ଦିଲ୍ଲୀରେ ୪୬ ଲକ୍ଷ ଲୋକଙ୍କୁ ହୋଇଥିଲା କରୋନା! ବିନା ଚିକିତ୍ସାରେ କେମିତି ଠିକ୍ ହେଲେ ଏତେ ?

ନୂଆଦିଲ୍ଲୀ: ଦୁଇ ଦିନ ତଳେ ଦେଶର ରାଜଧାନୀ ଦିଲ୍ଲୀରେ କରୋନା ଭାଇରସକୁ ନେଇ ସିରୋ ସର୍ଭ ରିପୋର୍ଟ ଆସିଛି । ଏଥିରୁ ଜଣା ପଡିଛି ଯେ,ଦିଲ୍ଲୀ ଜନସଂଖ୍ୟାର ୨୩.୪୮ ପ୍ରତିଶତ କରୋନା କବଳରେ ପଡିଥିଲେ । ରେଣ୍ଡମ୍ ସାମ୍ପଲିଂ ଆଧାରରେ ଏହି ସର୍ଭେ ହୋଇଥିଲା । ଦିଲ୍ଲୀ ଜନସଂଖ୍ୟା ପାଖାପାଖି ୨ କୋଟି । ଅର୍ଥାତ ଏହି ଦିଲ୍ଲୀ ଜନସଂଖ୍ୟାର ୪୬ ଲକ୍ଷ ଲୋକଙ୍କୁ କରୋନା ହୋଇଥିଲା । ଏମିତିରେ ପ୍ରଶ୍ନ ଉଠୁଛି ଦିଲ୍ଲୀର ଲୋକ କେମିତି ଆପେ ଆପେ ଠିକ୍ ହୋଇଗଲେ?

ସିରୋ ସର୍ଭେ କ’ଣ ?

ଏହି ସର୍ଭରେ ଲୋକଙ୍କ ରକ୍ତ ନମୂନା ନିଆ ଯାଇଥାଏ । ନମୂନାରୁ ଏହା ଜାଣିବାକୁ ଚେଷ୍ଟା କରାଯାଇଥାଏ ଯେ, କେତେ ଲୋକଙ୍କ ଶରିରରେ କରୋନା ଭାଇରସ ପାଇଁ ଆଣ୍ଟିବଡି ତିଆରି ହୋଇଛି ।  କରୋନା ସଂକ୍ରମଣର ଅନୁମାନ ଲଗାଇବା ପାଇଁ କେନ୍ଦ୍ର ସରକାର ଦେଶର ୧୧ ପ୍ରଭାବିତ ସହରର କଣ୍ଟେନମେଣ୍ଟ୍ ଜୋନରେ ସିରୋ ସର୍ଭେ କରାଇ ଥିଲେ । ଏହି ସବୁ ସହରର ଜନସଂଖ୍ୟା ଉପରେ କରୋନାର କେତେ ପ୍ରଭାବ ପଢିଛି  ତାହା ଜାଣିବା ଏହି ସର୍ଭେର ଲକ୍ଷ୍ୟ ଥିଲା ।

ହର୍ଡ ଇମ୍ୟୁନିଟି ଦ୍ୱାରା ଠିକ୍ ହେଲେ ଲୋକ !

ସିରୋ ସର୍ଭେର ଫଳାଫଳ ଆଧାରରେ ଏହା ଧରା ଯାଉଛି ଯେ,ଦିଲ୍ଲୀର ଅନେକ ଲୋକଙ୍କ ମଧ୍ୟରେ ହର୍ଡ ଇମ୍ୟୁନିଟି ତିଆରି ହୋଇ ସାରିଛି । ଏମିତିରେ ଆଗାମୀ ଦିନରେ ଦିଲ୍ଲୀରେ କରୋନା ସଂକ୍ରମଣ ସଂଖ୍ୟା କମିବା ଆଶା କରାଯାଉଛି । ଏମିତି ମଧ୍ୟ ହେଉଛି । ଗତ ୨୪ ଘଣ୍ଟା ମଧ୍ୟରେ କରୋନା ସଂକ୍ରମଣର ୧୨୨୭ ମାମଲା ଆସିବା ପରେ ସହରରେ ମୋଟ ସଂକ୍ରମିତଙ୍କ ସଂଖ୍ୟା ୧ ଲକ୍ଷ ୨୬ ହଜାର ୩୨୩ ରହିଛି । ସୂଚନାଯୋଗ୍ୟ ଯେ, ଜୁନ୍ ମାସରେ ପ୍ରତିଦିନ ୩ ହଜାରରୁ ଅଧିକ ସଂକ୍ରମିତ ଚିହ୍ନଟ ହେଉଥିଲେ ।

