋଲିସ

ନୂଆଦିଲ୍ଲୀ: ନୂଆ କୃଷି ଆଇନ ବିରୋଧରେ ତୀବ୍ରତର ହେଉଛି ଆନ୍ଦୋଳନ । ଦେଶର ରାଜଧାନୀ ନିକଟରେ ରଣହୁଙ୍କାର ଦେଇଛନ୍ତି କୃଷକ ସଂଗଠନ । ଆଉ ଏହାକୁ ବିଭିନ୍ନ ରାଜନୈତିକ ଦଳ ଓ ରାଜନେତା, କ୍ରୀଡ଼ାବିତ, ବୁଦ୍ଧିଜୀବୀଙ୍କ ସମେତ ଅନେକ ବର୍ଗର ଲୋକଙ୍କ ସମର୍ଥନ ମିଳିଛି । ଏଥିସହିତ ଆସନ୍ତାକାଲି ଚାଷୀ ସଂଗଠନ ଗୁଡ଼ିକ ପକ୍ଷରୁ ଭାରତ ବନ୍ଦର ମଧ୍ୟ ଡାକରା ଦିଆଯାଇଛି ।

ତେବେ ଏହାରି ମଧ୍ୟରେ କୃଷି ଆଇନ ବିରୋଧରେ ୩୦ଜଣ ଖେଳାଳି ରାସ୍ତାକୁ ଓହ୍ଲାଇଛନ୍ତି। କୃଷକ ଆନ୍ଦୋଳନକୁ ସମର୍ଥନ କରିବା ସହ କୃଷି ବିଲକୁ ଫେରାଇ ନେବା ଦାବି କରି ୩୦ଜଣ ଖେଳାଳି ପୁରସ୍କାର ଫେରାଇବାକୁ ରାଷ୍ଟ୍ରପତି ଭବନ ଯାଉଥିଲେ। ଏହି ସମୟରେ ଦିଲ୍ଲୀ ପୁଲିସ ସମ୍ପୃକ୍ତ ଖେଳାଳିମାନଙ୍କୁ ଅଟକାଇ ଥିବା ଜଣାପଡ଼ିଛି । ଘଟଣାକୁ ନେଇ ରେସଲର କରତାର ସିଂ କହିଛନ୍ତି ଯେ ଆମେ ୩୦ଜଣ ଖେଳାଳି ପଞ୍ଜାବରୁ ପୁରସ୍କାର ଫେରାଇବାକୁ ଚାହୁଁଛୁ।

Delhi Police stop sportspersons who were marching towards Rashtrapati Bhavan to return their awards to the President in protest against the new farm laws. pic.twitter.com/XS8u1Em2CD

— PB-SHABD (@PBSHABD) December 7, 2020

ଏପଟେ ଆଜି କନ୍ନୌଜକୁ କୃଷି ଆନ୍ଦୋଳନରେ ଯୋଗ ଦେବା ପାଇଁ ଯାଉଥିବା ସମାଜବାଦୀ ପାର୍ଟିର ମୁଖ୍ୟ ତଥା ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବଙ୍କୁ ଅଟକ ରଖିଛି ପୁଲିସ। ପ୍ରଶାସନ ପକ୍ଷରୁ ପୂର୍ବରୁ ଲକ୍ଷ୍ନୌରେ ଥିବା ତାଙ୍କ ଘର ବାହାରେ ବ୍ୟାରିକେଡ କରାଯାଇଥିଲା। ତଥାପି କୃଷି ଆନ୍ଦୋଳନରେ ଯୋଗ ଦେବା ପାଇଁ ବାହାରିବା ପରେ ତାଙ୍କୁ ପୁଲିସ ଅଟକାଇବାରୁ ସେ ନିଜ ସମର୍ଥକଙ୍କ ସହ ନିଜ ଘର ବାହାରେ ଧାରଣାରେ ବସିଯାଇଥିଲେ। ପରେ ପରିସ୍ଥିତି ନିୟନ୍ତ୍ରଣ ବାହାରକୁ ଯିବାରୁ ପୁଲିସ ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବଙ୍କୁ ସେଠାରୁ ଉଠାଇ ନେବା ସହ ତାଙ୍କ ଗାଡିକୁ ଜବତ କରିଛି।