ରାଜଧାନୀରେ ୨୧ ହଜାର ଟପିଲା କରୋନା ସଂକ୍ରମିତଙ୍କ ସଂଖ୍ୟା
ଭୁବନେଶ୍ୱର: ସତର୍କତା, ସାବଧନତା ସତ୍ତ୍ୱେ ବଢ଼ି ଚାଲିଛି ସଂକ୍ରମଣ । ସହର ଖୋଲୁଛି, ସଂକ୍ରମଣ ବଢ଼ୁଛି । ବିଗତ ୨୪ ଘଣ୍ଟାରେ ରାଜଧାନୀରୁ ୩୪୨ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । ଏଥିସହ ବିଏମସି ଅଞ୍ଚଳରେ ସଂକ୍ରମିତଙ୍କ ସଂଖ୍ୟା ୨୧ ହଜାର ଟପିଛି । ଏନେଇ ସୂଚନା ଦେଇଛି ବିଏମସି ।
ଗତ ୨୪ ଘଣ୍ଟାରେ ଚିହ୍ନଟ ହୋଇଥିବା ୩୪୨ ସଂକ୍ରମିତଙ୍କ ମଧ୍ୟରୁ ୧୧୧ଟି ମାମଲା କ୍ୱାରେଣ୍ଟାଇନରୁ ଆସିଥିବା ବେଳେ ୨୩୧ଟି ମାମଲା ସ୍ଥାନୀୟ ସଂକ୍ରମଣ । ଚନ୍ଦ୍ରଶେଖରପୁରରୁ ୧୧ ଜଣ, ଆଇଗିଣିଆରୁ ୬ ଜଣ, ଆଇଆରସି ଓ ଶୈଳଶ୍ରୀ ବିହାରରୁ ୮ ଜଣ ଲେଖାଏଁ, ନୟାପଲ୍ଲୀରୁ ୯ ଜଣ, ପଟିଆରୁ ୧୨ ଜଣ, ଝାରପଡ଼ା ଓ ନୀଳାଦ୍ରି ବିହାରରୁ ୭ ଜଣ ଲେଖାଏଁ, ପାତ୍ରପଡ଼ା ଓ ଲକ୍ଷ୍ମୀସାଗର ଅଞ୍ଚଳରୁ ୭ ଜଣ ଲେଖାଏଁ ସଂକ୍ରମିତ ଚିହ୍ନଟ ହୋଇଛନ୍ତି ।
ଗତ ୨୪ ଘଣ୍ଟାରେ ୩୨୧ ଜଣ କରୋନା ଆକ୍ରାନ୍ତ ସୁସ୍ଥ ହୋଇଛନ୍ତି । ବିଏମସି ଅଞ୍ଚଳରେ ଏବେ ଯାଏଁ ମୋଟ ୨୧ ହଜାର ୧୯୭ ଜଣ ସଂକ୍ରମିତ ଚିହ୍ନଟ ହୋଇଥିବା ବେଳେ ୮୮ ଜଣଙ୍କ ମୃତ୍ୟୁ ହୋଇଛି । ୧୭ ହଜାର ୪୯୭ ଜଣ ସୁସ୍ଥ ହୋଇ ସାରିଥିବା ବେଳେ ୩ ହଜାର ୫୯୫ ଜଣ ଆକ୍ରାନ୍ତଙ୍କ ଚିକିତ୍ସା ଜାରି ରହିଛି ।
