ଅର୍ଣ୍ଣବଙ୍କ ଷ୍ଟାଇଲରେ ସବୁଦିନ ପୋଲିସ କରିବ ୩ ଘଣ୍ଟା ଜେରା
ମୁମ୍ବାଇ: ଆଇନ୍ ଜାଲରେ ଛନ୍ଦି ହେବାରେ ଲାଗିଛନ୍ତି ରିପବ୍ଲିକ୍ ଟିଭିର ମୁଖ୍ୟ ସମ୍ପାଦକ ଅର୍ଣ୍ଣବ ଗୋସ୍ୱାମୀ । ଜଣେ ଇଣ୍ଟରିୟର ଡିଜାଇନର ଓ ତାଙ୍କ ମାଆକୁ ଆତ୍ମହତ୍ୟା ଲାଗି ଉସୁକାଇବା ଅଭିଯୋଗରେ ମୁମ୍ବାଇ ପୋଲିସ ତାଙ୍କୁ ଗତ ୪ ତାରିଖରେ ଗିରଫ କରିଥିଲା । ଆଜି ବମ୍ବେ ହାଇକୋର୍ଟ ଅର୍ଣ୍ଣବ ଗୋସ୍ୱାମୀଙ୍କ ଜାମିନ୍ ଅଗ୍ରାହ୍ୟ କରିବା ସହ ତଳ କୋର୍ଟରେ ଆବେଦନ କରିବାକୁ କହିଥିଲେ ।
ଅର୍ଣ୍ଣବ ଗୋସ୍ୱାମୀ ଅଲିବାଗ ସେସନ୍ସ କୋର୍ଟରେ ଜାମିନ୍ ଆବେଦନ କରିଥିଲେ । ଯାହାର ଆଜି ଶୁଣାଣି ହୋଇଛି । ଅର୍ଣ୍ଣବ ଗୋସ୍ୱାମୀ ବିଚାର ବିଭାଗୀୟ ହାଜତରେ ରହିବା ଯାଏଁ ମହାରାଷ୍ଟ୍ର ପୋଲିସ ତାଙ୍କୁ ଜେରା କରିପାରିବ । ଦୈନିକ ଅର୍ଣ୍ଣବଙ୍କୁ ୩ ଘଣ୍ଟା ଜେରା ପାଇଁ ଅଲିବାଗ ସେସନ୍ସ କୋର୍ଟ ମହାରାଷ୍ଟ୍ର ପୋଲିସକୁ ଅନୁମତି ଦେଇଛନ୍ତି । ଇଣ୍ଟରିୟର ଡିଜାଇନର ଓ ତାଙ୍କ ମାଆଙ୍କୁ ଆତ୍ମହତ୍ୟା ପାଇଁ ଉସୁକାଇବା ଅଭିଯୋଗରେ ମୁମ୍ବାଇ ପୋଲିସ ନଭେମ୍ବର ୪ ତାରିଖରେ ଅର୍ଣ୍ଣବ ଗୋସ୍ୱାମୀଙ୍କୁ ତାଙ୍କ ବାସଭବନରୁ ଗିରଫ କରିଥିଲା ।
ରାୟଗଡ଼ ଜିଲ୍ଲା କୋର୍ଟ ଅର୍ଣ୍ଣବଙ୍କୁ ନଭେମ୍ବର ୧୮ ଯାଏଁ ବିଚାର ବିଭାଗୀୟ ହାଜତକୁ ପଠାଇ ଦେଇଥିଲେ । ଏହା ପରେ ଅର୍ଣ୍ଣବଙ୍କୁ ଶନିବାର ରାତିରେ ଅଲିବାଗର ଏକ ସ୍କୁଲରେ ହୋଇଥିବା କ୍ୱାରେଣ୍ଟାଇନ୍ ସେଣ୍ଟର (ଅସ୍ଥାୟୀ ଜେଲ୍)ରେ ରଖା ଯାଇଥିଲା । ରବିବାର ସକାଳୁ ତଲୋଜା ଜେଲକୁ ସିଫ୍ଟ କରାଯାଇଥିଲା । ଏବେ ସେଠାରେ ପୋଲିସ ତାଙ୍କୁ ପ୍ରତିଦିନ ୩ ଘଣ୍ଟା ଜେରା କରିବ ।