ହର୍ଡ ଇମ୍ୟୁନିଟି କ’ଣ ?

ହର୍ଡ ଇମ୍ୟୁନିଟି ସେହି ରୋଗ ପ୍ରତିରୋଧକ କ୍ଷମତା ଯାହା ଜନସଂଖ୍ୟାର ବଡଭାଗରେ କୌଣସି ରୋଗର ପ୍ରତିରୋଧ ପାଇଁ ବିକଶିତ ହୋଇଥାଏ । ଏହା ଭାଇରସ ସଂପର୍କରେ ଆସିବା ଦ୍ୱାରା ହେଉ କିମ୍ବା ଭ୍ୟାକ୍ସିନ୍ ନେବା ପରେ ବିକଶିତ ହୋଇଥାଏ । ଅନେକ ସମୟରେ ଏମିତି ବି ହୋଇଥାଏ ଯେ, ଅନେକ ଲୋକଙ୍କ ମଧ୍ୟରେ ଭାଇରସ କିମ୍ବା ରୋଗ ସହ ଲଢିବା କ୍ଷମତା ସମୟ ସହ ବିକଶିତ ହୋଇଥାଏ ।  ଯଦି ମୋଟ ଜନସଂଖ୍ୟାର ୭୫ ପ୍ରତିଶତ ଲୋକଙ୍କ ମଧ୍ୟର ପ୍ରତିରୋଧକ କ୍ଷମତା ବିକଶିତ ହୋଇଥାଏ ତେବେ ଏହାକୁ ହର୍ଡ ଇମ୍ୟୁନିଟି କୁହାଯାଏ । ଫଳରେ ୪ ଜଣ ଯଦି ଜଣେ ସଂକ୍ରମିତଙ୍କ ସଂସ୍ପର୍ଷରେ ଆସନ୍ତି ତେବେ ୩ ଜଣ ଭାଇରସ ଦ୍ୱାରା ସଂକ୍ରମିତ ହେବେ ନାହିଁ  କିମ୍ବା ଭାଇରସକୁ ପ୍ରସାରିତ କରିବେ ନାହିଁ ।

ଦିଲ୍ଲୀରେ କରୋନା ପିକ୍ ଗଲାଣି !

ଏମସ ନିର୍ଦ୍ଦେଶକ ଡକ୍ଟର ରଣଦିପ ଗୁଲେରିଆଙ୍କ ଅନୁସାରେ ଦିଲ୍ଲୀରେ କରୋନାର ପିକ୍ ବା  ସର୍ବୋଚ୍ଚ ସ୍ତର ସମ୍ଭବତଃ ଯାଇ ସାରିଲାଣି । ସେ କହିଛନ୍ତି ଯେ, ଦିଲ୍ଲୀର ତଥ୍ୟକୁ ଦେଖିଲେ ଲାଗୁଛି ଯେ, କର୍ଭ ଫ୍ଲାଟ୍ ହେବାର ଲାଗିଲାଣି ଓ ଟ୍ରେଣ୍ଡ୍ ନିମ୍ନଗାମୀ ହେଉଛି । ତେଣୁ ଆମେ ପିକ୍ ଅର୍ଥାତ କରୋନାର ଉଚ୍ଚତମ ସ୍ତରକୁ ପାର କରିଯାଇଥିବାର ସମ୍ଭାବନା ରହିଛି । ତେବେ ଏହାର ଅର୍ଥ ନୁହେଁ ଯେ, ଆମେ ସୁରକ୍ଷା ସମ୍ବନ୍ଧିତ ଉପାୟକୁ ଢିଲା କରିବା ।