ଡିଜିଟାଲ ଷ୍ଟ୍ରାଇକ୍ ୨.୦ : ପୁଣି ୪୭ ଚାଇନା ଆପ୍ ବ୍ୟାନ୍, ଏହାସହ ଆଗକୁ ଲିଷ୍ଟରେ ଆଉ ୨୭୫ ଚାଇନା ଆପ୍

ନୂଆଦିଲ୍ଲୀ: କେନ୍ଦ୍ର ସରକାର ଚୀନ କମ୍ପାନୀ ବିରୋଧରେ ପୁଣି ଥରେ ବଡ଼ କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ।  ଭାରତ ସରକାର ଚୀନର ଆଉ ୪୭ ଆପକୁ ବ୍ୟାନ୍ କରିଛନ୍ତି । ଏହାକୁ ଚୀନ ସରକାର ଉପରେ ମୋଦି ସରକାରଙ୍କ ଦ୍ୱିତୀୟ ଡିଜିଟାଲ୍ ଷ୍ଟ୍ରାଇକ୍ ବୋଲି କୁହାଯାଉଛି । ତେବେ ସୂଚନା ଅନୁସାରେ ଏହି ୪୭ଟି ଆପ୍  ପୂର୍ବରୁ ବ୍ୟାନ ହୋଇଥିବା ୫୯ ଆପକୁ କ୍ଲିନିଂ କରୁଥିଲେ । ଉଦାହରଣ ସ୍ୱରୂପ ଚୀନ ଆପ ଟିକଟକ୍ ବ୍ୟାନ ହେବା ପରେ ଟିକଟକ୍ ଲାଇଟ୍ ନାଁରେ ଉପସ୍ଥିତ ଥିଲା । ଯଦିଓ ଏହା ପୂର୍ବରୁ କେନ୍ଦ୍ର ସରକାର ଚୀନର ୫୯ ଆପ ବ୍ୟାନ କରିଦେଇଥିଲେ । ଯେଉଁଥିରେ ଟିକଟକ୍, ସେୟାରଇଟ୍, କ୍ୟାମସ୍କାନର ଭଳି ବହୁ ଲୋକପ୍ରିୟ ଆପ ସାମିଲ ଥିଲା । ଏହା ବ୍ୟତୀତ ଜଣାପଡ଼ିଛି  ଯେ, ସରକାର ୨୭୫ ଅନ୍ୟ ଆପର ଲିଷ୍ଟ ପ୍ରସ୍ତୁତ କରିଛନ୍ତି ।

ତାଲିକାରେ ଥିବା ଏହିସବୁ ଆପ  ରାଷ୍ଟ୍ରୀୟ ସୁରକ୍ଷା ଏବଂ ଉପଭୋକ୍ତାଙ୍କ ପ୍ରାଇଭେସି ପାଇଁ ବିପଦ ସୃଷ୍ଟି କରିବ କି ନାହିଁ ତାକୁ ନେଇ  ସରକାର ବିଶ୍ଳେଷଣ କରୁଛନ୍ତି । ସୂଚନା ଅନୁସାରେ ଯେଉଁ କମ୍ପାନୀର ସର୍ଭର ଚୀନରେ ରହିଛି ତାହା ଉପରେ ପ୍ରଥମେ ରୋକ ଲଗାଇବାକୁ ପ୍ରୟାସ ଚାଲିଛି ।

ସୂଚନା ଅନୁସାରେ ପ୍ରସ୍ତୁତ ହେଉଥିବା ଲିଷ୍ଟରେ Xiaomi ଦ୍ୱାରା ପ୍ରସ୍ତୁତ Zili ଆପ୍, ଇ-କମର୍ସ Alibabaର Aliexpress ଆପ୍ , Resso ଆପ୍ ଏବଂ Bytedance ର ULike ଆପ୍ ସାମିଲ ରହିଛି ।  ସରକାର ଏହି ସବୁ ୨୭୫ ଆପକୁ ବା ଏମାନଙ୍କ ଭିତରୁ ଗୋଟିଏ ଆପକୁ ବ୍ୟାନ କରିପାରନ୍ତି । ଅଧିକାରୀକ ସୂତ୍ରରୁ ମିଳିଥିବା ସୂଚନା ଅନୁସାରେ, କିଛି ଆପ ରାଷ୍ଟ୍ରୀୟ ସୁରାକ୍ଷା ପାଇଁ ବିପଦପୂର୍ଣ୍ଣ ଅଟେ । ଏହାସବ କିଛି ଆପ ଡାଟା ସେୟାରିଂ ଏବଂ ବ୍ୟକ୍ତିଗତ ନିୟମକୁ ଉଲ୍ଲଂଘନ କରୁଛି ।